ހަޑިހުތުރު ބަހުން ކޮށްފައިވާ ޓްވީޓުތަކަކީ އެކައުންޓް ހެކް ކޮށްގެން ބަޔަކު ކުރި ޓްވީޓުތަކެއް: އަލީ ޒާހިރު
މަޖިލީހުގެ ޖަލްސާތަކުންވެސް ވަނީ ޕާޓީގެ ތެރޭގައި އުފެދިފައިވާ ދެ ފެކްޝަންގެ ކުލަވަރު ފެނިފައި
އަލީ ޒާހިރު
ރައީސް އޮފީހުގެ ޗީފް އޮފް ސްޓާފް އަލީ ޒާހިރުގެ ޓްވިޓަރ އެކައުންޓް ހެކް ކޮށްފައިވާ ކަމަށާއި، މިހާރު އެކައުންޓް އަނބުރާ ހޯދިފައިވާކަމަށް އޭނާ ވިދާޅުވެއްޖެއެވެ.
އެމްޑީޕީގެ ސޯޝަލް މީޑިއާ އެކްޓިވިސްޓެއް ކަމަށްވާ ޝައްމޫނު ޖަލީލް (ލޫކަސް ޖަލީލް) ސަރުކާރުގެ ވަޒީރަކަށް ފާޑުކިޔައި ކޮށްފައިވާ ޓްވީޓަކަށް އަލީ ޒާހިރުގެ އެކައުންޓުން ވަނީ ރައްދު ދީ، ހަޑިހުތުރު ބަސް ބޭނުން ކޮށްފައެވެ. އެކަމާއި ގުޅިގެން އެމްޑީޕީގެ އެކި ފަރާތްތަކުން ގެންދަނީ އަލީ ޒާހިރަށް ފާޑު ކިޔަމުންނެވެ.
މިކަމާއި ގުޅޭގޮތުން އަލީ ޒާހިރު ކުރެއްވި ޓްވީޓެއްގައި ވިދާޅުވީ، އޭނާގެ އެކައުންޓް ހެކްކޮށް، ސައްޙަ ނޫން ޓްވީޓު ކޮށްފައިވާ ކަމަށެވެ. ނަމަވެސް މިހާރު އެކައުންޓް އަނބުރާ ލިބިވަޑައިގެންފައިވާ ކަމަށާއި، އެކައުންޓުގެ އިތުރު ސެކިއުރިޓީ ފިޔަވަޅުތައްވެސް ވަރުގަދަ ކޮށްފައިވާ ކަމަށެވެ.
އެ މައްސަލަ މިހާރު އޭނާ ވަނީ ފުލުހުންނަށްވެސް ހުށައަޅުއްވާފައެވެ.
އަލީ ޒާހިރު ވިދާޅުވާ ގޮތުގައި މިއީ ވެރިކަން ކުރާ ޕާޓީ އެމްޑީޕީގެ ކުރިއަށް އޮތް އިންތިޚާބުތަކުގައި އޭނާގެ ދައުރެއްވާކަން ދައްކައި، ނުރަނގަޅު ތަސައްވުރެއް އުފެއްދުމަށް ބަޔަކު ގަސްތުގައި ކޮށްފައިވާ ކަމެކެވެ.
ކުރިޔަށް އޮތީ ވެރިކަން ކުރާ މައި ޕާޓީ އެމްޑީޕީގެ އެތެރޭގެ އިންތިޚާބެވެ. އެމްޑީޕީގެ ޗެއާޕާރސަންގެ މަޤާމަށް އެއްކޮޅުން ރައީސް ސޯލިހުގެ އެންމެ އަރިސް އެއް މިނިސްޓަރު ކަމުގައިވާ އިކޮނޮމިކް މިނިސްޓަރު ފައްޔާޒު އިސްމާއީލް ވާދަކުރައްވާއިރު، އަނެއްކޮޅުން އެމަޤާމަށް ވާދަކުރައްވަނީ ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީއެވެ.
އެމްޑީޕީގެ އެތެރޭގައި ފެކްޝަންތައް އުފެދި، ސަރުކާރާއި މަޖިލީހުގެ ބައެއް މެމްބަރުންގެ ކޯޅުން އިތުރުވެފައިވާ މި ދަނޑިވަޅުގައި ރައްޔިތުންގެ މަޖިލީހުގެ ޖަލްސާތަކުންވެސް ވަނީ ޕާޓީގެ ތެރޭގައި އުފެދިފައިވާ ދެ ފެކްޝަންގެ ކުލަވަރު ފެނިފައެވެ. މިދިޔަ އަހަރު ކުރިޔަށްދިޔަ ޖަލްސާތަކުގައި ބައެއް ޖަލްސާތައް ހޫނުވެގެން ދިޔައީ އެމްޑީޕީގެ މެމްބަރަކު އަނެއް މެމްބަރަކަށް ދެއްވަމުންގެންދެވި ބަހުގެ ހޫނު ހަމަލާތަކުންނެވެ.
