ޤާނޫނަށް ބަދަލު ގެނެސްގެންވިޔަސް، ޝަރީއަތްތައް އަވަސްކުރުމަށް ފިޔަވަޅުތަކެއް އަޅަންޖެހޭ: ޕީޖީ ޝަމީމް
9 މާރިޗު 2022 | ބުދަ 06:03ޝަރީއަތްތައް ނުނިމި ދިގުލައިގެންދާ މައްސަލައަކީ އަދިވެސް ގިނަ ބައެއްގެ މެދުގައި އޮތް ކަންބޮޑުވުމެއް
ޕްރޮސެކިއުޓަރ ޖެނެރަލް ހުސައިން ޝަމީމް - ޝަމީމް ވަނީ ވާނުވާގެ މައްސަލަތައް ދިގުލައިގެން ދިޔުމަކީ ކަންބޮޑުވެވަޑައިގަންނަވާ ކަމެއް ކަމަށް ވިދާޅުވެފައި
ޤާނޫނަށް ބަދަލު ގެނެސްގެންވިޔަސް، ޝަރީއަތްތައް އަވަސްކުރުމަށް ފިޔަވަޅުތަކެއް އަޅަންޖެހޭކަމަށް ޕްރޮސެކިއުޓަރ ޖެނެރަލް (ޕީޖީ) ހުސައިން ޝަމީމް ވިދާޅުވެއްޖެއެވެ.
ޕީޖީ އޮފީހުގެ 2021 ވަނަ އަހަރުގެ އަހަރީ ރިޕޯޓު ނެރެފައިވާއިރު، ޕީޖީ ހުސައިން ޝަމީމް ވަނީ އެ އަހަރު ކުރެވިފައިވާ މުހިއްމު މަސައްކަތްތަކަށް އަލިއަޅުވާލައްވާފައެވެ. އެގޮތުން ޕީޖީގެ މަޤާމާއި ޙަވާލުވެވަޑައިގަތީއްސުރެ އެންމެ އިސްކަމެއް ދެއްވައިގެން ޙައްލު ކުރައްވަން ބޭނުންވި ކަމަކީ، ޝަރީޢަތް ނިމެންދެން ބަންދުގައި ތިބި މީހުންގެ ޝަރީޢަތްތައް އަވަސް ކުރެވޭތޯ ބެލުންކަމަށް ޝަމީމް ވިދާޅުވިއެވެ.
ޝަމީމް ވިދާޅުވީ، އެކަމުގައި ތަފާތު އެކި ގޮތްގޮތަށް މަސައްކަތް ކޮށްގެންވެސް، ނިމިދިޔަ 2021 ވަނަ އަހަރުގެ ތެރޭގައި ފާހަގަކުރެވޭ ވަރުގެ ކުރިއެރުމެއް ލިބިފައި ނެތް ކަމަށެވެ. އެހެންނަމަވެސް، މިހިނގާ 2022 ވަނަ އަހަރު ޤާނޫނަށް ގެންނަންޖެހޭ ބަދަލުތަކެއް ގެނެސްގެން ވިޔަސް، ޝަރީޢަތްތައް އަވަސް ކުރުމަށް ފިޔަވަޅުތަކެއް އަޅަންޖެހޭކަމަށް ފެނިވަޑައިގަންނަވާކަމަށް ޝަމީމް ވިދާޅުވިއެވެ.
ޖިނާއީ އިޖުރާއަތުގެ ގާނޫނަށް ގެނައި 3 ވަނަ އިސްލާހުގައި، އެ ގާނޫނުގެ 60 ވަނަ މާއްދާގެ (ވ)ގައި ބުނެފައިވަނީ، ޝަރީޢަތް ނިމެންދެން މީހަކު ބަންދުގައި ބަހައްޓަން ފަނޑިޔާރު ނިންމައިފިނަމަ، އެ ނިންމުން، ކޮންމެ 30 (ތިރީސް) ދުވަހަކުން މުރާޖަޢާކުރަންވާނެ ކަމަށެވެ. އިތުރަށް ބަންދުގައި ބަހައްޓަންޖެހޭ ސަބަބެއް އޮތްތޯ ބެލުމަށްޓަކައި، އޭނާ ހައްޔަރުކޮށްފައިވާ ފަރާތުން، އޭނާ ކޯޓަށް ހާޒިރުކުރަންވާނެ ކަމަށެވެ.
އެހެންނަމަވެސް، އެފަރާތްތަކުގެ ޝަރީއަތްތައް ނުނިމި ދިގުލައިގެންދާ މައްސަލައަކީ އަދިވެސް ގިނަ ބައެއްގެ މެދުގައި އޮތް ކަންބޮޑުވުމެކެވެ. އެގޮތުން މައްސަލަތައް ނުނިމި ޝަރީއަތް ނިމެންދެން ބަންދުގައި ތިބި މީހުންގެ ތެރޭގައި 6 އަހަރު ދުވަހު ބަންދުގައި ތިބި މީހުން އެބަތިބިކަމަށް ޕީޖީ އޮފީހުން ބުނެފައިވެއެވެ.
ޝަރީއަތް ނިމެންދެން ބަންދުކޮށް، "ވާނުވާ" ޖަހާފައި ތިބި މީހުންގެ މައްސަލަތަކަށް އަވަސް ޙައްލެއް ގެނައުމަށްޓަކައި އެންމެ އުފެއްދުންތެރި ޙައްލަކީ ދެމިގެންދާ ޝަރީއަތް (ކޮންޓިނިއަސް ހިއަރިން) ކަމަށް ޝަމީމް ވަނީ މީގެ ކުރިން ވިދާޅުވެފައެވެ.
ޝަރީއަތް ނިމެންދެން ބަންދުކުރާ މީހުންގެ މައްސަލަތައް ނުނިމި ދިގުލައިގެން ދިޔުމަކީ ނުހަނު ކަންބޮޑުވެވަޑައިގަންނަވާ ކަމެއް ކަމަށް ޝަމީމް ވިދާޅުވެއެވެ. އަދި އެކަމަށް ޙައްލެއް ގެނައުމަށްޓަކައި އެކި މަސައްކަތްތައް ކުރެވިފައިވާކަން ފާހަގަކުރައްވާ ޝަމީމް ވިދާޅުވީ، މިހާރު ބަންދުގައި ތިބޭނީ ކޮންމެހެން ބަންދުގައި ތިބެންޖެހޭކަމަށް ފެންނަ މީހުން ކަމަށެވެ.
މެދުނުކެނޑި ހިނގާ ޝަރީއަތްތައް ކުރިއަށް ގެންދިޔުމަކީ ޕީޖީ އޮފީހުން މީގެ ކުރިންވެސް ވަރަށް ބޮޑަށް ބާރު އަޅާފައިވާ ކަމެކެވެ. އެގޮތުން ކުޑަ ކުދިންނާމެދު ޖިންސީ އަމަލުތައް ހިންގާ މީހުން މައްސަލަތައް އަވަސް ކުރުމަށް މެދުނުކެނޑި ޝަރީއަތްތައް ކުރިއަށް ގެންދިޔުމަށް ކްރިމިނަލް ކޯޓަށްވެސް ޝަމީމް ހުށައެޅުއްވިއެވެ. އެގޮތުގެ މަތިން ބައެއް މައްސަލަތައް ނިންމައި ޙުކުމްވެސް ކޮށްފައިވެއެވެ.
