ފެލިދެއަތޮޅު އާރަށް ތަރައްގީކުރުމަށް ހިންގި މުއާމަލާތުގެ ތެރެއިން, މަގާމުގެ ނުފޫޒު ބޭނުންކޮށް ރިޝްވަތު ނެގި މައްސަލައިގެ އަޑުއެހުމެއް ހޯމަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.

ކްރިމިނަލް ކޯޓުގައި މި މައްސަލަ ބައްލަވަނީ އިސްގާޒީ އަހުމަދު ޝަކީލެވެ.

މި މައްސަލައިގައި އެންމެ ފަހުން އަޑުއެހުމެއް ބާއްވާފައިވަނީ 16 ފެބްރުއަރީ 2022 ގައެވެ. އެ ދުވަހުގެ އަޑުއެހުމުގައި ދައުވާ އިއްވުމާއި ޖަވާބުދާރީ ވުމުގެ މަރުޙަލާ ވަނީ އެއްކޮށް ނިންމާލާފައެވެ. އެގޮތުން ރައީސް ޔާމީނާއި، މި މައްސަލައިގައި ދެން ދައުވާ އުފުލާފައިވާ ޔޫސުފް ނައީމްވެސް ވަނީ ދައުވާއަށް އިންކާރު ކުރައްވާފައެވެ.

އޭގެ އިތުރުން، ޝަރީއަތް ލައިވް ކުރެވެންދެން އާރަށު ޚިޔާނަތުގެ އަޑުއެހުންތައް ލަސްކޮށްދިނުމަށް ރައީސް ޔާމީންގެ ފަރާތުން އެ ދުވަހުގެ އަޑުއެހުމުގައިވެސް އެދިފައިވެއެވެ.

މި މައްސަލައިގައި ހޯމަ ދުވަހު ކުރިއަށް ދިޔަ އަޑުއެހުމުގައި އޮތީ ދެފަރާތުން ހެކި ހާމަކުރުމެވެ. އެހެންނަމަވެސް، ރައީސް ޔާމީނުގެ ފަރާތުންނާއި، ޔޫސުފް ނައީމްގެ ފަރާތުން ވަނީ ބައެއް ލިޔެކިޔުންތައް ހޯދުމާއި ދިރާސާ ކުރުމަށް އިތުރު ވަގުތުކޮޅެއް ބޭނުންވާކަން ފާހަގަކޮށް، ލިއުމުން ހެކި ހުށައެޅުމަށް މުއްދަތެއް ދެއްވުމަށް އެދިލައްވާފައެވެ. ވުމާއެކު މައްސަލަ ބައްލަވާ ގާޒީ ވަނީ ދައުވާ ލިބޭ ދެ ފަރާތަށްވެސް ލިޔުމުން ހެކި ހުށައެޅުމަށް 5 ދުވަހުގެ މުއްދަތެއް ދެއްވާފައެވެ.

އެއަށްފަހު ޝަރީއަތުން ވަނީ ދައުލަތުން ހުށައަޅާ ހެކިތައް ހާމަކުރުމަށް ދަންނަވާފައެވެ. އެގޮތުން ދައުލަތުގެ ވަކީލާ ވަނީ ލިޔުމުން ހެކި ހުށައަޅުއްވާފައިވާނެކަން ފާހަގަކުރައްވައި ޚުލާސާ ގޮތެއްގައި އެކަން ބަޔާން ކުރައްވާފައެވެ. އަދި ދައުލަތުން ހެކީގެ ގޮތުގައި ހުށައަޅާފައިވާ އޯޑިއޯ އެނާލިސިސް ރިޕޯޓު ފިޔަވައި ހުރިހާ ހެއްކެއް ކޯޓަށް ހުށައަޅާފައިވާނެކަން ފާހަގަކުރައްވައި ދައުލަތުގެ ވަކީލާ ވިދާޅުވީ، އެ ހެކިވެސް މިހާރު ދައުލަތަށް ލިބިފައިވާކަމަށެވެ.

މި މައްސަލައިގައި ދެން އޮންނަ އަޑުއެހުމެއްގައި ދިފާއީ ހެކި ޚުލާސާ ގޮތެއްގައި ހާމަކުރުމާއި، މަދަނީ މިންގަނޑުން ކުރިއަށް ގެންދިޔުމާމެދު ދެފަރާތުން ވާހަކަ ދެއްކުން އޮންނާނެކަމަށް މައްސަލަ ބައްލަވާ ގާޒީ ވިދާޅުވިއެވެ.

ދެން މި މައްސަލައިގެ އަޑުއެހުމެއް އޮންނަނީ 31 މާރޗު 2022 ގެ ހެނދުނު 09:30 ގައެވެ.

އާރަށު ހިޔާނާތުގެ މައްސަލައިގައި ރައީސް ޔާމީނުގެ މައްޗަށް ކުރަނީ ރިޝްވަތު ޤަބޫލު ކުރުމާއި، މަނީ ލޯންޑަރިންގ ގެ ކުށުގެ ދައުވާއެވެ. ޔޫސުފް ނައީމްގެ މައްޗަށް ކުރަނީ ރިޝްވަތު ދިނުމުގެ ކުށުގެ ދައުވާއެވެ.

މައްސަލައިގެ ޚުލާސާއެއް:

ޕްރޮސެކިއުޓަރ ޖެނެރަލް (ޕީޖީ) އޮފީހުން ބުނީ މއ. ކާމިނީހުޅަގުގެ ޢަބްދުﷲ ޔާމީން ޢަބުދުއްޤައްޔޫމް އާއި ވ.ފެލިދޫ ހަނދުވަރީގެ ޔޫސުފް ނަޢީމް، މިނިސްޓްރީ އޮފް ޓްއަރިޒަމް އާއި މޯލްޑިވްސް މާރކެޓިންގ އެންޑް ޕަބްލިކް ރިލޭޝަން ކޯޕަރޭޝަން މެދުވެރިކޮށް ޓުއަރިސްޓް ރިޒޯޓް ތަރައްޤީ ކުރުމަށްޓަކައި ވ. އާރަށް ކުއްޔަށް ދޫކުރުމުގެ މުއާމަލާތުގެ ތެރެއިން ރައީސުލްޖުމްހޫރިއްޔާ މަޤާމުގެ ނުފޫޒު ބޭނުންކޮށްގެން ރިޝްވަތުގެ ގޮތުގައި 1 މިލިއަން ޔޫއެސް ޑޮލަރ ނަގައި ލޯންޑަރ ކޮށްފައިވާކަމަށް ތުޙުމަތުކުރެވޭ ކަމަށެވެ.