ޔާމީން ރަޝީދު މަރާލުމުގައި ބައިވެރިވި އެންމެން ހައްޔަރު ކުރެވިއްޖެ: ފުލުހުން
5 ޖޫން 2017 | ހޯމަ 19:52މިހާރު މިދަނީ ދައުވާ ކުރުމަށް ފޮނުވުމަށް މަސައްކަތް ކުރަމުން
ޔާމިން މަރާލި ކަމަށް ތުހުމަތު ކުރެވި ފުލުހުން ޢާއްމުކުރި ފޮޓޯ
އަނިޔާވެރިގޮތަކަށް ބްލޮގާ ޔާމީން ރަޝީދު މަރާލުމުގައި ބައިވެރިވި ކަމަށް ތުހުމަތު ކުރެވޭ އެންމެން ހައްޔަރުކޮށް، އެ މީހުންގެ މައްޗަށް ދައުވާކޮށްދިނުމަށް އެދި ޕްރޮސެކިއުޓާ ޖެނެރަލް (ޕީޖީ) އަށް ފޮނުވަން މަސައްކަތް ކުރަމުން އަންނަ ކަމަށް ފުލުހުން ހޯމަ ދުވަހުގެރޭ ބުނެފި އެވެ.
ފުލުހުން ނެރުނު ބަޔާނެއްގައި ބުނީ ޔާމީން މަރާލި މައްސަލައިގެ ތަހުގީގަށް ބޮޑެތި ކުރިއެރުންތަކެއް ލިބި އެ މައްސަލަ ޕީޖީ އަށް ފޮނުވަން ކުރަން ޖެހޭ މަސައްކަތްތައް މިހާރު ކުރަމުން އަންނަ ކަމަށެވެ. ފުލުހުން ކުރިން ބުނި ގޮތުގައި ޔާމީން މަރާލި މައްސަލާގައި ހައްޔަރުކޮށްފައި ވަނީ ހަތް މީހެކެވެ. އޭގެ ތެރެއިން ހަ މީހުން އަދިވެސް ތިބީ ބަންދުގަ އެވެ. ދޫކޮށްލާފައި ވަނީ ޔާމީންގެ މަރުގެ މައްސަލައިގައި ހައްޔަރުކުރި ހަމަ މީހުން ގާނޫނީ ވަކީލެވެ.
ފުލުހުންގެ ބަޔާނުގައި ބުނި ގޮތުގައި މި ރަހުމު ކުޑަ އަމަލު ހިންގުމުގައި އަމަލީ ގޮތުން ބައިވެރިވި މީހުން، މި އަމަލު ހިންގިކަން ކަށަވަރު ކުރެވޭ މިންވަރަށް ހެއްކާ ގަރީނާ ލިބިފައިވާ ކަމަށެވެ.
އެހެންވެ، ޔާމީންގެ މަރުގެ މައްސަލައިގެ ތަހުގީގު ކާމިޔާބުކޮށް މިކަމުގައި ޝާމިލްވާ މީހުން އިންސާފުގެ ކުރިމައްޗަށް ގެންނާނެ ކަމުގެ ޔަގީންކަން އޮތް ކަމަށް ބުނާ ބުނުން ފުލުހުން ވަނީ ތަކުރާރުކޮށްފަ އެވެ.
ފުލުހުން ބުނި ގޮތުގައި ޔާމީންގެ މަރުގެ މައްސަލައިގެ ތަހުގީގު ފުލުހުން ފެށުމާއެކު، ތަހުގީގަށް ތަފާތު ގޮންޖެހުންތައް ދިޔައީ ކުރިމަތިވަމުން ކަމަށެވެ. އެ ގޮތުން ހާދިސާއާ ގުޅުން ހުރި މައުލޫމާތުތައް ހިއްސާ ކުރުމާއި މައްސަލައިގެ ތަހުގީގަށް ބައެއް ގާނޫނީ ވަކީލުންގެ ފަރާތުން ދިމާވަމުން ދިޔަ ހުރަސްތަކާއި ތަހުގީގުގެ ފޯކަސް ބަދަލު ކުރުމަށް ބައެއް ފަރާތްތަކުން މަސައްކަތް ކުރި ކަމަށް ފުލުހުން ބުންޏެވެ. އަދި ރާއްޖެ އާއި ރާއްޖޭން ބޭރުން ތަފާތު ޕްރެޝަރުތައް ފުލުހުންނަށް ކުރިމަތިވި ކަމަށް ފުލުހުން ބުންޏެވެ.
އެ އުނދަގޫތަކާއި ގޮންޖެހުންތަކާއެކު ވެސް ފުލުހުން މަސައްކަތް ކުރަމުން ގޮސްފައި ވަނީ ޔާމީން ރަޝީދުގެ މަރުގެ މައްސަލާގައި ޝާމިލްވާ ފަރާތްތައް ހޯދައި އިންސާފުގެ ކުރިމައްޗަށް ގެނައުމަށް ކުރަން ޖެހޭ އެންމެހައި މަސައްކަތްތައް ފުލުހުންގެ މުއައްސަސާގައި ހުރި ހުރިހާ ވަސީލަތްތައް ބޭނުންކޮށްގެން ކުރަމުން ކަމަށްވެސް ފުލުހުން ނެރުނު ބަޔާނުގައި ބުނެފައިވެއެވެ.
