މާލެއަށް މިފަހަރު އެރި ވެލާ ބިސް އަޅައިފި
ވެލާ ބިސްއަޅާފައިވަނީ އަންގާރަ ދުވަހުގެ ރޭ ދަންވަރުގެ ވަގުތެއްގައި
ބުރިޖާ ދިމާލުން މާލޭގެ އިރު ދެކުނު ފަރާތު ގޮނޑުދޮށަށް ވެލައެއް އަރައި ބިސް އެޅުން
މާލެ ސިނަމާލެ ބްރިޖް ސަރަހައްދަށް އަންގާރަ ދުވަހުގެ ރޭ އެރި ވެލާ ބިސްއަޅައިފިއެވެ.
ވެލާ އެސަރަހައްދަށް އެރުމާއެކު ފުލުހުން ވަނީ އެސަރަހައްދު ކޯޑަން ކޮށްފައެވެ. ވެލާ ބިސްއަޅާފައިވަނީ އަންގާރަ ދުވަހުގެ ރޭ ދަންވަރުގެ ވަގުތެއްގައެވެ. ވެލާ ބިސްއެޅުމަށްފަހު މިހާރު ވަނީ ފައިބައިގެން ގޮސްފައެވެ. ފުލުހުން އަންނަނީ މިހާރުވެސް އެސަރަހައްދު ބަލަހައްޓަމުންނެވެ.
ރާއްޖެއެމްވީއަށް މައުލޫމާތު ދެމުން އެންވަޔަރަމަންޓް މިނިސްޓްރީން ބުނީ ވެލާ ބިސްތައް އީޕީއޭގެ ބެލެމުގެ ދަށުން ހެޗަރީއަކަށް ގެންދާނެ ކަމަށެވެ. އަދި ބިސް ފީ ކުރާނީ ވެސް އީޕީއޭގެ ބެލުމުގެ ދަށުން ކަމަށެވެ.
މީގެ ކުރީން ފެބްރުއަރީ 27 ގައިވެސް މާލެއަށް ވަނީ ވެލާ އަރާފައެވެ. ނަމަވެސް އެފަހަރު ވަނީ ފުލުހުން އެވެލާ މޫދަށް ބާލާފައެވެ. އެކަމާއި ގުޅިގެން ގިނަ ބަޔެއްގެ ފާޑުކިޔުންތައްވެސް އަމާޒުވެފައިވެއެވެ.
އީޕީއޭއިން ވަނީ އެވެލެއަށް ހިމާޔަތްދިނުމަށް ފުލުހުންނަށް އަންގާފައެވެ. އަދި ވެލާ ބިސް އަޅަންދެން ފޮޓޯ ނަގަން އެސަރަހައްދަށް ނުދިޔުމަށް އިލްތިމާސްކޮށްފައިވެއެވެ. ނަމަވެސް ގިނަ ބަޔަކު އެސަރަހައްދަށް އެއްވެ ވިލާގެ ފޮޓޯ ނަގާފައިވެއެވެ.
