ޔުއެފާ ޗެމްޕިއަންސް ލީގުގައި ބުދަ ދުވަހުގެރޭ ޕީއެސްޖީ އާއި ރެއާލް މެޑްރިޑް ވާދަކުރާ މެޗަށް ޕީއެސްޖީގެ ޒުވާންތަރި ކީލިއަން އެމްބާޕޭ ފިޓްކަމަށް އެޓީމުގެ ކޯޗު މައުރީސިއޯ ޕޮޗެޓީނޯ ބުނެފިއެވެ.

މިދިޔަ ހޯމަ ދުވަހު އޮތް ޕިއެސްޖީގެ ފަރިތަކުރުމުގައި އެމްބާޕޭއަށް އަނިޔާވުމުގެ ސަބަބުން އޭނާއަށް ކުޅެވޭނެ ކަމާއިމެދު އޮތީ ސުވާލު އުފެދިފައެވެ. ނަމަވެސް އަނިޔާއިން ރަނގަޅުވެ މިހާރު އޭނާ ވަނީ ޓީމުގެ ފަރިތަކުރުންތަކުގައިވެސް ބައިވެރިވާން ފަށާފައެވެ.

ޗެމްޕިއަންސް ލީގު ގަދަ 16 ގެ ދެވަނަ ބުރުގައި ރެއާލް އާއި ޕީއެސްޖީ މިރޭ ބައްދަލުކުރާއިރު، މި މެޗަށް އެމްބާޕޭ ފިޓް ވުމަކީ އެޓީމުގެ ކޯޗު ޕޮޗެޓީނޯއަށް ލިބޭނެ އެންމެ ބޮޑު ހިތްހަމަޖެހުމެވެ. އެމްބާޕޭ ނެތި ފްރާންސް ލީގުގައި ޕީއެސްޖީ އެންމެ ފަހުން ނީސް އާއި ވާދަކުރި މެޗުންވެސް ވަނީ 1-0 ގެ ނަތީޖާ އަކުން ބަލިވެފައެވެ.

އަނެއްކޮޅުން މި ސީޒަނުގައި ތަފާތު މޮޅު ކުޅުމެއް ދައްކަމުން އަންނަ އެމްބާޕޭ ވަނީ ގަދަ 16 ގެ ފުރަތަމަ ލެގުގައި ރެއާލްއާއި ބައްދަލުކުރި މެޗުގައި މޮޅު ކުޅުމެއް ދައްކާފައެވެ. އެމެޗުން ޕީއެސްޖީ މޮޅުވީ 1-0 ގެ ނަތީޖާއަކުންނެވެ. ޕިއެސްޖީއަށް ލަނޑު ޖަހައިދިނީ އެމްބާޕޭއެވެ. ޗެމްޕިއަންސް ލީގުގެ މި ސީޒަންގައި މިހާތަނަށް އެމްބާޕޭ ވަނީ ފަސް ލަނޑު ޖަހާ، ހަ ލަނޑު ޖެހުމަށް އެހީތެރިވެދީފައެވެ.

ޗެމްޕިއަންސް ލީގުގެ ގަދަ 16 ގައި މީގެ ކުރިންވެސް އެމްބާޕޭއަކީ ކާމިޔާބު ކުޅުންތެރިއެކެވެ. ގަދަ 16 ފައި 11 މެޗު ކުޅެފައިވާއިރު، އެމްބާޕޭ ވަނީ އަށް ގޯލު ޖަހާފައެވެ. މިހާތަނަށް އެމްބާޕޭ ވަނީ ޗެމްޕިއަންސް ލީގުގައި 52 ގޯލު ޖަހާފައެވެ.