ހޮނިހިރު ދުވަހުގެ ރޭ އައްޑޫ ހިތަދޫ ކަނޑުއޮޅިއަށް ބަންޑުން ޖަހާލި ކަމަށް ބުނި ނަމަވެސް އެކަން އަދި ކަށަވަރު ނުވާ ކަމަށް ފުލުހުން ބުނެފި އެވެ.
ފުލުހުންގެ ތަރުޖަމާނު އަހްމަދު ޝިފާނު ވިދާޅުވީ ޑިންގީން ސަލާމަތްވި ދެ މީހުންގެ ބަޔާން ނަގާފައިވާ ކަމަށާއި އެ ދެމީހުންގެ ބަޔާނުން ޑިންގީ ބަންޑުން ޖަހާލިކަން ކަށަވަރު ނުވާ ކަމަށެވެ. އެކަން ކަށަވަރުނުކުރެވެނީ ޝިފާނު ވިދާޅުވި ގޮތުގައި ޑިންގީގައި ސާމާނުތައް ހުރުމުން ކަމަށެވެ.
ޑިންގީ ބަންޑުން ޖަހާލުމުން ގެއްލުނު ފުލުސް މީހާ މުހައްމަދު ސުމައިދު، އާބިން، ހިތަދޫ، ހޯދުމުގެ މަސައްކަތް މިހާރު ވެސް ދަނީ ކުރަމުންނެވެ.
ސުމައިދުގެ އާއިލާއިން އަވަސް ނޫހަށް ބުނެފައިވަނީ އޭނާ ގެއްލިފައިވަނީ ޑިންގީ ބަންޑުން ޖަހާލައިގެން ކަމަށް ނުބެލެވޭކަމަށެވެ. އަދި ޑިންގީގައި މަހަށް ދިޔަ ތިން މީހުން ރޯދަ ވިއްލުމަށް ގެންދިޔަ ތަކެތި ވެސް އެ ޑިންގީ ގެނައި އިރު ހުރި ކަމަށާއި އެ ޑިންގީއަކީ އެއްގަމުގައި ވެސް ތިން މީހުންނަށް ވެސް ފުށުން ނުޖެހޭނެ ޑިންގީއެއް ކަމަށް އާއިލާއިން ވަނީ ބުނެފައެވެ.
ސުމެއިދު ގެއްލުނުތާ 24 ވެފައިވާއިރު އޭނާގެ އެއްވެސް ޚަބަރެއް އަދި މިހާތަނަށް ލިބިފައެއް ނުވެއެވެ. އޭނާ ހޯދުމުގެ މަސައްކަތް ވައިމަގުންނާއި ޑައިވަރުން ބޭނުންކޮށްގެން ދަނީ ކުރަމުންނެވެ. އެމްއެންޑީއެފުން މީގެ ކުރިން ބުނެފައިވަނީ ސުމައިދުގެ ފޯނު ފެނިފައިވާ ކަމަށެވެ.
ޑިންގީ ބަނޑުން ޖަހާލި ކަމަށް ބުނާއިރު ޑިންގީގައި ތިބީ ތިން ދިވެހިންނެވެ. އެ މީހުންގެ ތެރެއިން ސަލާމަތްވީ ފޭދޫ ފަހާގޭ ހުސައިން ސައިދު އާއި ފޭދޫ ބެންހާގޭ އަހްމަދު ނާއިފު އެވެ.
