ތިނަދޫ އިން މީހުން ބޭލި ހާދިސާގެ ޕަބްލިކް ހިޔަރިންގ ތައް ހޮނިހިރު ދުވަހު ފަށަނީ
ގދ. ތިނަދޫން މީހުން ބޭލި މައްސަލައިގެ ތަހުގީގު ނިމުމުން 2 މަސް ތެރޭގައި ރިޕޯޓު އާންމުކުރާނެ
ގދ. ތިނަދޫ
ގދ. ތިނަދޫއިން މީހުން ބޭލި ހާދިސާ އާއި ގުޅިގެން ބާއްވާ ޕަބްލިކް ހިޔަރިންގ ހޮނިހިރު ދުވަހު ފެށުމަށް ހަމަޖެހިފައިވާކަމަށް އިންތިޤާލީ އިންސާފުގެ އޮމްބަޑްސްޕަރސަންގެ އޮފީހުން ބުނެފިއެވެ.
ޕަބްލިކް ހިޔަރިންގ ގައި ދޭ ބަޔާންތައް އަޑުއެހުމުގެ ފުރުސަތު އާންމުކޮށް ވަނީ ހުޅުވާލާފައެވެ. ޕަބްލިކް ހިޔަރިންގ އޮންނާނީ މަރޗް 19އިން 22އަށް އެމް.އެން.ޔޫ ގދ ތިނަދޫ ކެމްޕަހުގައެވެ. ޕަބްލިކް ހިޔަރިންގ އޮންނާނީ ކޮންމެ ދުވަހަކު ހެނދުނު 9:00ން 12:00އަށް އަދި މެންދުރު 14:30ން 18:00އަށެވެ.
މިމައްސަލައާ ގުޅިގެން މާލޭގައި ބާއްވާ ޕަބްލިކް ހިޔަރިންގ އޮންނާނީ މިމަހުގެ 27 ވަނަ ދުވަހުއެވެ.
މިކަމާއި ގުޅޭގޮތުން ރާއްޖެޓީވީގެ ފަލަސުރުޙީ ޕްރޮގްރާމްގައި ވާހަކަ ދައްކަވަމުން އޮމްބަޑްސްޕަރސަން ޖިހާދާ އަނީސް ވިދާޅުވީ، ޕަބްލިކް ހިއަރިންގ ގެ ދަށުން ހޯދާ މައުލޫމާތުތަކަށްފަހު އެ އޮފީހުން މައްސަލައިގެ ތަހުގީގާއި ގުޅޭ ކަންކަން ކުރިއަށް ގެންދާނެ ކަމަށެވެ. އަދި ތަހުގީގުން ހޯދޭ މައުލޫމާތުތަކުގެ އަލީގައި މައްސަލައިގެ ހޯދުންތައް ފާހަގަކޮށް ނިންމުމަކާއި ހަމައަށް ދިއުމުން، މި މައްސަލަތަކާއި ގުޅޭ ދިރާސާތަކެއްވެސް ހައްދަވާނެކަމަށް ޖިހާދާ ވިދާޅުވިއެވެ. އެއަށްފަހު މުޅި މައްސަލައިގެ ހޯދުންތަކުގެ މައްޗަށް ރިޕޯޓު އެކުލަވާލައި، އޮންނަ އުސޫލުގެ ތެރެއިން އާންމު ކުރައްވާނެކަމަށް ޖިހާދާ ވިދާޅުވިއެވެ. އެގޮތުން ގދ. ތިނަދޫން މީހުން ބޭލި މައްސަލައިގެ ތަހުގީގު ނިމުމުން 2 މަސްދުވަހުގެ ތެރޭގައި ރިޕޯޓު އާންމުކުރާނެކަމަށް ޖިހާދާ ވިދާޅުވިއެވެ.
ޖިހާދާ ވިދާޅުވީ، ތަހުގީގުތަކުގެ އަލީގައި ހޯދާ ހޯދުންތަކަށްފަހު، އެފަދަ ކަމެއް ދެވަނަ ފަހަރަށް ތަކުރާރުވިޔަ ނުދިނުމަށް އެޅިދާނެ ފިޔަވަޅުތަކާއި ގުޅޭގޮތުން އެ އޮފީހުން ކަމާގުޅުންހުރި އިދާރާތަކަށް ރެކޮމެންޑޭޝަންތައް ދޭނެ ކަމަށެވެ. އެ ރެކޮމެންޑޭޝަންތައް މައްސަލައިގެ ރިޕޯޓުގައިވެސް ހިމަނުއްވާނެކަން އޭނާ ފާހަގަ ކުރެއްވިއެވެ.
