މެމްބަރުންނަށް ނޭނގި ޕާޓީ ބަދަލުކުރުމާއި ގުޅޭ މައްސަލަތައް ހުށައެޅޭ މިންވަރު ފަހަކަށް އައިސް ގިނަ: އީސީ
21 މާރިޗު 2022 | ހޯމަ 09:33އުސޫލަށް ބަދަލެއް ގެންނާނީ މިހާރު އީސީއަށް އެކި ޕާޓީތަކުން ހުށައަޅާފައިވާ ފޯމުތައް ޕްރޮސެސްވުމުން
އިލެކްޝަންސް ކޮމިޝަންގެ ރައީސް ފުއާދު ތައުފީގު ފަލަސުރުޚީ ޕްރޮގްރާމްގައި ވާހަކަފުޅުދައްކަވަނީ
ސިޔާސީ ޕާޓީތަކުގައި ތިބޭ މެމްބަރުންނަށް ނޭނގި އެމީހުންގެ ޕާޓީ ބަދަލުކުރުމާއި ގުޅޭ މައްސަލަތައް ހުށައެޅޭ މިންވަރު ފަހަކަށް އައިސް ގިނަކަމަށް އިލެކްޝަންސް ކޮމިޝަން (އީސީ) ގެ ރައީސް ފުއާދު ތައުފީޤު ވިދާޅުވެއްޖެއެވެ.
ރާއްޖޭގައި ގާއިމްކޮށްފައިވާ ސިޔާސީ ޕާޓީތަކުގެ ތެރެއިން 3،000 މެމްބަރުން ހަމަނުވާ 4 ޕާޓީއަކަށް ނޯޓިސް ދޭން ނިންމާފައިވާކަން އިލެކްޝަންސް ކޮމިޝަނުން ހާމަކޮށްފައިވާއިރު، އޭގެ ތެރޭގައި ހިމެނެނީ ޑީއާރްޕީ، އެމްއެލްއެސްޑީޕީ، އެމްޓީޑީ އަދި އެމްއާރްއެމްއެވެ. \
ނަމަވެސް މީގެ ތެރެއިން ބައެއް ޕާޓީތަކުން ވަނީ އެ ޕާޓީތަކުގެ މެމްބަރުންނަށް ނޭނގި، އެހެނިހެން ޕާޓީތަކުގައި ރަޖިސްޓަރު ކޮށްފައިވާކަމަށް ބުނެފައެވެ.
މިކަމާއި ގުޅޭގޮތުން ރާއްޖެއެމްވީން ސުވާލު ދެންނެވުމުން އީސީގެ ރައީސް ފުވާދު ތައުފީޤު ވިދާޅުވީ، އެފަދަ މައްސަލަތައް ހުށައެޅޭ މިންވަރު މި ފަހަކަށް އައިސް އިތުރުވެފައިވާ ކަމަށެވެ. އެގޮތުން ސައްޙަ މައުލޫމާތާއެކު ސައްޙަ ފޯމު ހުށައަޅައިފިނަމަ އީސީން އެ ފޯމެއް ޕްރޮސެސް ކުރާނެކަން ފާހަގަކުރައްވާ ފުވާދު ވިދާޅުވީ، އާންމު އުސޫލުން އީސީން ބަލާނީ އެއީ ޕާޓީ ބަދަލުކުރަން ބޭނުންވެގެން ހުށައަޅާފައިވާ ފޯމުގެ ގޮތުގައި ކަމަށެވެ.
އެހެންނަމަވެސް، ޕާޓީ ބަދަލުވުމަށްފަހު އެކި ފަރާތްތަކުން މައްސަލަ ހުށައަޅަމުންދާއިރު، އެއީ އެ ފަރާތްތަކަށް ނޭނގި ހިނގާފައިވާ ކަމެއްކަމަށް ދަނީ ބުނަމުންނެވެ.
ފުވާދު ވިދާޅުވީ އެކަމަށް ޙައްލު ގެނައުމަށް ސިޔާސީ ޕާޓީތަކާއެކު މަޝްވަރާ ކުރައްވާނެ ކަމަށެވެ. އަދި އުސޫލަށް ބަދަލެއް ގެންނަންޖެހޭނަމަ ގެންނާނީ މިހާރު އީސީއަށް އެކި ޕާޓީތަކުން ހުށައަޅާފައިވާ ފޯމުތައް ޕްރޮސެސް ވުމުންކަމަށްވެސް އޭނާ ވިދާޅުވިއެވެ.
ރާއްޖޭގެ ސިޔާސީ ޕާޓީތަކުގެ ގާނޫނުގައި ވާގޮތުން ކޮންމެ ޕާޓީއެއްގައިވެސް މަދުވެގެން 3،000 މެމްބަރުން ހަމަވާންޖެހެއެވެ. މެމްބަރުން ހަމަނުވާނަމަ އެ އަދަދު ހަމަކުރުމަށް ވަކި މުއްދަތެއް ދެވެއެވެ. އެ މުއްދަތުގެ ތެރޭގައި މެމްބަރުން ހަމަނުކުރާނަމަ އެ ޕާޓީއެއް އުވިގެންދާނެއެވެ. އެހެންނަމަވެސް ސިއްހީ ކުއްލި ނުރައްކަލުގެ ހާލަތާއި ގުޅިގެން މިގޮތަށް މެމްބަރުން ހަމަކުރުމަށް މުއްދަތު ދިނުމާއި، ޕާޓީ އުވާލުން އޮތީ މެދުކަނޑާލާފައެވެ.
