ޔޫތު މިނިސްޓްރީން މިފަދަ ބޮޑު އެވޯޑެއް ދިނުމަކީ ވަރަށްބޮޑަށް ފާހަގަކުރާކަމެއް- މުޖޭ
14 މާރިޗު 2022 | ހޯމަ 02:46ހޭންޑްބޯޅަ އެސޯސިއޭޝަނުން ނަންތައް ނޮމިނޭޓް ކުރީ އުޞޫލެއްގެ ތެރެއިން
ހޭންޑްބޮޅަ މުބާރާތެއްގައި ކުޅުންތެރިން ވާދަކުރަނީ
ހުރިހާ ކުޅިވަރަކުން, އެވޯޑް ދިނުމަށް ސީދާ ޔޫތު މިނިސްޓްރީން އެވޯޑް ހަފްލާއެއް ބޭއްވުމަކީ ވަރަށްބޮޑަށް ފާހަގަކުރައްވާކަމެއް ކަމުގައި ހޭންޑްބޯޅަ އެސޯސިއޭޝަންގެ ނައިބު ރައީސް އަހުމަދު މުޖުތަބާ (މުޖޭ) ވިދާޅުވެއްޖެއެވެ.
ރާއްޖެޓީވީން ގެނެސްދޭ މޯލްޑިވްސް ސްޕޯރޓްސް އެވޯޑްސް 2022 ގެ ކައުންޓްޑައުން ޝޯވްގައި މުޖުތަބާ ވިދާޅުވީ ކުރިން އަމިއްލަ ބައެއް ފަރާތްތަކުން ބައެއް ކުޅިވަރުތަކަށް އެވޯޑްތައް ދިނުމާއި, ސީދާ މިނިސްޓްރީން އެވޯޑެއް ދިނުމާއި ވަރަށް ތަފާތުކަމަށެވެ. މިއީ ހުރިހާ ކުޅިވަރު އެތްލީޓުންނަށްވެސް ލިބޭ ވަރަށް ބޮޑު ކުރިއެރުމެއް އަދި ހިތްވަރެއްކަމަށްވެސް އޭނާ ވިދާޅުވިއެވެ.
ދުނިޔޭގެ ގިނަ ޗެމްޕިއަނުންތަކެއް އެވޯޑް ހަފްލާގައި ބައިވެރިވުން ފާހަގަކުރައްވާ މުޖުތަބާ ވިދާޅުވީ އެއީ އެމީހުން ޗެމްޕިއަނުންނާއި ހަމައަށް ވާޞިލްވުމަށް ކުރި މަސައްކަތްތައް ދެނެގަނެ, އެމަސައްކަތް ކުރުމަށް ދިވެހި ކުޅުންތެރިންނަށްވެސް ލިބޭނެ ހިތްވަރަކަށް ވެގެންދާނެކަމަށެވެ.
ހޭންޑްބޯޅަ އެސޯސިއޭޝަނުން އެވޯޑަށް ކުޅުންތެރިން ނޮމިނޭޓް ކުރީ އުޞޫލެއް ހަދައިގެން އެއުޞޫލަށް ޕޮއިންޓް ދީގެންކަމަށާއި, އެކަމުގައި ބެލީ މިދިޔަ ތިން އަހަރު ބޭއްވި މުބާރާތްތަކަށް ކަމުގައި އެސޯސިއޭޝަންގެ ނައިބު ރައީސް ވިދާޅުވިއެވެ.
