ވިހެއުމުގެ ޗުއްޓީ ފަނޑިޔާރުންނަށްވެސް ލިބިދޭ ގޮތަށް ހުށައެޅި އިސްލާހު ފާސްކޮށްފި
ސަރުކާރުގެ ފަރާތުން މި ބިލު ހުށަހެޅުއްވީ، ކަނޑިތީމު ދާއިރާގެ އަބްދުﷲ ޝަހީމް އަބްދުލް ހަކީމް
ރައްޔިތުންގެ މަޖިލީހުގެ ޖަލްސާގެ ތެރެއިން- ހޯމަ ދުވަހުގެ މަޖިލީހުގެ ޖަލްސާގައި ބިލު ފާސްކޮށްފައިވަނީ 57 މެމްބަރުން ވޯޓުން
ވިހެއުމުގެ ޗުއްޓީ ފަނޑިޔާރުންނަށްވެސް ލިބިދޭ ގޮތަށް ފަނޑިޔާރުންގެ ޤާނޫނަށް އިސްލާހު ގެނައުމުގެ ބިލު ރައްޔިތުންގެ މަޖިލީހުން ފާސްކޮށްފިއެވެ.
ހޯމަ ދުވަހުގެ މަޖިލީހުގެ ޖަލްސާގައި ބިލު ފާސްކޮށްފައިވަނީ 57 މެމްބަރުން ވޯޓުންނެވެ.
ސަރުކާރުގެ ފަރާތުން މި ބިލު ހުށަހެޅުއްވީ، ކަނޑިތީމު ދާއިރާގެ އަބްދުﷲ ޝަހީމް އަބްދުލް ހަކީމެވެ. މި އިސްލާހަކީ ދައުލަތުގެ މުވައްޒަފުންނަށް މިހާރުވެސް ދެމުން އަންނަ ވިހެއުމުގެ ޗުއްޓީ ފަނޑިޔާރުންނަށްވެސް ދިނުމަށްޓަކައި ފަނޑިޔާރުންގެ ގާނޫނަށް ހުށަހެޅުނު އިސްލާހެކެވެ.
މި އިސްލާހަށް ވާހަކަދެއްކެވި މެމްބަރުން ވިދާޅުވީ، ފަނޑިޔާރުންނަށް ޗުއްޓީ ލިބެން ޖެހޭނެ ކަމަށް ގަބޫލުކުރައްވާކަމަށެވެ. އެހެންނަމަވެސް މިހާރުވެސް ކޯޓުތަކުގައި މައްސަލަތައް ލަސްވަމުންދާކަމުގެ ކަންބޮޑުވުން އެބައޮތް ކަމަށްވެސް ބައެއް މެމްބަރުން ވިދާޅުވިއެވެ. އަދި ވަޒީފާ އާއި ބެހޭ ޤާނޫނު ހިނގާ ހުރިހާ އެންމެންނަށް ލިބެން ޖެހޭ ޗުއްޓީގެ ވާހަކައެއް ގާނޫނެއްގައި އޮތުން މުހިންމު ކަމަށްވެސް މެމްބަރުން ވިދާޅުވިއެވެ.
ވިހެއުމާއި ގުޅިގެން ދައުލަތުގެ މުވައްޒަފުންނަށް ދޭ ޗުއްޓީ މިހާރު ލިބެނީ ސިވިލް ސާރވިސް މުވައްޒަފުންނާއި ދައުލަތުގެ ކުންފުނިތަކުގެ މުވައްޒަފުންނަށާއި ބައެއް މިނިވަން މުއައްސަސާތަކުގެ މުވައްޒަފުންނަށެވެ.
