ރާއްޖޭގެ އެންމެ މޮޅު ކުޅުންތެރިޔާއަށް މިރޭ ނުކުޅެވޭނެ

މޯލްޑިވްސް ސްޕޯރޓްސް އެވޯޑްސްގައި ހޮވި ރާއްޖޭގެ އެންމެ މޮޅު ފުޓްބޯޅަ ކުޅުންތެރިޔާ ހަމްޒާ މުޙައްމަދު (ހަމްޕު) އަށް މިރޭ ބަންގްލަދޭޝް އާއި ދެކޮޅަށް ނުކުޅެވޭނެއެވެ.

ބައިނަލްއަޤްވާމީ ރަހުމަތްތެރިކަމުގެ މެޗެއްގައި މިރޭ ގަލޮޅު ދަނޑުގައި ބަނގްލަދޭޝް އާއި ވާދަކުރާއިރު ހަމްޕުއަށް ނުކުޅެވެނީ އަނިޔާގެ ސަބަބުންނެވެ. އޭނާއަށް އަނިޔާވީ ދިވެހި ޕްރިމިއަރ ލީގުގެ ފުރަތަމަ ބުރުގައި މާޒިޔާ ކުޅުނު ފަހު މެޗުގައި ވެލެންސިޔާއާ އަތުން މޮޅުވި މެޗުގައެވެ. އެމެޗުގައި ހަމްޕު ވަނީ ބަދަލުކޮށްފައެވެ.

އަނިޔާގައި ހުރި ނަމަވެސް ބަންގްލަދޭޝް މެޗަށް ނެގި ސްކޮޑްގައި ކޯޗު މޮރިއޭރޯ ވަނީ ހަމްޕު ހިމަނާފައެވެ. ކޯޗު ބުނީ މުޅިން ފިޓްނޫން ހަ ކުޅުންތެރިން ސްކޮޑްގައި ހިމަނާފައިވާކަމަށެވެ. އޭގެތެރެއިން ކުޅެވޭނެ ކުޅުންތެރިން ކަނޑައަޅާނީ ފަހު ޕްރެކްޓިސްއަށްފަހު ކަމަށް ބުދަ ދުވަހު އޮތް ނޫސްވެރިންގެ ބައްދަލުވުމުގައި ކޯޗު ބުންޏެވެ. އެކަމަކު ހަމްޕު މިއަދު ވަނީ އޭނާއަށް އަނިޔާގެ ސަބަބުން ނުކުޅެވޭނެކަމަށް ބުނެފައެވެ.

ހަމްޕުއަކީ މިދިޔަ ތިން އަހަރަށް ބަލާ މޯލްޑިވްސް ސްޕޯރޓްސް އެވޯޑްސްގައި ހޮވި އެންމެ މޮޅު ފުޓްބޯޅަ ކުޅުންތެރިޔާއެވެ. އޭނާއާ ވާދަކުރި އަލީ ފާސިރު (ސެންޓޭ) ވެސް ހުރީ އަނިޔާގައެވެ. އެކަމަކު ސެންޓޭއަށްވެސް ސްކޮޑުން ވަނީ ފުރުޞަތު ދީފައެވެ. ސެންޓޭއަށް އަނިޔާވީ ޕްރެޒިޑެންޓް ކަޕް ފައިނަލްގައި މާޒިޔާ އަތުން ވެލެންސިޔާ މޮޅުވި މެޗުގައެވެ. މިދެކުޅުންތެރިންގެ އިތުރުން ރާއްޖޭގައި އުފެދުނު އެންމެ މޮޅު ކުޅުންތެރިޔާ އަލީ އަޝްފާޤު ސްކޮޑްގައިވެސް ނުހިމަނައެވެ. އޭނާ ސީޒަން ހުޅުވަން ކުޅުނު މެޗުން ފެނުނު ނަމަވެސް, އޭގެ ފަހުން ޕްރެޒިޑެންޓްކަޕާއި, ލީގުގެ ފުރަތަމަ ބުރުންވެސް ނުފެނެއެވެ.

ކޯޗު މޮރިއޭރޯ ބުނީ ޒުވާން ކުޅުންތެރިންތަކަކަށް ބަންގްލަދޭޝް މެޗުގައި ފުރުޞަތު ދޭނެކަމަށެވެ. ބަންގްލަދޭޝް އާއި ދެކޮޅަށް ރާއްޖެއިން އެންމެ ފަހުން ކުޅުނު މެޗުގައި މިދިޔަ އަހަރު ވަނީ ބަލިވެފައެވެ. އެކަމަކު އޭގެކުރިން ވާދަކުރި ހަތަރު މެޗުންވެސް ރާއްޖެ މޮޅުވިއެވެ.