މިދިޔަ އަހަރު ދައުވާކުރުމަށް ކޯޓުތަކަށް ހުށަހަޅާފައިވާ 128 ބާވަތެއްގެ މައްސަލާގައި 1499 މީހުންގެ މައްޗަށް ދައުވާކޮށްފައިވާކަމަށް ޕްރޮސެކިއުޓަރ ޖެނެރަލް (ޕީޖީ) އޮފީހުން ބުނެފިއެވެ.

ޕީޖީ އޮފީހުގެ 2021 ވަނަ އަހަރުގެ އަހަރީ ރިޕޯޓުގައި ބުނެފައިވަނީ މިދިޔަ އަހަރުގެ ނިޔަލަށް މައި އޮފީހުން ދައުވާކުރުމަށް ކޯޓުތަކަށް ހުށަހަޅާފައިވާ އެ އަހަރުގެ މައްސަލަތަކުގެ ކުށުގެބާވަތަށް ބަލާއިރު، ޖުމްލަ 128 ބާވަތެއްގެ މައްސަލާގައި 1499 މީހުންގެ މައްޗަށް ދައުވާކޮށްފައިވާ ކަމަށެވެ. މިބާވަތްތަކުގެ ތަފްސީލަށް ބަލާއިރު، 282 މީހުންގެ މައްޗަށް ހުށަހަޅާފައިވާ ކުށުގެ ބާވަތަކީ ކެނެބިސް ބޭނުންކުރުމުގެ ދައުވާ ކަމަށް ރިޕޯޓުގައި ބުނެފައިވެއެވެ.

ދެވަނައަށް އެންމެ ގިނައިން ހުށަހަޅާފައިވަނީ ޑައިމޯފިން ބޭނުންކުރުމުގެ ކުށުގެ މައްސަލަތަކެވެ. އެއީ، 257 މީހުންގެ މައްޗަށެވެ. މީގެ އިތުރުން 79 މީހުންގެ މައްޗަށް ހުށަހަޅާފައިވާ މައްސަލައަކީ އެހެން މީހެއްގެ މުދަލެއްގެ މައްޗަށް ހުއްދަނޫން ގޮތުގައި ބާރު ހިންގުމުގެ ކުށުގެ މައްސަލައެވެ.

ދައުވާކުރުމަށް ކޯޓުތަކަށް ހުށަހަޅާފައިވާ 2021 ވަނަ އަހަރުގެ މައްސަލަތަކުގެ ބާވަތަށް ބަލާއިރު, ދައުވާލިބޭ ޖުމްލަ 46 އަންހެނުން ހިމެނޭއިރު ފިރިހެނުންގެ އަދަދަކީ 1453އެވެ. އަދި މިމައްސަލަތަކުގައި ދައުވާ ލިބޭ ފަރާތްތަކުގެ އުމުރުފުރާއަށް ބަލާއިރު، 18 އަހަރުން ދަށުގެ 10 ކުދިން ހިމެނޭއިރު 1489 މީހުންނަކީ 18 އަހަރުންމަތީ ފަރާތްތަކެވެ.

މީގެ އިތުރުން 2021 ވަނަ އަހަރުގެ ނިޔަލަށް ހެޑް އޮފީހުން ދައުވާކުރުމަށް ކޯޓުތަކަށް ހުށަހަޅާފައިވާ އެހެނިހެން އަހަރުތަކުގެ މައްސަލަތަކުގެ ކުށުގެ ބާވަތަށް ބަލާއިރު، ޖުމްލަ 73 ބާވަތެއްގެ ކުށުގެ މައްސަލާގައި 487 މީހެއްގެ މައްޗަށް ދައުވާކޮށްފައިވެއެވެ. ދައުވާ ކުރުމަށް ހުށަހަޅާފައިވާ މައްސަލައިގެ ބާވަތްތަކުގެ ތަފްސީލަށް ބަލާއިރު އެންމެ ގިނައިން ހުށަހަޅާފައިވަނީ ޑައިމޯފިން ބޭނުންކުރުމުގެ ކުށުގެ ދައުވާއެވެ. އެއީ 100 މީހުންގެ މައްޗަށެވެ. ދެން އެންމެ ގިނައިން ހުށަހަޅާފައިވަނީ ކެނެބިސް ބޭނުންކުރުމުގެ ކުށުގެ ދައުވާއެވެ. އެއީ 94 މީހުންގެ މައްޗަށެވެ. ތިންވަނައަށް އެންމެ ގިނައިން ހުށަހަޅާފައިވަނީ އެހެން މީހެއްގެ މުދަލެއްގެ މައްޗަށް ހުއްދަނޫން ގޮތުގައި ބާރު ހިންގުމުގެ ކުށުގެ ދައުވާއެވެ. އެއީ 34 މީހުންގެ މައްޗަށެވެ.

