ކޮވިޑުގެ ހާލަތުގައި ސިފައިން ކުރި މަސައްކަތަށް މެޑަލް ދޭން ނިންމައިފި

ކޮވިޑުގެ ހާލަތުގައި ސިފައިން ކުރި މަސައްކަތަށް މެޑަލް ދެއްވަން ޑިފެންސް މިނިސްޓަރު މާރިޔާ އަހްމަދު ދީދީ ނިންމަވައިފިއެވެ.

އެމްއެންޑީއެފުން ބުނީ ކޮވިޑް-19ގެ ހާލަތުގައި ސިފައިން ކުރި މިންނެތް މަސައްކަތާއި ދިވެހި ޤައުމާއި ރައްޔިތުންނަށް ކޮށްދިން އިޚްލާޞްތެރި ޚިދުމަތުގެ އަގުވަޒަންކޮށް، ސިފައިންނަށް "އިންސާނީ ޚިދުމަތުގެ މެޑެލި-ކޮވިޑް19" ދިނުމަށް މިނިސްޓަރު ނިންމަވާފައިވާ ކަމަށެވެ. އެހެންނަމަވެސް މި މެޑަލް ދިނުމަށް ނިންމާފައިވާ ގޮތުގެ ތަފްސީލު ހާމަކޮށްފައެއް ނުވެއެވެ.

ކޮވިޑުގެ ހާލަތު އެންމެ ގޯސްވި ދުވަސްވަރު ފެސިލިޓީތައް ގާއިމު ކުރުމާއި ބަލި މީހުން އުފުލާއި ކަރަންޓީން ފެސިލިޓީތައް ބެލެހެއްޓީ ސިފައިންނެވެ.

ކޮވިޑް-19 އާއި ގުޅިގެން ސަރުކާރުން ވަނީ ނޭޝަނަލް އެމަޖެންސީ އޮޕަރޭޝަން ސެންޓަރ (އެންއީއޯސީ) ގެ ނަމުގައި ސެންޓަރެއް އުފައްދައިގެން މަސައްކަތްކޮށްފައެވެ. ނަމަވެސް 2020 ވަނަ ޖުލައި މަހުގެ 1 ވަނަ ދުވަހު ސަރުކާރުން ވަނީ އެންއީއޯސީ އުވާލާ، އެތަނުގެ ދަށުން ކުރަމުންގެންދިޔަ މަސައްކަތްތައް އެޗްއީއޯސީގެ ދަށަށް ބަދަލުކޮށްފައެވެ.