"އިންޑިއާ އައުޓް" ހަރަކާތް ހުއްޓުވާލުމަށް ގޮވާލާ މެމްބަރު ޖާބިރު ހުށައެޅުއްވި މައްސަލަ ބަލައިގެންފި

އދިކޮޅުން ހިންގާ "އިންޑިއާ އައުޓް" ހަރަކާތް ގައުމީ ދިފާއީ ބާރުން ނުކުމެ ވަގުތުން ވަގުތަށް ހުއްޓާލުމަށް ގޮވާލާ ކާށިދޫ ދާއިރާގެ މެމްބަރު އަބްދުﷲ ޖާބިރު ހުށައެޅުއްވި ކުއްލި މައްސަލަ މަޖިލީހުން ބަލައިގެންފިއެވެ.

މައްސަލަ މަޖިލީހުގެ ތަޅުމުން ބަލައިގަނެ ބަހުސް ކުރަން ފެންނަ ކަމަށް ވޯޓު ދެއްވީ، 30 މެމްބަރުންނެވެ. މައްސަލަ ބަލައިގަންނަން ނުފެންނަ ކަމަށް ވޯޓު ދެއްވީ، 2 މެމްބަރުންނެވެ.

މިއީ މިހަފްތާގައި ޖާބިރު ހުށައެޅުއްވި ދެވަނަ މައްސަލައެވެ.

ޖާބިރު ހުށައެޅުއްވި މައްސަލަައިގައި ބުނެފައިވަނީ، އަވަށްޓެރި ގައުމަކާމެދު ނަފްރަތު އުފެދޭ ގޮތަށް "އިންޑިއާ އައުޓް" ނަމުގައި ކުރީގެ ރައީސް ޔާމީން އިސްވެ ހުންނަވައި އަތޮޅުތަކުުން މީހުން މާލެ ގެނެސްގެން ހިންގާ މި ހަރަކާތުގެ ސަބަބުން އިންޑިއާ އާއި ރާއްޖެ އާއި ދެމެދު އޮތް ގުޅުން ގޯސްވެގެން ދިޔަ ނުދީ ހުއްޓުވަން ޖެހޭ ކަމަށެވެ. އަދި މިއީ ގައުމުގެ ސަލާމަތާއި ރައްކާތެރިކަމަށްޓަކައި ކުރަން ޖެހޭ ކަމެއް ކަމަށެވެ. ސަލާމަތީ ބާރުތަކުން މަޝްވަރާ ކުރެއްވުމަށްފަހު މާލޭގައި ހިންގާ މި ހަރަކާތް ހުއްޓުވުމަށް މިހާރުން މިހާރަށް މަސައްކަތް ކުރަން ޖެހޭ ކަމަށްވެސް ޖާބިރު ހުށައެޅުއްވި ގަރާރުގައި ބުނެފައިވެއެވެ.

އުތުރުތިލަފަޅު އެގްރިމެންޓާއި ބެހޭ ގޮތުން ސިޔާސީ ފިތުނަ އުފެއްދުމަށް ކުރާ މަސައްކަތުގެ ސަބަބުން ރާއްޖެއަށް ގެއްލުންވުމަކީ ދުރުގައި އޮތް ކަމެއް ނޫން ކަމަށާއި ހަތިޔާރު ރާއްޖޭގައި ނެތްކަމަށް ތަކުރާރުކޮށް ސަލާމަތީ ބާރުތަކުން ބުނަމުން އަންނައިރުވެސް އެކަން އޮޅޭ ގޮތައް ރައްޔިތުންގެ މެދުގައި ހަގީގަތާ ޚިލާފު ވާހަކަތައް އިދިކޮޅުން ފަތުރަމުން އަންނަ ކަމަށް މި ކުއްލި މައްސަލައިގައި ބުނެފައިވެއެވެ.

އެހެންކަމުން މާލޭގެ އެއްވެސް ތަނަކަށް އިންޑިއާ އައުޓް ނަމުގައި އެއްވުމުގެ ޖާގަ ދިނުމަކީ، ގައުމީ ސަލާމަތަށް އޮތް ނުރައްކަލެއް ކަމުން، އެކަން ހުއްޓުވުމަށް މައްސަލައިގައިވަނީ ބުނެފައެވެ.