އޮފިޝަލުން ތަމްރީން ކުރާ އުސޫލު ބަދަލުކޮށް، ޚާއްސަ ޕްރޮގްރާމެއް ފެށުމަށް ތައްޔާރުވަނީ

އިންތިޚާބުތަކުގައި މަސައްކަތް ކުރެވޭނެ ގާބިލު އޮފިޝަލުން ތަމްރީން ކުރުމަށް ޚާއްސަ ޕްރޮގްރާމެއް ކުރިއަށް ގެންދަން ނިންމާފައިވާ ކަމަށް އިލެކްޝަންސް ކޮމިޝަން (އީސީ)ން ބުނެފިއެވެ.

ރާއްޖޭގައި ބާއްވާ ހުރިހާ އިންތިޚާބެއް ވެސް ކައިރިވުމާއެކު އޮފިޝަލުން ހޯދުމަށް އިއުލާންކޮށް، އެއް ދުވަހުގެ ތަމްރީން ޕްރޮގްރާމެއް އެކޮމިޝަނުން ކުރިއަށް ގެންދެއެވެ. އިންތިޚާބާއި ގުޅޭ ހުރިހާ މައުލޫމާތެއް ފޯރުކޮށްދެމުންދަނީ އެއްދުވަހުގެ ތެރޭގައެވެ. އެގޮތުން މިއުސޫލު ބަދަލުކުރުމުގެ މަސައްކަތް އީސީން ވަނީ ފަށާފައެވެ.

ހާއްސަ ޕްލޭނެއްގެ ދަށުން މަސައްކަތްތައް ކުރިއަށްދާއިރު، މި މަސައްކަތްތަކާއި ގުޅޭގޮތުން އީސީގެ ސެކްރެޓަރީ ޖެނެރަލް ހަސަން ޒަކަރިއްޔާ ވިދާޅުވީ ކުރީގެ އިންތިޚާބުތަކުގެ އަލީގައި މަސައްކަތްތައް ކުރިއަށްގެންދާ ކަމަށާއި، ޚާއްސަ ސަމާލުކަމެއްދީގެން އޮފިޝަލުން ތަމްރީން ކުރުމަށް މަސައްކަތް ފަށާފައިވާ ކަމަށެވެ. އެގޮތުން އޮފިޝަލުންނަށް އަމާޒުކޮށް ޚާއްސަ ޕްރޮގްރާމެއް ކުރިއަށް ގެންދަން ނިންމާފައިވާ ކަމަށާއި، ޕްރޮގްރާމް ފުރިހަމަ ކުރާ މީހުންނަށް ސެޓްފިކެޓް ދެވިގެންދާނެ ކަމަށެވެ.

ހަސަން ވިދާޅުވީ މި ތަމްރީން ޕްރޮގްރާމްތައް ޑިޒައިން ކޮށްދޭނެ ފަރާތެއް ހޯދުމަށް މިހާރު އިއުލާން ކުރެވިފައިވާ ކަމަށާއި، މި ޕްރޮގްރާމް ކުރިއަށް ގެންދާނީ ޚާއްސަ މޮޑިއުލްތަކެއްގެ މައްޗަށް ބިނާކޮށްގެން ކަމަށެވެ.

ހަސަން ވިދާޅުވީ މި ތަމްރީން ޕްރޮގްރާމާއެކު އިންތިޚާބުގެ ގާނޫނާއި ގަވާއިދުގައި ބުނާ އަސާސީ ހުރިހާ ތަމްރީންތަކެއް އެމީހުންނަށް ލިބޭނެ ކަމަށެވެ. އަދި މި ޕްރޮގްރާމާއެކު ތަމްރީންވެފައި ތިބި އޮފިޝަލުން ރާއްޖޭގެ އެކި ހިސާބުތަކުގައި ތިބޭނެ ކަމަށާއި، ކޮންމެ އިންތިޚާބެއްގައި އެމީހުންނަށް ފުރުސަތު ހުޅުވާލެވިގެންދާނެ ކަމަށް ހަސަން ވިދާޅުވިއެވެ.

2023 ގެ ރިޔާސީ އިންތިޚާބަށް ގާތްގަނޑަކަށް 4000-6000 ދެމެދުގެ އޮފިޝަލުން ބޭނުންވާނެ އެވެ.