ގިންތިކުރުމަކާ ނުލައި ފަންނީ އުފެއްދުންތައް އާންމުކުރުމަކީ މަނާކަމެއް ކަމަށް ކަނޑައަޅާ ބިލުގެ ބަހުސް ފަށައިފި

ގިންތިކުރުމަކާ ނުލައި ފަންނީ އުފެއްދުންތައް އާންމުކުރުމަކީ މަނާކަމެއް ކަމަށް ކަނޑައަޅާ ބިލުގެ ބަހުސް ފަށައިފިއެވެ.

ފަންނީ އުފެއްދުންތައް ގިންތިކުރުމާއި ދަރަޖަކުރުމުގެ ބިލު ސަރުކާރުގެ ފަރާތުން ހުށައެޅުއްވީ، އިނގުރައިދޫ ދާއިރާގެ މެމްބަރު ހަސަން އަހުމަދުއެވެ.

މި ބިލަކީ، ދިވެހިރާއްޖޭގައި އުފައްދާ އަދި ދިވެހިރާއްޖެއަށް އެތެރެކުރާ ފަންނީ އުފެއްދުންތަކަކީ، އެ އުފެއްދުމެއް އާންމުކުރުމުގެ ކުރިން ތަފާތު އުމުރުފުރާތަކަށް އެކަށޭނަ ގޮތަކަށް ގިންތިކުރެވޭނެ އުފެއްދުންތަކެއްކަން ކަށަވަރުކުރުމަށް ޓަކައި ގިންތިކުރުމާއި ދަރަޖަކުރުމުގެ ނިޒާމެއް އެކަށައެޅުމާއި، ދިވެހިރާއްޖޭގައި އުފައްދާ ނުވަތަ ދިވެހިރާއްޖެއަށް އެތެރެކުރާ އުފެއްދުންތައް ފާސްކުރުމުގައި ޢަމަލުކުރާނެ އުސޫލުތައް ކަނޑައެޅުމާއި، ދިވެހިރާއްޖޭގެ ރީބްރޯޑްކާސްޓުކުރުމުގެ ޗެނަލްތައް ގިންތިކުރުމަށް ޢަމަލުކުރާނެ އުސޫލުތައް ކަނޑައެޅުމުގެ މަގުސަދުގައި ސަރުކާރުން ހުށަހެޅުއްވި ބިލެކެވެ.

ދިވެހިރާއްޖޭގައި އުފައްދާ އަދި ދިވެހިރާއްޖެއަށް އެތެރެކޮށް އާންމުކުރާ ފަންނީ އުފެއްދުންތައް ގިންތިކުރުމާ ގުޅޭ ގޮތުން އަދާކުރަންޖެހޭ މަސްއޫލިއްޔަތުތައް އަދާކުރާނީ ނޭޝަނަލް ބިއުރޯ އޮފް ކޮލިފިކޭޝަނުން ކަމަށް ބިލުގައި ބަޔާންކޮށްފައިވެއެވެ.

ދިވެހިރާއްޖޭގައި އުފައްދާ ނުވަތަ ދިވެހިރާއްޖެއަށް އެތެރެކުރާ ފަންނީ އުފެއްދުންތަކުގެ ތެރެއިން ފިލްމާއި ސައުންޑް ރެކޯޑިންއާއި، ވީޑިއޯ ގޭމު ނުވަތަ އިލެކްޓްރޯނިކް ގޭމާއި، ފޮޓޯއާއި، ކުރެހުމާއި، ޕަރފޯމަންސް ޢާޓްސްއާއި ޢަދަބީ އުފެއްދުންތައް އާންމުކުރަންވާނީ ގިންތިކުރުމަށްފަހު ކަމުގައި ބަޔާންކޮށްފައިވެއެވެ. އެހެންނަމަވެސް، ވިޔަފާރި ބޭނުމަށް ނުވަތަ ވިޔަފާރި ކުރިއަރުވަން ކަމަށް ނުވާ ގޮތަށް މީސްމީޑިއާގައި ނުވަތަ އެނޫން ވެސް ވަސީލަތެއް މެދުވެރިކޮށް އާންމު ފަރުދުން އަމިއްލަ ބޭނުމަށް އާންމުކުރާ ފަންނުވެރި އުފެއްދުންތައް އިސްތިސްނާވާނެއެވެ.

ބިލުގައިވާގޮތުން ފަންނީ އުފެއްދުންތައް އާންމުކުރުމުގެ ކުރިން ގިންތިކުރުމަށް ޓަކައި ހުށަހަޅާނީ ނޭޝަނަލް ބިއުރޯ އޮފް ކޮލިފިކޭޝަން އަށެވެ.

ރީބްރޯޑްކާސްޓުކުރުމުގެ ޚިދުމަތްދޭ ފަރާތްތަކުން ޗެނަލް އާންމުކުރުމުގެ ކުރިން ގިންތިކުރުމުގެ ބިއުރޯއަށް ހުށަހަޅަންވާނެ ކަމަށް ބިލުގައި ބަޔާންކޮށްފައިވީ ނަމަވެސް، ރީބްރޯޑްކާސްޓުކުރާ ބްރޯޑްކާސްޓިންގ ޚިދުމަތްދޭ ޗެނަލްތަކާއި ދިވެހި ޗެނަލްތައް ގިންތިކުރުމުގައި އިސްތިސްނާވެގެންވެއެވެ.

ދިވެހިރާއްޖޭގައި އުފައްދާ އަދަބީ އުފެއްދުންތައް ޝާއިޢުކުރުމުގެ ކުރިން އެ އުފެއްދުމެއް ބިއުރޯއަށް ހުށަހަޅައި ފާސްކުރަންވާނެ ކަމަށް ބިލުގައި ބަޔާންކޮށްފައިވެއެވެ. މި ބިލުގައި ބަޔާންކޮށްފައިވާ އެއްވެސް އުފެއްދުމެއް ގިންތިކުރުމަކާ ނުލައި ނުވަތަ ގިންތިކުރުމުގައި ފުރިހަމަކުރަންޖެހޭ ކަންކަން ފުރިހަމަކުރުމަކާ ނުލައި އާންމުކުރުން ނުވަތަ ޝާއިޢުކުރުމަކީ މަނާ ކަމެއް ކަމަށް ބަޔާންކޮށްފައިވެއެވެ. އެފަދަ ޢަމަލެއް ކޮށްފި ނަމަ ޖޫރިމަނާ ކުރެވޭނެ ކަމަށްވެސް ބިލުގައި ބުނެފައިވެއެވެ.