ބަދަލުތަކަކާއެކު އެސްޓީއޯ ޕީޕަލްސް ޗޮއިސް ރަސްމީކޮށް ހުޅުވައިފި
އެސްޓީއޯ ޕީޕަލްސް ޗޮއިސް އިން އެއް ފުރާޅެއްގެ ދަށުން ފަސެހައިން ވިޔަފާރިކޮށްލެވޭނެ
އެސްޓީއޯ ޕީޕަލްސް ޗޮއިސް ރަސްމީކޮށް ހުޅުވުން
ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) ޕީޕަލްސް ޗޮއިސް ފިހާރަ ރަސްމީކޮށް ހުޅުވައިފިއެވެ.
އެސްޓީއޯ ޕީޕަލްސް ޗޮއިސް ފިހާރަ ރަސްމީކޮށް ހުޅުވައިދެއްވީ ރައީސުލްޖުމްހޫރިއްޔާގެ ނާއިބު ފައިސަލް ނަސީމް އެވެ. މި ރަސްމިއްޔާތުގައި ދައުލަތުގެ ބައެއް އިދާރާތަކުގެ އިސްވެރިން ވަނީ ބައިވެރިވެވަޑައިގެންފައެވެ.
ގިނަ ބަދަލުތަކަކާއެކު އެސްޓީއޯ ޕީޕަލްސް ޗޮއިސް ހުޅުވާފައިވަނީ އެސްޓީއޯ ޓްރޭޑް ސެންޓަރު މީގެ ކުރިންވެސް ހުރި އިމާރާތުގައެވެ. މިހާރު ގެނެސްފައިވާ ބަދަލުތަކުގެ ދަށުން، އެސްޓީއޯ ޕީޕަލްސް ޗޮއިސް އިން، ހޯމް އިމްޕްރޫވްމެންޓުގައި ވިއްކާ އިލެކްޓްރޯނިކް ސާމާނާއި، ސުޕަރމާޓުން ލިބެން ހުންނަ ތަކެތި އެއް ފުރާޅެއްގެ ދަށުން ލިބޭނެއެވެ. އަދި އެއް ފުރާޅެއްގެ ދަށުން ވިޔަފާރި ކުރުމަށް އިތުރަށް ފަސޭހަވެގެންދާނެއެވެ.
ކުދި އަދި މެދުފަންތީގެ ވިޔަފާރި ކުރިއެރުވުމަށް ޕީޕަލްސް ޗޮއިސްގެ ތެރެއިން އެހެން ވިޔަފާރިތަކަށް ސްޓޯލްތައް ދޫކުރުމުގެ މަސައްކަތްވެސް އެސްޓީއޯއިން ވަނީ ފަށާފައެވެ. މިގޮތުން މިހާރުވެސް ވަނީ ސްޓޭޝަނަރީ ޕަރފިއުމް އަދި ކޮސްމެޓިކްސްފަދަ ވިޔަފާރި ކުރާ ފަރާތްތަކަށް ސްޓޯލްތައް ދޫކޮށްފައެވެ. މިގޮތުން ނޯޓް ކޮސްމެޓިކްސް، މެކްސްކޮމް، ޕޮއިސް، ސިޓީ ބޭކަރީ ފަދަ ވިޔަފާރިތަކަށް ދޫކޮށްފައިވާ ސްޓޯލްތައް ފާހަގަކުރެވެއެވެ.
އެސްޓީއޯ ޕީޕަލްސް ޗޮއިސް ހުޅުވައިދެއްވައި ވާހަކަދައްކަވަމުން ނާއިބު ރައީސް ފައިސަލް ނަސީމް ވިދާޅުވީ އެސްޓީއޯއަކީ އަބަދުވެސް ރައްޔިތުންނަށް އެންމެ ބޭނުންވާ ތަކެތި ފޯރުކޮށްދޭ އެއްކުންފުނި ކަމަށެވެ. އެސްޓީއޯ ޕީޕަލްސް ޗޮއިސް މިއަދު ފެނިގެންދަނީ ވަރަށް ތަފާތު ގޮތަކަށް ކަމަށާއި، އަދި އެހެނިހެން ވިޔަފާރިވެރިންނަށް އެސްޓީއޯއާއެކު ޕާޓްނަރޝިޕް ހަދައިގެން ކުރިއަށްގެންދެވޭނެ މަގު ފަހިވެފައިވާކަމަށް ނާއިބުރައީސް ވިދާޅުވިއެވެ.
ނާއިބުރައީސް ވިދާޅުވީ ޕްރައިވެޓް ސެކްޓަރ ރަނގަޅުކުރުމަށް ވަރަށް ގިނަ ގުނަ މަސައްކަތްތަކެއް ކުރަންޖެހޭ ކަމަށާއި، އިގްތިސާދެއް ކުރިއަރައި ދާނީ ޕްރައިވެޓް ސެކްޓަރއާވެސް ގުޅިގެން ކުރެވޭ މަސައްކަތުން ކަމަަށެވެ.
ނާއިބުރައީސް ވަނީ ކޮވިޑް-19 ޕެންޑަމިކުގެ ތެރޭގައި އެސްޓީއޯއިން ކޮށްފައިވާ މުހިންމު މަސައްކަތްތައް ފާހަގަކުރައްވާފައެވެ. މިގޮތުން ބޭހާއި، ކާޑުގެ ބާވަތްތަކާއި، ގޭސް ފަދަ ތަކެތި އެސްޓީއޯއިން ފޯރުކޮށްދީފައިވާކަމަށް ނާއިބުރައީސް ފާހަގަ ކުރެއްވިއެވެ. އަދި ކުރިއަށް އޮތް ރަމަޟާން މަހުވެސް ރައްޔިތުންނަށް ފަސޭހަވާނެ ގޮތަކަށް ކަންތައްތައް ބައްޓަންވެގެންދާނެކަމަށް އުންމީދުކުރައްވާކަމަށް ނާއިބުރައީސް ވިދާޅުވިއެވެ. އަދި ތަކެތީގެ އަގު އުފުލިގެން ނުދާނެ ގޮތަކަށް ކަންތައްތައް ރޭވިގެންދާނެ ކަމަށް އުންމީދުކުރައްވާކަމަށް ނާއިބުރައީސް ވިދާޅުވިއެވެ.
