ސައުދީ އަރަބިއްޔާގައި މެރުމަށް ހުކުމް އިއްވާފައިވާ 81 މީހެއްގެ މައްޗަށް އެއްދުވަހާއި ހުކުމް ތަންފީޒުކޮށްފިއެވެ.

ފާއިތުވި 24 ގަޑިއިރު ހުކުމް ތަންފީޒުކުރި މީހުންގެ ތެރޭގައި ޔަމަނަށް ނިސްބަތްވާ 7 މީހުންނާއި ސީރިޔާގެ އެކަކު ހިމެނެއެވެ. މިމީހުން މެރުމަށް ހުކުމް އިއްވި ސަބަބުތަކުގެ ތެރޭގައި ބޭރުގެ ޓެރަރިސްޓް ޖަމާއަތްތަކަށް ތަބާވެ އެފަދަ އަމަލުތައް ހިންގަން އުޅުމާއި މުޖުތަމައު ގަބޫލުކުރާ އާންމު ގަބޫލުކުރުންތަކާއި ޚިލާފު ކަމެއް ނުވަތަ ކަންތައްތަކެއް ކުރުން ހިމެނެއެވެ. އެގޮތުން އަލްގައިދާ އާއި އައިސިސް އަދި ހޫތީން ފަދަ ޖަމާއަތްތަކަށް މިމީހުން ވާގިވެރިވެފައިވާކަމަށް ސައުދީގެ އިންޓީރިއަރ މިނިސްޓްރީން ބުނެއެވެ. އަދި ބައެއް މީހުން ވަނީ ޓެރަރިސްޓް ޖަމާއަތްތަކުން ހިންގަމުންދާ ހަނގުރާމަ ހިނގާ ސަރަހައްދުތަކަށްވެސް ގޮސްފައިކަމަށް ސައުދީގެ އިންޓީރިއަރ މިނިސްޓްރީން ބުނެއެވެ.

މީގެއިތުރުން މީގެތެރޭގައި މައުސޫމް ފިރިހެނުންނާއި، އަންހެނުންނާއި ކުޑަކުދިން މެރި މީހުންވެސް ހިމެނެއެވެ.

ސައުދީގެ އިންޓީރިއަރ މިނިސްޓްރީ އާއި ހަވާލާދީ ސައުދީ ޕްރެސް އެޖެންސީން ބުނެފައިވަނީ މިއެންމެންނަށްވެސް ވަކީލަކު އައްޔަނުކުރުމުގެ ހައްގު ލިބިދިން ކަމަށާއި ސައުދީގެ ގާނޫނާއި އެއްގޮތަށް ހުރިހާ ހައްގުތަކެއްވެސް ކަށަވަރުކޮށްދީފައިވާކަމަށެވެ.

މީގެއިތުރުން ކުރިޔަށް އޮތްތަނުގައިވެސް ޓެރަރިޒަމާއި ހައްދުފަހަނައަޅައި ދިޔުމުގެ ކަންކަން ކުރާ މީހުންނާއި ދެކޮޅަށް މިފަދަ ހުކުމްތައް ތަންފީޒުކުރަމުންދާނެ ކަމަށް ސައުދީ ޕްރެސްއިން ވަނީ ބުނެފައެވެ.

މެރުމުގެ ހުކުމް ތަންފީޒުކުރި ސައުދީގެ މީހުންގެ ތެރެއިން 37 މީހުންނަކީ ސެކިޔުރިޓީ އޮފިސަރުންތަކަކާއި ޕޮލިސް ސްޓޭޝަންތަކަކާއި ކޮންވޯއިތަކަށް ހަމަލާދީ ފުލުހުންނާއި ސެކުޔިރިޓީ ކަންކަން ބަލަހައްޓާ މީހުން މަރާލުމުގެ ކުށް ސާބިތުވެފައިވާ 37 މީހުންނެވެ.

މިމީހުންގެ މައްޗަށް މަރުގެ ހުކުމް ތަންފީޒުކުރި ގޮތުގެ ތަފްސީލެއް ސައުދީގެ އިންޓީރިއަރ މިނިސްޓްރީން ހާމަކޮށްފައެއްނުވެއެވެ.

މިއީ ފަހުގެ ތާރީޚުގައި ސައުދީ އަރަބިއްޔާގައި މިހާ ގިނަ އަދަދެއްގެ ބަޔަކު މަރަން ހުކުމްކޮށް އެކަން ތަންފީޒުކުރި ފުރަތަމަ ފަހަރެވެ. 2021 ވަނަ އަހަރު 67 މީހެއްގެ މައްޗަށް ހުކުމް ތަންފީޒުކުރިއިރު 2020 ވަނަ އަހަރު އެއަދަދު ހުރީ 27 ގައެވެ.

ސަައުދީގައި މީގެކުރިން އެއް ދުވަހާއި މިހާ ގިނަ މީހުންނަށް މަރުގެ ހުކުމް ތަންފީޒުކޮށްފައިވަނީ 2016 ވަނަ އަހަރުގެ ޖެނުއަރީ މަހުއެވެ. އެފަހަރު 47 މީހެއްގެ މައްޗަށް ހުކުމް ތަންފީޒުކުރިއެވެ. އޭގެތެރޭގައި ޝީއީންގެ ލީޑަރަކުވެސް ހިމެނުނެވެ. ޝީއީ ލީޑަރު މަރަން ހުކުމް ކުރީ ސައުދީ ސަރުކާރާއި ދެކޮޅު އެއްވުންތަކެއް ބޭއްވިކަމުގެ ކުށުގައެވެ.

2019 ވަނަ އަހަރު ސައުދީން ވަނީ ސައުދީގެ 37 މީހެއްގެ މައްޗަށް މެރުމުގެ ހުކުމް ތަންފީޒުކޮށްފިއެވެ. އޭގެ ތެރޭގައި ގިނައީ ޝީއީންނެވެ. އެމީހުންގެ މައްޗަށް މަރަން ހުކުމްކޮށްފައިވަނީ ޓެރަރިޒަމާއި ގުޅުންހުރި ކުށްތަކުގައެވެ.

ސައުދީން މެރުމުގެ ހުކުމް ތަންފީޒުކުރާތީ މިއީ އިންސާނިއްޔަތާއި ޚިލާފު ކަމެއްކަމަށް ބުނެ ހުޅަނގާއި އިންސާނީ ހައްގުތަކަށް މަސައްކަތް ކުރާ ފަރާތްތަކުން އަންނަނީ ސައުދީއަށް ފާޑުކިޔަމުންނެވެ. ނަމަވެސް ސައުދީން ބުނަމުން އަންނަނީ އެގައުމުގެ ސަލާމަތީ ކަންކަން ގާނޫނުތަކާއި އެއްގޮތްވާ ގޮތުގެ މަތިން ބަލަހައްޓަމުން އަންނަކަމަށެވެ.