އަމިއްލަ ކުންފުނިތަކާއި ހަވާލުކޮށްގެން ނުވާނަމަ ދައުލަތުގެ ބަޖެޓުންވެސް އެއާރޕޯޓްތައް އަޅާނެ

އަމިއްލަ ކުންފުނިތަކާއި ހަވާލުކޮށްގެން ނުވާނަމަ ދައުލަތުގެ ބަޖެޓުންވެސް އެއާރޕޯޓްތައް އަޅާނެ ކަމަށް މިނިސްޓަރ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ މުޙައްމަދު އަސްލަމް ވިދާޅުވެއްޖެއެވެ.

މެމްބަރުން ކުރެއްވި ސުވާލުތަކަށް ޖަވާބުދެއްވަމުން އަސްލަމް ވިދާޅުވީ މިހާރު ސަރުކާރުން އިއުލާންކޮށްފައިވާ އެއާރޕޯޓްތައް އެޅުމުގެ މަސައްކަތް އެއް މޮޑެލްއިން ފެއިލްވެއްޖެނަމަ އަނެއް މޮޑެލްއެއް ބޭނުންކޮށްގެންވެސް ކުރިއަށް ގެންދާނެ ކަމަށެވެ. އަމާޒަކީ މި އަހަރުގެ ތެރޭގައި 2 އެއަރޕޯޓް ހުޅުވުން ކަމަށެވެ. މިހާރު ހުށަހެޅިފައިވާ ޕްރޮޕޯސަލުތަކުން އެގްރީމެންޓަކާއި ހަމައަށް އަދެވޭ ވަރުގެ ޕްރޮޕޯސަލެއް އަދި ނެތް ކަމަށް އަސްލަމް ވިދާޅުވިއެވެ.

މަގޫދޫ އެއަރޕޯޓް އަންނަ އަހަރު ނިމުމުގެ ކުރިން އޮޕަރޭޓްކުރަން ފަށާނެ ކަމަށްވެސް ވިދާޅުވިއެވެ.

މީގެއިތުރުން ރ. އަތޮޅު ދެކުނުގައި އެއާރޕޯޓް އަޅާނެ ރަށެއް އަދި ނިންމާފައި ނުވާކަމަށާއި ޕޮލިސީ ލެވެލްގައި އެމަޝްވަރާތައް ކުރިއަށް ދާކަމުގައިވެސް އަސްލަމް ވިދާޅުވިއެވެ.

ޕްލޭނިންގ މިނިސްޓްރީން ބުނެފައިވަނީ މިއިން ކޮންމެ އެއާރޕޯޓަކީ ވަކި މަޝްރޫއެއް ކަމަށެވެ. ޝައުގުވެރިކަން ފާޅުކުރުމުގައި، މުޅި އެއާރޕޯޓް ތަރައްގީކުރުމަށް ބޭނުންވާ ފައިނޭންސް، ނުވަތަ އެއިން ބައެއް, ފައިނޭންސް ކުރުމަށް ހުށަހެޅިދާނެއެވެ. އެއާރޕޯޓް ތަރައްގީ ފައިނޭންސްކުރުމަށް ހުށަހަޅާ އިންވެސްޓްމަންޓް އަދަދު، އެ މަޝްރޫއެއްގެ މުގާބިލުގައި، ފަތުރުވެރިކަމަށް ކުއްޔަށް ދޫކުރާނެ ރަށް ނުވަތަ ބިން ނުވަތަ ފަޅުގެ އެކުއިޒިޝަން ކޮސްޓް އަދި އެތަނެއްގެ ބިމު ކުލީގެ ގޮތުގައި ކަނޑައެޅޭ ފައިސާގެ އަދަދާ އަޅައި, ކަނޑައިދެވޭނެއެވެ.

އެއާރޕޯޓްތަކުގެ ޖުމްލަ އަދަދު 133،900،000 (ސަތޭކަ ތިރީސްތިން މިލިއަން ނުވަދިހަ ހާސް) ޑޮލަރަށް އަރައެވެ. އެއީ ދިވެހި ރުފިޔާއިންނަމަ 2 ބިލިއަން ރުފިޔާއެވެ.

ރާއްޖޭގެ 6 ރަށެއްގައި އެއާރޕޯޓް ތަރައްގީކުރާނެ ބަޔަކު ހޯދުމަށް ޕްލޭނިންގ މިނިސްޓްރީން ކުރިން ކުރި އިއުލާންގައިވާ, މަދުވެގެން ހުށަހެޅޭ ކަމަށް ބަޔާންކޮށްފައިވާ 5 މިލިއަން ޑޮލަރު، 3 މިލިއަނަށް ކުޑަކުރުމަށްފަހު އެ އެއާރޕޯޓްތައް ތަރައްގީކުރުމަށް އަލުން ހުޅުވާލާފައިވަނީ ފެބްރުއަރީ މަހުގައެވެ.