ލުތުފަރުގެ މަރު: ޝަރީއަތުގެ މަރުޙަލާ ފެށުން މާރޗު 28 ގައި
17 މާރިޗު 2022 | ބުރާސްފަތި 05:51ލުތުފަރަކީ ވެސް ރާއްޖޭގައި ގަވައިދާ ހިލާފަށް އުޅުނު ބިދޭސީއެއް
ލުތުފަރު މަރާލި މައްސަލައިގައި އެނގިހުރެ މީހަކު މެރުމުގެ ކުށުގެ ދައުވާ އުފުލާފައިވާ އަލަމިން އާއި ނޫރުލްއިސްލާމް
ށ. ޅައިމަގު "ކުރިމަގު 1'' ބޯޓުން ގެއްލުނު ލުތުފަރު މަރާލި މައްސަލައިގެ އަޑުއެހުމެއް ބުރާސްފަތި ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
ކްރިމިނަލް ކޯޓުގައި މި މައްސަލަ ބައްލަވަނީ ގާޒީ ހުސައިން ފާއިޒު ރަޝާދެވެ.
ލުތުފަރު މަރާލި މައްސަލައިގައި ބުރާސްފަތި ދުވަހު ތާވަލު ކޮށްފައިވަނީ އެނގިހުރެ މީހަކު މެރުމުގެ ކުށުގެ ދައުވާ އުފުލާފައިވާ އަލަމިން އާއި ނޫރުލްއިސްލާމްގެ މައްޗަށެވެ. މި މައްސަލައިގައި އެންމެ ފަހުން އަޑުއެހުމެއް ތާވަލު ކޮށްފައިވަނީ 10 މާރޗު 2022 ގައެވެ. ނަމަވެސް އެމީހުންގެ އައު ވަކީލުންނަށް ލިޔެކިޔުންތައް ލިބިފައިނުވާތީ އަޑުއެހުން ކުރިއަށް ގެންގޮސްފައެއް ނުވެއެވެ.
މި މައްސަލައިގައި އިބްތިދާއީ މަރުޙަލާ މިހާރު ވަނީ ނިމިފައެވެ. އަދި ކުރިއަށް އޮތީ ޝަރީއަތް ފެށުމާއި ހެކިބަސް ނެގުމެވެ.
އެ މީހުންގެ މައްޗަށް އިއްވި ދައުވާގައި ބުނެފައިވަނީ، އަލަމިނާއި އިތުރު ދެމީހަކާއެކު 21 އޭޕްރީލް 2019 ވަނަ ދުވަހު 21:30 އެހާކަންހާއިރު، އެމީހުން މަސައްކަތްކުރާ ށ. ޅައިމަގު "ކުރިމަގު 1" ބޯޓުގައި ކައްކާއެއްގެ ގޮތުގައި މަސައްކަތްކުރި ބަންގްލަދޭޝްގެ ރައްޔިތެއްކަމުގައިވާ ލުތުފަރު ރަހްމާނު މަރާލުމަށްފަހު ށ. ޅައިމަގު ބަނދަރާއި ދިމާލު ބޭރުން ގާތްގަނޑަކަށް 200 ވަރަކަށް ފޫޓު ދުރު ހިސާބަށް ލުތުފަރުގެ ހަށިގަނޑު ކަނޑުފައްތާފައިވާކަމަށް އިއުތިރާފްވެފައިވާ ކަމަށެވެ.
ބުރާސްފަތި ދުވަހުގެ އަޑުއެހުމުގައި މި މައްސަލައިގެ ދިފާއީ ވަކީލުން ވިދާޅުވީ، މައްސަލައިގެ ބައެއް ލިޔެކިޔުންތައް ނުލިބޭ ކަމަށާއި، ލިޔެކިޔުންތައް ބޭނުންވާ ކަމަށެވެ. ލިޔެކިޔުންތައް ހޯދުމަށް މަސައްކަތްތަކެއް ކުރެވިފައިވާކަމަށް ދިފާއީ ވަކީލުން ވިދާޅުވިއެވެ.
ނޫރުލްއިސްލާމްގެ ވަކީލުވެސް ވަނީ މި މައްސަލަ ގޮސްފައިވާ ހިސާބު ސާފުކުރުމަށް ބޭނުންވާ ކަމާއި، ލިޔެކިޔުންތައް ބޭނުންވާކަން ފާހަގަ ކޮށްފައެވެ. ވުމާއެކު، މައްސަލަ ބައްލަވާ ގާޒީ ވަނީ ލިޔެކިޔުންތައް ހަމަ ކުރުމަށް ފުރުސަތެއް ދެއްވުމަށްފަހު މައްސަލައިގެ އަޑުއެހުންތައް ކުރިއަށް ގެންދިއުމަށް ނިންމަވާފައެވެ.
ގާޒީ ވަނީ މިހިނގާ މާރޗު މަހުގެ 28 ވަނަ ދުވަހުގެ މެންދުރު 14:00ށް އަޑުއެހުމެއް ތާވަލު ކުރައްވާފައެވެ. އެ ދުވަހު އޮންނާނީ ޝަރީއަތް ފަށައި، ހެކިންގެ ހެކިބަސް ނެގުމެވެ. ދައުލަތުން ވަނީ 14 ޝަފަވީ ހެއްކެއް ހުށައަޅާފައެވެ.
ލުތުފަރު މަރާލިކަމަށް އެމީހުން އިއުތިރާފްވެފައިވަނީ، މި މައްސަލާގައި ފުލުހުން ހިންގި ތަހުގީގުގައެވެ.
ލުތުފަރުގެ މަރުގެ މައްސަލައިގެ ތަހުޤީޤްގެ ތަފްސީލްތައް ހާމަކުރުމަށް އިސްކަންދަރުކޮށީގައި 16 މެއި 2016 ވަނަ ދުވަހު ބޭޭއްވި ނޫސްވެރިންގެ ބައްދަލުވުމުގައި ފުލުހުން ބުނެފައިވަނީ، ލުތުފަރު މަރާލައިފައިވަނީ ބޯޓުގައި ހުރި އިތުރު ބިދޭސީއަކާއެކު އެއް ޖިންސުން ގުޅުން ހިންގުމަށް މަސައްކަތް ކުރުމުން ކަމަށް އެމީހުން ތަހުޤީޤުގައި ބުނެފައިވާ ކަމަށެވެ.
އަދި ބޯޓު ތެރޭގައި ޖިިންސީ ގުޅުން ހިންގުމަށް މަސައްކަތް ކުރުމުން ތިން ބިދޭސީއަކު ވެގެން ލުތުފަރުގެ ނޭވާ ހާސްކޮށް މަރާލީކަމުގައި ތަހުޤީޤަށް އެނގިފައިވާ ކަމަށެވެ.
