ޕީޖީ އޮފީހުން ކޯޓުތަކަށް ހުށައެޅި މައްސަލަތަކުގެ ތެރެއިން 634 މައްސަލައެއް މިދިޔަ މަހު ކެންސަލް

ޕްރޮސެކިއުޓަރ ޖެނެރަލް (ޕީޖީ) އޮފީހުން ކޯޓުތަކަށް ހުށައެޅި މައްސަލަތަކުގެ ތެރެއިން 634 މައްސަލައެއް މިދިޔަ މަހު ކެންސަލްވެފައިވާކަމަށް އެ އޮފީހުން ބުނެފިއެވެ.

ޕީޖީ އޮފީހުން ވަނީ އެ އޮފީހުގެ ފެބްރުއަރީ މަހުގެ ތަފާސްހިސާބުތައް ހިއްސާކޮށްފައެވެ. އެގޮތުން ފެބްރުއަރީ މަހު 1688 މައްސަލައެއް ކޯޓުތަކުގައި ތާވަލު ކޮށްފައިވާއިރު، އޭގެ ތެރެއިން 1054 މައްސަލައެއް ކުރިއަށް ގެންދެވިފައިވެއެވެ. އަދި 634 މައްސަލައެއް ވަނީ ކެންސަލްވެފައެވެ.

ކްރިމިނަލް ކޯޓަށް ބަލާއިރު، އެ ކޯޓުގައި މައްސަލަތައް ކެންސަލްވި ނިސްބަތް ޖެނުއަރީ މަހާ އަޅާބަލާއިރު ފެބްރުއަރީ މަހު ވަަނީ ދަށް ވެފައެވެ. އެގޮތުން ޖެނުއަރީ މަހު 272 މައްސަލަ ކެންސަލްވެފައިވާއިރު، ފެބްރުއަރީ މަހު ކެންސަލްވެފައިވަނީ 223 މައްސަލައެވެ. ޖެނުއަރީ މަހު ކްރިމިނަލް ކޯޓުގައި ތާވަލު ކޮށްފައިވާ މައްސަލަތަކުގެ ތެރެއިން ބޭއްވިފައިވަނީ 189 މައްސަލައެއް ނަމަވެސް ފެބްރުއަރީ މަހު އެ އަދަދު ވަނީ 388 އަށް އިތުރުވެފައެވެ.

ޑިއުޓީ ޕްރޮސެކިއުޝަން:

ފެބްރުއަރީ މަހު ޑިއުޓީ ޕްރޮސެކިއުޝަނަށް 144 މައްސަލަ ހުށައެޅިފައިވާއިރު، އޭގެ ތެރެއިން 10 މައްސަލައެއްގައި ދައުވާ ނުކުރަން ނިންމާފައިވެއެވެ. އަދި 60 މައްސަލައެއް އިތުރު މައުލޫމާތު ސާފު ކުރުމަށް އަނބުރާ ފޮނުވާލާފައިވެއެވެ.

ޕީޖީ އޮފީހުން މައުލޫމާތު ދޭ ގޮތުގައި އެ މުއްދަތުގެ ތެރޭގައި 50 މައްސަލައެއް އެ އޮފީހުން ވަނީ ޑިއުޓީ ޕްރޮސެކިއުޝަނަށް ބަލައިގެންފައެވެ. އަދި މިހާރުވެސް 18 މައްސަލައެއް ދިރާސާ ކުރަމުންދާކަން ވަނީ ފާހަގަކޮށްފައެވެ.

ޑިއުޓީ ޕްރޮސެކިއުޝަނަށް ހުށައެޅިފައިވާ މައްސަލަތަކުގެ ތަފްސީލަށް ބަލާއިރު، އެންމެ ގިނައިން ހުށައެޅިފައިވަނީ މަސްތުވާތަކެތި ބޭނުން ކުރުމާއި ގުޅޭ މައްސަލަތަކެވެ. އެގޮތުން އެބާވަތުގެ 35 މައްސަލައެއް ހުށައެޅިފައިވާއިރު، މަސްތުވާތަކެތި ޓްރެފިކް ކުރުމާއި ގުޅޭ 28 މައްސަލައަކާއި، ވައްކަމާއި ގުޅޭ 23 މައްސަލައެއްވެސް ހިމެނެއެވެ.

ޑިއުޓީ ޕްރޮސެކިއުޝަން އަކީ ތަހުގީގީ އިދާރާތަކުން ދައުވާ ކޮށްދިނުން އެދި މައްސަލައެއް ޕީޖީއަށް ފޮނުވުމުގެ ކުރިން، އެ މައްސަލައަކާއި މެދު ތަހުގީގީ އިދާރާ އާއި ޕީޖީ އޮފީހާއި ދެމެދު މައުލޫމާތު ބަދަލުކޮށް، ލަފާ ދިނުމާއި މަޝްވަރާކުރުމެވެ.

މިހާރު ކުރިއަށްގެންދާ އުސޫލުން ޑިއުޓީ ޕްރޮސެކިއުޝަންގެ މަރުހަލާ ފުރަތަމަ ފަށާފައިވަނީ ޕީޖީގެ މަގާމާއި ހުސެއިން ޝަމީމް ހަވާލު ވެވަޑައިގެންނެވި ފަހުންނެވެ. މި މަރުހަލާ ތައާރަފު ކުރަން ނިންމީ އެމްއެމްޕީއާރުސީ މައްސަލައިގައި ޕީޖީ އޮފީހުގައި ކަން ހިނގައި ދިޔަ ގޮތް ބެލުމަށްޓަކައި ހެދި އިންޓަރނަލް އިންކުއަރީގައި، އެއްވެސް ހަމައެއް ނެތި ބައެއް މައްސަލަތައް ބަލައިގަނެފައިވާކަން ހާމަވުމުންނެވެ.

ޑިއުޓީ ޕްރޮސެކިއުޝަންގެ ސަބަބުން ތަހުޤީޤީ އިދާރާތަކާއި ގުޅިގެން ބޮޑެތި މައްސަލަތައްވެސް ދެބަސްވުމެއް ނުވަތަ ޙިޔާލު ތަފާތުވުމެއް ނެތި ކޯޓަށް ހުށައެޅި ޝަރީއަތްތައް ކުރިއަށްދާނެކަން ޕީޖީ އޮފީހުން ފާހަގަކޮށްފައިވެއެވެ.