މެމްބަރުކަން ކުރައްވާފައިވާ ބޭފުޅުންގެ އާއިލާ އިންޝުއަރެންސް ސްކީމްގައި ބައިވެރިކުރުުމުގެ މައްސަލައިގައި ކޮމިޓީއަށް ގޮތެއް ނުނިންމި އަނބުރާ ތަޅުމަށް

މެމްބަރުކަން ކުރައްވާފައިވާ ބޭފުޅުންގެ އާއިލާ އިންޝުއަރެންސް ސްކީމްގައި ބައިވެރިކުރުުމުގެ މައްސަލައިގައި އާންމު ކޮމިޓީއަށް ގޮތެއް ނުނިންމި މައްސަލަ އަނބުރާ ތަޅުމަށް ފޮނުވާލައިފިއެވެ.

އާންމު ކޮމިޓީން މިގޮތަށް ނިންމާފައިވަނީ، ރައްޔިތުންގެ މަޖިލީހުގެ މެންބަރުކަން ކުރައްވާފައިވާ ކޮންމެ ބޭފުޅަކަށް ރައްޔިތުންގެ މަޖިލީހުގެ މެންބަރުންނަށް އޮންނަ ފަދަ ހެލްތް އިންޝިއުރަންސް ސްކީމެއްގެ ދަށުން ބޭސްފަރުވާ ކޮށްދޭންވާނެކަމަށް ބަޔާންކޮށްފައިވީ ނަމަވެސް، ރައްޔިތުންގެ މަޖިލީހުގެ މެންބަރުކަން ކުރައްވާފައިވާ ބައެއް މެންބަރުން އެ މެންބަރުގެ އަނބިމީހާ ނުވަތަ ފިރިމީހާ އަދި 18 އަހަރު ނުފުރޭ ދަރިންނަށްވެސް އެފަދަ އިންޝުއަރަންސް ސްކީމެއްގެ ދަށުން ބޭސްފަރުވާގެ ކަންތައް އެ މެންބަރުން އަމިއްލަފުޅަށް ޕްރިމިއަމް ދައްކަވާ ގޮތަށް ހަމަޖައްސަވައިދެއްވުމާއި ގުޅޭގޮތުން ފޮނުއްވާފައިވާ މައްސަލަ ދިރާސާ ކުރުމަށްފަހުގައެވެ. މިއީ ރައްޔިތުންގެ މަޖިލީހުގެ ހުރިހާ މެންބަރުންގެ މަސްލަޙަތު ހިމެނޭކަމަކަށްވާތީ، މި މައްސަލަ ރައްޔިތުންގެ މަޖިލީހުގެ ތަޅުމުން ގޮތެއް ނިންމުމަށް ކޮމިޓީގެ މެމްބަރުންގެ އިއްތިފާގުންވަނީ ނިންމަވާފައެވެ.

ރައްޔިތުންގެ މަޖިލީހުގެ އިމްތިޔާޒުތަކާއި ބާރުތަކުގެ ޤާނޫނުގެ 8 ވަނަ މާއްދާގެ (ޅ) ގައިވާ ގޮތުގެމަތިން ރައްޔިތުންގެ މަޖިލީހުގެ މެންބަރުކަން ކުރައްވާފައިވާ ކޮންމެ ބޭފުޅަކަށް ރައްޔިތުންގެ މަޖިލީހުގެ މެންބަރުންނަށް އޮންނަފަދަ ހެލްތް އިންޝިއުރަންސް ސްކީމެއްގެ ދަށުން ބޭސްފަރުވާ ކޮށްދޭންވާނެކަމަށް ބަޔާންކޮށްފައިވެއެވެ.

ކޮމިޓީގެ ރިޕޯޓުގައި ބުނެފައިވަނީ، މެމްމަރުކަން ކުރައްވާފައިވާ ބޭފުޅުންނަށް މިފަދަ އިނާޔަތެއް ދުނިޔޭގެ އެހެން ގައުމަކުން ފޯރުކޮށްދެތޯ ދިރަސާ ކުރެވުނު ކަމަށާއި، އެފަދަ އެއްވެސް އިނާޔަތެއް އާއިލާ މެމްބަރުންނަށް އެހެން ގައުުމުތަކުން ފޯރުކޮށް ނުދޭކަމަށެވެ.

މަޖިލީހުގެ އިމްތިޔާޒު ގާނޫނު ބުނާ ގޮތުން ބޭސް ފަރުވާ ކޮށްދޭން ލާޒިމްވަނީ ހަމައެކަނި މެމްބަރުކަން ކުރައްވާފައިވާ ބޭފުޅުންނަށެވެ. މިކަމަށްޓަކައި ކޮންމެ އަހަރަކުވެސް ޕްރިމިއަމެއްގެ ގޮތުން މެމްބަރުކަން ކުރައްވާފައިވާ ކޮންމެ ބޭފުޅަކަށް 24،000 ރުފިޔާ މަޖިލީީހުގެ މިިހާރުވެސް ދަނީ ދައްކަމުންނެވެ.