އަންނަ ހުކުރު ދުވަހު އިދިކޮޅުން ބޭއްވުމަށް ރާވާފައިވާ ހަރަކާތުގައި ގަނޫނާއި ޚިލާފު އެއްވެސް ކަމަކަށް ޖާގައެއް ނެތް
21 މާރިޗު 2022 | ހޯމަ 06:39މިހާރުވެސް މަޖިލީހުގެ 241 ކޮމެޓީއާއެކު މަސައްކަތްތަކެއް ކުރެވެމުންދޭ
އިމްރާން އަބްދުﷲ - ހޯމް މިނިސްޓަރު
އަންނަ ހުކުރު ދުވަހު އިދިކޮޅުން ބޭއްވުމަށް ރާވާފައިވާ ހަރަކާތުގައި ގަނޫނާއި ޚިލާފު އެއްވެސް ކަމަކަށް ޖާގަ ނުދެއްވާނެ ކަމުގައި ހޯމް މިނިސްޓަރު އިމްރާން އަބްދުﷲ ވިދާޅުވެއްޖެއެވެ.
ހޯމަ ދުވަހު ރައްޔިތުންގެ މަޖިލީހުގައި މެދުހެންވޭރު ދާއިރާގެ މެމްބަރު އަލީ އާޒިމް ކުރެއްވި ސުވާލަށް ޖަވާބުދެއްވަމުން މިނިސްޓަރު ވިދާޅުވީ، އިދިކޮޅު ފަރާތްތަކުން ހިންގާ "އިންޑިޔާ އައުޓް" ހަރަކާތާއި ގުޅިގެން ޤާނޫނުގެ ތެރެއިން އަޅަން ޖެހޭ ފިޔަވަޅުތައް މިހާރުވެސް ފުލުހުން އަޅަމުން ގެންދާކަމަށެވެ. އަންނަ ހުކުރު ދުވަހުވެސް އެފަދަ ހަރަކާތެއް ހިންގާކަމުގެ މައުލޫމާތު ލިބުމާއި ގުޅިގެން އެހަރަކާތް ހިންގާ ފަރާތްތަކާއި ބައްދަލުކޮށް ގާނޫނާއި ޚިލާފު އެއްވެސް ހަރަކާތެއް ހިންގުމަށް ފުލުހުން ޖާގަ ނުދޭނެކަމަށް ދަންނަވާފައިވާނެކަމަށް މިނިސްޓަރު ވިދާޅުވިއެވެ.
ހޯމް މިނިސްޓަރު އިމްރާން ވިދާޅުވީ، މިމައްސަލައިގައި މިހާރުވެސް މަޖިލީހުގެ 241 ކޮމެޓީއާއެކު މަސައްކަތްތަކެއް ކުރައްވަމުން އަންނަ ކަމަށެވެ.
މިހާރު ކުރަމުންދާ ބައެއް މުޒާހަރާތަކުގައި ބޭނުން ކުރާ ޝިއާރުތަކަކީ އާންމު އިޖުތިމާއީ މިންގަނޑާއި ޚިލާފު ޝިއާރުތަކެއް ކަމަށާއި، "އިންޑިޔާ އައުޓް" ޝިއާރަކީ އާންމު އިޖުތިމާއި މިންގަނޑާއި ޚިލާފު ޝިއާރެއް ނޫންކަމަށް ފުލުހުން ދެކޭތޯ، ރައްޔިތުންގެ މަޖިލީހުގެ ރައީސް މުހައްމަދު ނަޝީދުވެސް ޖަލްސާގައި ސުވާލު އުފެއްދެވިއެވެ.
އިދިކޮޅުން ހިންގަމުން އަންނަ "އިންޑިޔާ އައުޓް" ހަރަކާތުން ގައުމީ ސަލާމަތަށް އޮތް ނުރައްކާ ބެލުމަށް 241 ކޮމިޓީން ކުރިއަށް ގެންދިޔަ ދިރާސާއަށް މައުލޫމާތު ދެއްވުމަށް ކޮމިޓީއަށް ވަޑައިގެން ހޯމް މިނިސްޓަރު އިމްރާންވެސް ވިދާޅުވެފައިވަނީ، ރާއްޖެއަކީ ހުޅުވިފައި އޮތް ޑިމޮކްރެޓިކް ވެއްޓެއްކަމަށްވާތީ، ޚިޔާލު ފާޅުކުރުމުގެ ފުރުސަތު އިދިކޮޅަށްވެސް އޮންނާނެ ކަމަށެވެ. ކޮންމެ އަމަލަކީ ޓެރަރިޒަމްގެ އަމަލެއް ކަމަށްބަލައި ތަހުގީގުކޮށް ހުކުމް ކުރުމަކީ ރާއްޖެފަދަ ޑިމޮކްރެޓިކް ވެއްޓެއްގައި ކުރަން ބޭނުންވާ ކަމެއް ނޫންކަމަށް އިމްރާން ވިދާޅުވެފައިވެއެވެ.
ހަމަަ އެބައްދަލުވުމުގައި ފުލުހުންގެ ކޮމިޝަނަރު މުހައްމަދު ހަމީދު ވިދާޅުވެފައިވަނީ "އިންޑިޔާ އައުޓް" ހަރަކާތުން ރައްޔިތުންގެ ރައްކާތެރިކަމުގެ އިތުރަށް ގައުމުގެ ދާޚިލީ ސަލާމަތަށްވެސް ނުރައްކާ އެބައޮތްކަމަށެވެ. މިފަދަ ހަރަކާތްތަކުން ދިމާވެދޭނެ ނުރައްކަލަކުން ރައްޔިތުންނާއި ގައުމުގެ ސަލާމަތްކަން ކަށަވަރުކުރުމަށްޓަކައި ފުލުހުންނަށްވެސް ތަފާތު ގޮންޖެހުންތައް ކުރިމަތިވާކަން ފާހަގަކުރައްވައި ސީޕީ ހަމީދު ވިދާޅުވެފައިވަނީ، ނުރައްކާތެރި ކުށްތަކަށް އަރައިގަންނަ މީހުން މި ހަރަކާތުގައި ބައިވެރިކޮށް ވަކި މަގްސަދެއް ހާސިލްކުރުމަށް މަސައްކަތް ކުރާ ކަމަށެވެ.
