ރާއްޖެއަށް ޒިޔާރަތްކުރާ ފަތުރުވެރިންގެ އަދަދު މާބޮޑުތަން މަދެއްނުވޭ: ޓަރމިނަލް އޮޕަރޭޝަން ޖެނެރަލް މެނޭޖަރު

ރާއްޖެއަށް ޒިޔާރަތްކުރާ ފަތުރުވެރިންގެ އަދަދު މާބޮޑުތަން މަދުނުވާ ކަމަށް މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް)ގެ ޓަރމިނަލް އޮޕަރޭޝަން ޖެނެރަލް މެނޭޖަރު އިބްރާހީމް ހުސައިން ވިދާޅުވެއްޖެއެވެ.

ރާއްޖެޓީވީގެ ފަށާއިރު ޕްރޮގްރާމަށް ދެއްވި އިންޓަވިޔުގައި އިބްރާހިމް ވިދާޅުވީ, ރާއްޖެއަށް ޒިޔާރަތްކުރި ފަތުރުވެރިންގެ އަދަދު މާބޮޑުތަން ދަށްނުވާކަމަށާއި، ފާއިތު ހަފުތާ ތެރޭގައި ވެސް ގިނަ އަދަދެއް ފަތުރުވެރިން ރާއްޖެއަށް ޒިޔާރަތްކޮށްފައިވާކަމަށެވެ. މިދިޔަ ހޮނިހިރު ދުވަހާއި އާދީއްތަ ދުވަހު ވެސް ރާއްޖެއަށް 7000ށްވުރެ ގިނަ ފަތުރުވެރިން ޒިޔާރަތްކޮށްފައިވާ ކަމަށް އޭނާ ވިދާޅުވިއެވެ.

ކޮންމެ ދުވަހަކު ވެސް 5000ށް ވުރެ ގިނަ ފަތުރުވެރިން ޒިޔާރަތް ކުރާކަން ފާހަގަކުރައްވައި އިބްރާހީމް ވިދާޅުވީ, ޔޫރަޕުން ވެސް ގިނަ އަދަދެއްގެ ފަތުރުވެރިން ރާއްޖެއަށް ޒިޔާރަތް ކުރާ ކަމަށެވެ.

އިބްރާހީމް ވިދާޅުވީ ފިނިމޫސުން 31 މާޗްގައި ނިމޭނެ ކަމަށެވެ. އަދި ރާއްޖެއަށް ޒިޔާރަތް ކުރާ ފަތުރުވެރިންގެ އަދަދު މާބޮޑަށް ދަށް ނުވާނެ ކަމަށެވެ. ނަމަވެސް މޫސުން ނިމުމާއެކު ޔޫރަޕްގެ ޝެޑިއުލްތައް ކޮންމެވެސް ވަރަކަށް މަދުވާނެ ކަމަށް ލަފާކުރެވޭކަމަށް އޭނާ ވިދާޅުވިއެވެ.

ރަޝިޔާއިން-ޔޫކްރެއިނަށް އަރައި ހިންގަމުންދާ ހަނގުރާމައާ ގުޅިގެން ރަޝިޔާގެ ބައިނަލްއަގުވާމީ އެއަރލައިން، އެއިރޯފްލޮޓްގެ ދަތުރުތައް ވަނީ ހުއްޓާލާފައެވެ. އެކަމާގުޅިގެން ރަޝިޔާއިން ރާއްޖެއަށް ފަތުރުވެރިން ޒިޔާރަތްކުރުން ވަނީ ހުއްޓިފައެވެ. އަދި ރަޝިޔާއަކީ ރާއްޖޭގެ ފަތުރުވެރިކަމުގެ ސިނާއަތުގައި ބޮޑު މާކެޓަކަށްވާއިރު، މިކަމުގެ ސަބަބުން ފަތުރުވެރިކަމުގެ ސިނާއަތަށް ނޭދެވޭ އަސަރުކުރާނެ ކަމަށް ކަމާބެހޭ ފަރާތްތަކުން މީގެ ކުރިން ވިދާޅުވެފައިވެއެވެ.