ޓޫރިޒަމާއި ބެހޭ ސަމިޓް ޖޫން މަހު

ޓޫރިޒަމާއި ބެހޭ ޚާއްސަ ސަމިޓް މިއަހަރުގެ ޖޫން މަހު 14،15 އަދި 16 ވަނަ ދުވަހު އޮންނާނެ ކަމަށް ޓޫރިޒަމް މިނިސްޓަރު ޑރ. އަބްދުﷲ މައުސޫމް ވިދާޅުވެއްޖެއެވެ.

ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަފުޅު ދައްކަވަމުން މިނިސްޓަރު ވިދާޅުވީ އިންޓަރނޭޝަނަލް މިސަމިޓް ބޭއްވުމަށް ހަމަޖެހިފައިވަނީ ޔޫއެންޑަބްލިއުޓީއޯ އާއި ގުޅިގެން ކަމަށެވެ. އަދި މައި ކޮންފަރެންސް މާލެ ސަރަހައްދުގައި ބާއްވާނެ ކަމަށާއި ސަމިޓްގެ ތިން ކޮންފަރެންސެއް ރާއްޖޭގެ ތިން ސަރަހައްދުގައި އޮންނާނެ ކަމަށް މިނިސްޓަރު ވިދާޅުވިއެވެ.

Advertisement

މި ސަމިޓްގެ ސަބަބުން އިވެންޓްސް ބާއްވަން ރަނގަޅު މަންޒިލެއްގެ ގޮތުގައި ރާއްޖެ އިޝްތިހާރުވެގެންދާނެ ކަމަށް ވެސް ޓޫރިޒަމް މިނިސްޓަރު ވިދާޅުވިއެވެ.  

މިނިސްޓަރު ވިދާޅުވީ މި ސަމިޓްގެ އިތުރުން މިއަހަރުގެ ސެޕްޓެމްބަރު މަހު ޑައިވް ސައިޓާއި ބެހޭ ފޮޓޯ މުބާރާތެއް އޮންނާނެ ކަމަށާއި އަދި އެ މުބާރާތުން ލިބޭ ފޮޓޯތަކުގެ އެގްޒިބިޝަނެއް ވެސް ބޭއްވުމަށް ހަމަޖެހިފައިވާ ކަމަށެވެ. އަދި އެކަމާއި ބެހޭ އިތުރު ތަފްސީލު މިނިސްޓްރީން ހާމަކުރާނެ ކަމަށެވެ.

ރާއްޖޭގައި ޓޫރިޒަމް ފުޅާ ކުރުމަށް ފަހިކޮށްދޭން މަސައްކަތް ކުރާ މިނިސްޓްރީއަކަށް މިހާރުގެ މިނިސްޓްރީ ވާނެ ކަމުގައިވެސް މައުސޫމް ވިދާޅުވިއެވެ. މައުސޫމް ވިދާޅުވީ، ރާއްޖޭގެ ފަތުރުވެރިކަން ފުޅާކުރުމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ގެންގުޅުއްވާ ސިޔާސަތުން 2023 ވަނަ އަހަރުގެ ކުރިން ރާއްޖޭގެ ހުރިހާ ރަށަކަށް ފަތުރުވެރިކަން ފުޅާވެގެން ދާނެ ކަމަށެވެ.

މިނިސްޓަރު މައުސޫމް ވިދާޅުވީ ސަރުކާރުގެ ސިޔާސަތަކީ ރާއްޖޭގެ ވަކި ސަރަހައްދަކަށް ބަރޯސާނުވެ ހުރިހާ ސަރަހައްދެއްގައިވެސް ފަތުރުވެރިކަން ފުޅާކުރުން ކަމަށެވެ. މިހާރު ރާއްޖޭގެ ހުރިހާ ސަރަހައްދަކަށްވެސް އެއްވެސް ދަތިކަމެއް ނެތި ދަތުރުކުރެވޭކަން ފާހަގަކުރައްވައި މިނިސްޓަރު ވިދާޅުވީ މިއީ މުޅި ރާއްޖެއަށް ފަތުރުވެރިކަން ފުޅާކުރުމަށް މަގުފަހިވެގެންދިޔަ ކަމެއް ކަމަށެވެ.   

މިނިސްޓަރު މައުސޫމް އިތުރަށް ވިދާޅުވީ މަޝްވަރާގެ މަތިން އިންޑަސްޓްރީން ބޭނުންވާ ގޮތަށާއި ޤައުމަށާއި ރައްޔިތުންނަށް އެންމެ ފައިދާ ބޮޑުވާ ގޮތަށް ސަރުކާރުގެ ފަތުރުވެރިކަމުގެ ސިޔާސަތުތައް ބައްޓަން ކުރައްވަން މަސައްކަތް ކުރައްވާނެ ކަމަށެވެ.