އިންޑިއާގެ ރައްޔިތަކު ފެން ފޯއް ރުކަށް އެރުމަށް ސްކޫޓަރެއް އުފައްދައިފިއެވެ.

އުމުރުން 50 އަހަރުގެ ގަނަޕަތީ ބަޓް 20 މީޓަރު ދިގު ފެން ފޯއް ރުއްތަކަށް އެރުމަށް މި ސްކޫޓަރު ބޭނުންކުރާއިރު އޭނާ ބުނީ މިއީ އަމިއްލައަށް އުފެއްދި އެއްޗެއް ކަމަށެވެ. އޭނާ މި ސްކޫޓަރަށް ކިޔަނީ "ޓްރީ ސްކޫޓަރު" އެވެ.

މި ސްކޫޓަރުގައި އިންނަ ފިއްތަށް ފިއްތާލުމުން، އޭތީ މަޑުމަޑުން މައްޗަށް އަރައިގެންދެއެވެ. މި ސްކޫޓަރުގައި ދެ ފުރޮޅު ހުރެއެވެ. އޭނާ މި ސްކޫޓަރު ބޭނުންކުރަނީ މެންގަލޫރުގައި ހުންނަ ފެން ފޯއް ރުއްތަކުން ފެން ފޯއް ނެގުމަށެވެ.

ބަޓް ބުނީ އޭނާ މިފަދަ ސްކޫޓަރެއް ހެދުމުގެ ވިސްނުން އައިސް 2014 ވަނަ އަހަރު އޭގެ މަސައްކަތް ފެށީ އުމުރުން ދުވަސްވުމުންނާއި ހެޔޮ އަގެއްގައި ރުކަށް އަރައިދޭނެ މީހަކު ނުލިބުން ކަމަށެވެ.

މި ސްކޫޓަރު ހެދުމަށާއި ރިސާޗްތައް ހެދުމަށް ބަޓް ވަނީ 4 މިލިއަން އިންޑިއަން ރުޕީސް ހޭދަކޮށްފައެވެ. އޭނާ މި ޑިވައިސް ހެދީ އިންޖީނިއަރިންގ ދަންނަ މީހަކާއެކުގައެވެ.

ބަޓް ބުނީ އޭނާގެ ރަށުގެ މީހުން އޭނާއަކީ މޮޔައެއް ކަމަށް ބުނެ ސުވާލު އުފައްދާފައިވާ ކަމަށެވެ. އެއީ މި ސްކޫޓަރާމެދު އެމީހުންނަށް އިތުބާރު ނެތުމާއި ވިއްސާރަ މޫސުމުގައި މި މަސައްކަތް ކުރާނެ ކަމާމެދު ޝައްކު އުފެދުމުން ކަމަށެވެ. ބަޓްގެ އަންހެނުން ޖަޔަލަކްޝްމީ ވެސް ފުރަތަމަ ހީކުރީ އޭނާ މި ސްކޫޓަރު އުފެއްދުމަށް، ބޭކާރު ފައިސާ ޚަރަދު ކުރާ ކަމަށެވެ.

ބަޓް ބުނީ މި ސްކޫޓަރު މެދުވެރިކޮށް ދުވާލެއްގެ މައްޗަށް 300 ފެން ފޯއް ނެގޭ ކަމަށެވެ. ސްކޫޓަރު ބޭނުންނުކޮށް ކުރިން ދުވާލެއްގެ މައްޗަށް ނެގެނީ 100 ފެން ފޯއް ކަމަށް ވެސް އޭނާ ބުންޏެވެ.

ބަޓް ބުނީ މީގެ އެހެން ސްކޫޓަރުތައް ވެސް އޭނާ އުފައްދާފައިވާ ކަމަށެވެ. އަދި މިހާތަނަށް 300ށް ވުރެން ގިނަ ސްކޫޓަރުތައް ވިއްކާފައިވާ ކަމަށެވެ. ކޮންމެ ސްކޫޓަރެއް އޭނާ ވިއްކީ 62،000 އިންޑިއަން ރުޕީސްއަށެވެ.

ބަޓް ބުނީ އޭނާ އަދިވެސް އިތުރު ސްކޫޓަރެއް އުފެއްދުމުގެ މަސައްކަތް ވެސް މިހާރު ކުރަމުން އަންނަ ކަމަށެވެ. އެއީ ރުކަށް އެރުމަށް ބޭނުންކުރާނެ ސްކޫޓަރަކަށްވާއިރު އޭގެ ދިރާސާތައް ކުރަމުންދާ ކަމަށް ވަނީ ބުނެފައެވެ. އަދި ވަރަށް އަވަހަށް މި އުފެއްދުން ވެސް ނެރެވޭނެކަމަށް އޭނާ އުންމީދު ކުރެއެވެ.

އިންޑިއާ އަކީ މުޅި ދުނިޔެއިންވެސް އެންމެ ގިނައިން ފޯއް އުފައްދާ ޤައުމެވެ. އެގޮތުން 2020 އަދި 2021 ވަނަ އަހަރު 1.2 މިލިއަން ޓަނުގެ ފޯއް ވަނީ އުފައްދާފައެވެ.