ކޯޓުން ބޭރުން ލިބޭ މައުލޫމާތަށް ބަލައި ފަނޑިޔާރުން ޙުކުމް ކޮށްގެން ނުވާނެ: ޝުޖޫން

ފަނޑިޔާރުން ގޮތް ނިންމަވަން ޖެހިވަޑައިގަންނަވާނީ ހުށައެޅޭ ޤާނޫނީ ނުކުތާތަކުގެ މައްޗަށް ކަމަށާއި، ކޯޓުން ބޭރުން ލިބޭ މައުލޫމާތަށް ބަލައި ފަނޑިޔާރުން ޙުކުމް ކޮށްގެން ނުވާނެކަމަށް ސުޕްރީމް ކޯޓުގެ ފަނޑިޔާރު އައިޝާ ޝުޖޫން މުޙައްމަދު ވިދާޅުވެއްޖެއެވެ.

ސިވިލް ކޯޓަށް އަލަށް އައްޔަނު ކުރެއްވި ފަނޑިޔާރުން ހުވާ ކުރެއްވުމުގެ ރަސްމިއްޔާތުގައި ވާހަކަ ދައްކަވަމުން ފަނޑިޔާރު ޝުޖޫން ވިދާޅުވީ، ފަނޑިޔާރުކަމަކީ މީހުންގެ ޙައްޤުތަކާއި ގުޅިފައިވާ، އެކަނިވެރި، އަދި ބުރަބޮޑު މަސައްކަތެއް ކަމަށެވެ. މިއީ ހަމައެކަނި އަމިއްލަ ކުރިއެރުމާއި މަންފާއަށް އެދިގެން ކުރެވޭ ބާވަތުގެ ކަމެއް ނޫންކަންވެސް ފަނޑިޔާރު ޝުޖޫން ފާހަގަ ކުރެއްވިއެވެ.

ފަނޑިޔާރުކަމަކީ ކަން ކުރެވޭ ގޮތުން މީހުންގެ އިހުތިރާމާއި އިތުބާރު ލިބޭ، އަދި ހިތްހަމަ ނުޖެހުމާއި ބަދު ބަސްވެސް ރައްދުވާ ކަމެއްކަން ފާހަގަ ކުރައްވައި ޝުޖޫން އިތުރަށް ވިދާޅުވީ، ފަނޑިޔާރުން މަސައްކަތް ކުރަންވާނީ ނުހަނު ފަރުވާތެރިކަމާއެކު ކަމަށެވެ. އެކަމަށްޓަކައި ވަގުތާއި މަސައްކަތް މެނޭޖްކޮށް، ތިމާއަކީ ޚިދުމަތްތެރިއެއްކަން ދަނެގެން މަސައްކަތް ކުރަންޖެހޭކަން އޭނާ ފާހަގަކުރެއްވިއެވެ. އަދި ފަނޑިޔާރުން މަސައްކަތް ކުރަންޖެހޭނީ ވަކި ކޮޅަކަށް ބުރަ ނުވެ، ހަމަހަމަކަން މަތީގައި ކަމަށް ޝުޖޫން ފާހަގަކުރެއްވިއެވެ.

ފަނޑިޔާރު ޝުޖޫން ވިދާޅުވީ، ފަނޑިޔާރުން ގޮތް ނިންމަން ޖެހޭނީ ހުށައެޅޭ ޤާނޫނީ ސަބަބުތަކުގެ މައްޗަށް ކަމަށެވެ. އެކަމަށްޓަކައި އަމިއްލަ ނަފްސަށް ބުރަވެވޭ ގޮތެއް ނުވަތަ ކޯޓުން ބޭރުން ލިބޭ މައުލޫމާތަށް ބުރަވެވޭ ގޮތް އޮވެގެން ނުވާނެކަމުގައިވެސް ވިދާޅުވިއެވެ.

ޝުޖޫން ވިދާޅުވީ ފަނޑިޔާރުންގެ ވިސްނުމާއި އަމަލުވެސް ވަކި ގޮތަކަށް ބައްޓަން ކުރަން ޖެހޭ ކަމަށެވެ. އެގޮތުން ވަކީލެއްގެ ޙައިސިއްޔަތުންނާއި ފަނޑިޔާރެއްގެ ޙައިސިއްޔަތުން މަސައްކަތް ކުރާއިރު މަންޒަރު ފެންނަ ގޮތް ގިނަ ފަހަރު ނުހަނު ތަފާތުވެދާނެކަމަށް ވިދާޅުވިއެވެ.

ޝުޖޫން ވިދާޅުވާ ގޮތުގައި ބައެއް ފަހަރު މަޤާމާއި ޙަވާލުވެވަޑައިގަންނަވާއިރު ފަނޑިޔާރުން ތިއްބަވަނީ އެ ހުރިހާ ކަމަކަށް ތައްޔާރަކަށް ނޫނެވެ. އެގޮތުން ނިޒާމުގެ ހުރި ކަންކަމާއި، އެފަދަ އެނޫންވެސް ކަންކަމަށް އަހުލުވެރިވެ، "ޖަޖް މޯޑް އޮންވުމަށް" ވަގުތުކޮޅެއް ނަގާކަމަށް އޭނާ ވިދާޅުވިއެވެ. އެކަމަށްޓަކައި އެހީތެރިކަން ފޯރުކޮށްދެއްވަން ތައްޔާރަށް ތިއްބެވިކަންވެސް ޝުޖޫން ފާހަގަކުރެއްވިއެވެ.

މީގެއިތުރުން، ފަނޑިޔާރުގެއަށް އާންމުން ކުރާ އިތުބާރު ހިފެހެއްޓުމުގައިވެސް ފަނޑިޔާރުންގެ ދައުރު ބޮޑުކަމުގައި ޝުޖޫން ވިދާޅުވިއެވެ.

ފަނޑިޔާރު ޝުޖޫން ވަނީ ސިވިލް ކޯޓަށް އަލަށް އައްޔަނު ކުރެއްވި ފަނޑިޔާރުންނަށް މަރުޙަބާ ވިދާޅުވެފައެވެ. އަންގާރަ ދުވަހު ބޭއްވި މި ރަސްމިއްޔާތުގައި ފަނޑިޔާރު ކަމުގެ ހުވާ ކުރައްވާފައިވަނީ ސ.ފޭދޫ، ފިތިރޯނުގެ، އަލްއުސްތާޛާ ޒުލައިޚާ ޝީޒާ އަދި ގއ.މާމެންދޫ، ފެހިގެ، އަލްއުސްތާޛު އަޙްމަދު ނިމާލް ޖުނައިދުއެވެ.