ފެން އުފެއްދުމަށްފަހު އިތުރަށް ތަހުލީލުކުރުމަށް 24 ގަޑިއިރު މާކެޓަށް ނުނެރި ބަހައްޓާ: އެމްޑަބްލިޔުއެސްސީ

އެމްޑަބްލިޔުއެސްސީން އުފައްދާ ތާޒާ ބްރޭންޑްގެ ފެނަކީ އޭގެ ކޮލިޓީ ޔަގީންކުރުމުގެ ގޮތުން ފެން އުފެއްދުމަށްފަހު އިތުރު ތަހުލީލުކުރުމަށްޓަކައި މާކެޓަށް ނުނެރި 24 ގަޑިއިރު ބަހައްޓައި، ގިނަ ތަހުލީލުތަކެއްކުރާ ފެނެއްކަމަށް އެކުންފުނިން ބުނެފިއެވެ.

އެކުންފުނިން މިހެން ބުނީ ތާޒާ ފެނުން ބެކްޓީރިއާއެއް ފެނި، ގިނަ އަދަދެއްގެ ފެން ކޭސް ނައްތައިލާން އެ ކުންފުނިން ނިންމާފައިވާ ކަމަށް ސޯޝަލް މީޑިއާގައި ދައުރުވަމުން ދިޔަ ހަބަރުތަކާއި ގުޅިގެންނެވެ.

އެޚަބަރާއި ގުޅިގެން އެމްޑަބްލިޔުއެސްސީން ނެރުނު ބަޔާނެއްގައި ބުނެފައިވަނީ ތާޒާ ފުޅީގެ ކޮންމެ ބެޗެއްވެސް ބާޒާރަށް ނެރެނީ މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އާއި ބައިނަލްއަގްވާމީ ގޮތުން ކަނޑައަޅާފައިވާ ކޮލިޓީ މިންގަނޑުތަކަށް ފެތޭކަން ކަށަވަރުކުރުމަށްފަހު ކަމަށެވެ. މިކޮލިޓީ މިންގަނޑުތައް ކަށަވަރުނުކޮށް ތާޒާ ބްރޭންޑްގެ އެއްވެސް ބެޗެއް ބާޒާރަށް ނެރެފައިނުވާނެކަން ކަސްޓަމަރުންނަށް ޔަގީންކޮށްދޭކަމަށްވެސް އެކުންފުނިން ބުނެއެވެ.

އަދި ތާޒާ ފެނަކީ އޭގެ ކޮލިޓީ ޔަގީންކުރުމުގެ ގޮތުން ފުޅީގައި ފެން ބަންދުކުރުމުގެ މަރުހަލާތަކުގައި ގަޑިއަކު އެއްފަހަރު ހަދަންޖެހޭ އެންމެހައި ޓެސްޓެއް ހަދައި ބައިނަލްއަގްވާމީ ކަމާގުޅޭ އެންމެ މަތީ މިންގަނޑުތަކުން ފެންވަރު ވަޒަންކޮށް މާކެޓަށް ނެރޭ ފެނެއްކަމަށް އެމްޑަބްލިޔުއެސްސީން ބުނެއެވެ.