ބްލެކްސްޓޯއިން ޓީއެމްއޭގެ މެޖޯރިޓީ ހިއްސާ ވިއްކާލަނީ
އެމެރިކާގެ ބްލޫމްބާރގްއިން ރިޕޯޓްކޮށްފައިވާ ގޮތުގައި ޓީއެމްއޭގެ މެޖޯރިޓީ ހިއްސާ ވިއްކާލުމުގެ އަގު އެއް ބިލިއަން ޑޮލަރަށް އަރާނެ
އެމްއޭގެ ހިއްސާ ގަތުމަށް ޗައިނާގެ ޒޮންޝެން ގްރޫޕުން ވަނީ ޝައުގުވެރިކަން ފާޅުކޮށްފައި
ޓްރާންސް މޯލްޑިވިއަން އެއާވޭސްގައި ހިއްސާ އޮންނަ އެމެރިކާގެ ކުންފުންޏެއް ކަމަށްވާ ބްލެކްސްޓޯންގެ ހިއްސާ އެއް ބިލިއަން ޑޮލަރަށް ވިއްކާލަން އުޅޭ ކަމުގެ އަޑު ފެތުރިއްޖެއެވެ.
އެމެރިކާގެ އޮންލައިން ނޫހެއް ކަމަށްވާ ބްލޫމްބަރގްއިން ރިޕޯޓް ކޮށްފައިވާ ގޮތުގައި ޓީއެމްއޭގެ މެޖޯރިޓީ ހިއްސާ ގަތުމުގެ ޝައުގުވެރިކަން އެހެނިހެން ކުންފުނިތަކުން ފާޅުކުރުމާ އެކު ބްލެކްސްޓޯއިން ދަނީ އެ އޮޕްޝަންތައް ބަލަމުންނެވެ.. އެގޮތުން، އެ ކުންފުނިން މިހާރު ދަނީ މާލީ ލަފާދޭ ފަރާތްތަކާ އެކު މަސައްކަތް ކުރަމުން ކަމަށް ވެސް ބްލޫމްބަރގްއިން ރިޕޯޓް ކޮށްފައިވެއެވެ.
ޓީއެމްއޭގެ މެޖޯރިޓީ ހިއްސާ ވިއްކާލުމުގެ އަގު އެއް ބިލިއަން ޑޮލަރަށް އަރާނެ ކަމަށް ލަފާ ކުރެވޭ ކަމަށް ބްލެކްސްޓޯންގެ މުވައްޒަފުން މައުލޫމާތު ދީފައިވާ ކަމަށް ބްލޫމްބަރގްއިން ބުންޏެވެ. ނަމަވެސް ބްލެކްސްޓޯން އިން އަދި ގޮތެއް ނިންމާފައި ނުވާކަމަށާއި، ޓީއެމްއޭގެ ހިއްސާ ނުވިއްކުމަށް ވެސް ނިންމަފާނެ ކަމަށް އެމީހުން ބުނެފައިވެއެވެ.
2013 ވަނަ އަހަރު ޓީއެމްއޭގެ ހިއްސާ ގަނެފައިވާ ބްލެކްސްޓޯނުން ހިއްސާ ވިއްކާލަން މަސައްކަތް ކުރާކަމަށް ބްލޫމްބަރގްއިން ރިޕޯޓް ކޮށްފައި މިވަނީ ޓީއެމްއޭގެ ހިއްސާއެއް ގަތުމުގެ ޝައުގުވެރިކަން ޗައިނާގެ ޒޮންޝެން ގްރޫޕުން ފާޅުކޮށްފައިވަނިކޮށެވެ.