ދައުވާކުރުމަށް ކޯޓުތަކަށް ހުށަހަޅާފައިވާ އެހެނިހެން އަހަރުތަކުގެ މައްސަލަތަކުގެ ބާވަތަށް ބަލާއިރު, ދައުވާލިބުނު މީހުންނަކީ 19 އަންހެނުންނާއި 478 ފިރިހެނުންނެވެ. ދައުވާލިބޭ މީހުންގެ އުމުރުފުރާއަށް ބަލާއިރު، 18 އަހަރުން ދަށުގެ 61 ކުދިންނާއި 18 އަހަރުން މަތީގެ 426 ބޮޑެތިމީހުން ހިމެނެއެވެ.

2021 ވަނަ އަހަރުގެ މައްސަލަތަކަށް ފިޔަވަޅުއެޅުނުގޮތާ ބެހޭގޮތުން ރިޕޯޓުގައި ބުނެފައިވަނީ, މިދިޔަ އަހަރުގެ ނިޔަލަށް ތަހުގީގީ އިދާރާތަކުން ހެޑް އޮފީހަށް ހުށަހަޅާފައިވާ، މި އަހަރުގެ މައްސަލަތަކުގައި ޖުމްލަ 1856 ފިޔަވަޅު އަޅާފައިވާ ކަމަށެވެ. 2021 ވަނަ އަހަރުގެ ތެރޭގައި ހުށަހަޅާފައިވާ މައްސަލަތަކުގެ ތެރެއިން ދައުވާކުރުމަށް ނިންމައި ކޯޓުތަކަށް 1499 މީހުންގެ މައްސަލަ ހުށަހަޅާފައިވާ ކަމަށެވެ. އަދި 61 މީހުންގެ މައްސަލަ ހެއްކާއި ގަރީނާ ނެތިގެން އަނބުރާ ފޮނުވާލާފައިވެއެވެ. 72 މީހުންގެ މައްސަލައަކީ އަލުން ހުށަހެޅުމަށް އަނބުރާ ފޮނުވާލާފައިވާ މައްސަލައެވެ. މީގެއިތުރުން، އެކި ސަބަބުތަކާހުރެ އަނބުރާ ފޮނުވާލާފައިވާ, 40 މީހުންގެ މައްސަލައާއި، އިތުރަށް ކުރިއަށްގެންދިޔުމުގެ މަޞްލަޙަތު ނެތިގެން އަނބުރާ ފޮނުވާލި 37 މީހުންގެ މައްސަލަ ވެސް ހިމެނެއެވެ.

އެހެން އަހަރުތަކުގެ މައްސަލަތަކާމެދު ފިޔަވަޅު އަޅާފައިވާގޮތާ ބެހޭގޮތުން ރިޕޯޓުގައި ބުނެފައިވަނީ, އެ އޮފީހުގެ ހެޑް އޮފީހުގައި 2021 ވަނަ އަހަރުގެ ނިޔަލަށް ނުނިމިހުރި އޭގެ ކުރީގެ އަހަރުތަކުގެ މައްސަލަތަކުގައި ޖުމްލަ 1489 ފިޔަވަޅު އަޅާފައިވާކަމަށެވެ.

މި މައްސަލަތަކުގެ ތެރެއިން ދައުވާކުރުމަށް ނިންމައި ކޯޓުތަކަށް 487 މީހުންގެ މައްސަލަ ވަނީ ހުށަހަޅާފައެވެ. 46 މީހުންގެ މައްސަލަ ހެއްކާއި ގަރީނާ ނެތިގެން އަނބުރާ ފޮނުވައި 196 މީހުންގެ މައްސަލަ އަލުން ހުށަހެޅުމަށް އަނބުރާ ފޮނުވާލާފައިވެއެވެ. މީގެއިތުރުން އެކިސަބަބުތަކާހުރެ އަނބުރާ ފޮނުވާލާފައިވާ 156 މީހުންގެ މައްސަލައާއި، އެކިސަބަބުތަކާ ހުރެ އެ އޮފީހުގައި ހިފަހައްޓާފައި އޮތް 2 މީހެއްގެ މައްސަލަ ހިމެނެއެވެ. މީގެ އިތުރުން ރާއްޖޭގެ އިމިގްރޭޝަންގެ ގާނޫނުގެ ދަށުން ފިޔަވަޅުއެޅުމަށް އަނބުރާ ފޮނުވާފައިވާ 3 މީހުންގެ މައްސަލައާއި، އިތުރަށް ކުރިއަށްގެން ދިޔުމުގެ މަސްލަހަތު ނެތިގެން 208 މީހުންގެ މައްސަލަ ހިމެނޭ ކަމަށް ރިޕޯޓުގައި ބުނެފައިވެއެވެ.