ޔޫކްރެއިންގައި ރަޝިޔާއިން ކުރަމުންގެންދާ ހަނގުރާމަ ތަހުގީގުކުރަން ޖެހޭ ކަމަށް އެމެރިކާގެ ނައިބު ރައީސް ވިދާޅުވެއްޖެ

ރަޝިޔާއިން ޔޫކްރެއިންގައި ކުރަމުންގެންދާ ހަނގުރާމަ ތަހުގީގުކުރަން ޖެހޭކަމަށް އެމެރިކާގެ ނައިބު ރައީސް ކަމަލާ ހެރިސް ވިދާޅުވެއްޖެ އެވެ. އެކަމަނާ މިހެން ވިދާޅުވެފައިވަނީ ބުރާސްފަތި ދުވަހު ޕޯލަންޑްގެ ވެރިރަށް ވޯސޯއަށް ފެއްޓެވި ދަތުރުފުޅެއްގެ ތެރެއިންނެވެ.

ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ކަމަލާ ހެރިސް ވިދާޅުވީ ދުނިޔޭގެ އެންމެން ބަލަން ތިއްބައި, ޚިޔާލަށްވެސް ގެންނަން ދަތިވާވަރުގެ ބޮޑެތި, ހަނގުރާމައިގެ ޖަރީމާތައް ރަޝިޔާއިން ހިންގަމުންގެންދާ މައްސަލަ ރަނގަޅަށް ތަހުގީގު ކުރަންޖެހޭ ކަމަށެވެ.

ރަޝިޔާއިން ބުނާ ގޮތުގައި އެޤައުމުން ހިންގަމުންގެންދަނީ, ނުރައްކާތެރި ބައެއްކަމަށް ރަޝިޔާއިން ގަބޫލުކުރާ ވެރިންތަކެއް މަގާމުން ދުރުކުރުމަށް ހިންގާ މިލިޓަރީ އޮޕަރޭޝަނެއްކަމަށެވެ.

ޔޫކްރެއިންގެ މަރިއުޕޯލް ސިޓީގައި ހުރި މެޓަރނިޓީ ހޮސްޕިޓަލަކަށް ރަޝިޔާ ސިފައިން ބޮންއަޅައި ބޮޑެތި ގެއްލުންތައް ދިން ހަމަލާއާއި ގުޅިގެން ޕޮލަންޑްގެ ރައީސް އަންދްރޭ ޑޫޑާ ވިދާޅުވީ, ރަޝިޔާ ސިފައިން ހޮސްޕިޓަލްތަކާއި ހައުސިންގ އެސްޓޭޓްތަކަށް ބޮމާއި މިސައިލްގެ ހަމަލާތައް ދެމުންގެންދަނީ ބަޔަކު ގަސްދުގައި ނައްތާލަން ދޭ ހަމަލާތަކެއްފަދަ ގޮތަކަށް ކަމަށެވެ.

މިލިޓަރީ އެއްވެސް އިމާރާތެއް ނެތް ހިސާބެއްގައި ހުރި, މާބަނޑުމީހުންނާއި ކުޑަކުދިން ތިބޭ ހޮސްޕިޓަލްތަކަށް ބޮމުންނާއި މިސައިލުން ހަމަލާދީ މީހުން މަރަމުންދާ ދިޔުމަކީ ގަސްދުގައި ގިނަ އަދަދެއްގެ އިންސާނުން ތަކެއްމަރާލައި ގައުމެއް ނައްތާލަން ހިންގާ ބޮޑުވެގެންވާ ޖަރީމާއެއްކަމާމެދު އެއްވެސް މީހަކު ޝައްކު ނުކުރާނެ ކަމަށް ރައީސް ޑޫޑާ ވިދާޅުވިއެވެ.

މިދެބޭފުޅުންގެ ކުރިން ތުރުކީގައި ވާހަކަފުޅު ދައްކަވަމުން ރަޝިޔާގެ ޚާރިޖީ ވަޒީރު ސަރުގޭ ލަވްރޯފް ވަނީ, ރަޝިޔާ ސިފައިން ހަމަލާދިން ހޮސްޕިޓަލަކީ މިހާރު ހޮސްޕިޓަލަކަށް ބޭނުންކުރާ ތަނެއް ނޫންކަމަށާއި އެތަން ބޭނުންކުރަނީ ޔޫކްރެއިން ސިފައިންގެ ބޭނުންތަކަށް ކަމުގައެވެ.

ނަމަވެސް މިހަމަލާއަކީ ކިހިނެއް ހިނގި ކަމެއްތޯ ބަލަމުން ދާކަމުގައި ކްރެމްލިން އިން ވަކިން ބުނެފައިވެއެވެ.