ވޭސްޓް މެނޭޖްމެންޓް ސެންޓަރުތަކާއެކު ކުނީގެ މައްސަލަ ހައުލުވެގެންދާނެ - ޝައުނާ
އައްޑޫގައި 50 ޓަނުގެ ވޭސްޓް އެނަރޖީ ޕްލާންޓެއް މިހާރު ހުންނާނެ
މިނިސްޓަރ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް ޓެކްނޮލޮޖީ އާމިނަތު ޝައުނާއާއި ސުވާލުކުރެއްވުން
ވޭސްޓް މެނޭޖްމެންޓް ސެންޓަރުތަކާއެކު ކުނީގެ މައްސަލަ ހައުލުވެގެންދާނެ ކަމަށް މިނިސްޓަރ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް ޓެކްނޮލޮޖީ އާމިނަތު ޝައުނާ ވިދާޅުވެއްޖެއެވެ.
ރައްޔިތުންގެ މަޖިލީހުގައި މެމްބަރުން ކުރެއްވި ސުވާލުތަކަށް ޖަވާބު ދެއްވަމުން މިިނިސްޓަރު ވިދާޅުވީ، ރާއްޖޭގައި މީގެ ކުރިން އޮތީ ކުނި ޖަމާކުރުމުގެ އުސޫލް ކަމަށާއި، ކުނިން އާމްދަނީ ހޯދުމުގެ ވިސްނުމެއް ނެތް ކަމަށެވެ. އެހެންނަމަވެސް ކުނީގެ މައްސަލަ ހައްލު ކުރަމަށް މިހާރު މަސައްކަތް ފެށިގެން ކުރިއަށްދާކަމަށާއި، އެމަސައްކަތުގެ ތެރެއިން ކުނި ވަކިކޮށްފައި ބަހައްޓާނެ ތަނެއް ހުންނާނެ ކަމަށެވެ.
އެގޮތުން 3 ސަރަހައްދެއްގައި ރީޖނަލް ވޭސްޓް މެނެޖްމެންޓް ސެންޓަރު ގާއިމް ކުރެވިގެންދާނެ ކަމަށާއި، ރ. ވަންދޫގެ ވޭސްޓް މެނޭޖްމަންޓް ސެންޓަރު ޖޫން މަހު އޮޕަރޭޝަނަށް ގެނެވޭނެ ކަމަށެވެ. ތިލަފުށީގެ ސެންޓަރުގެ ފުރަތަމަ ފޭސްގެ އިންފްރާސްޓްރަކޗަރ މަސައްކަތް މިހާރު ނިމިފައިވާ ކަމަށާއި، އައްޑޫގެ ވޭސްޓް މެނޭޖްމެންޓް ސެންޓަރުވެސް މި އަހަރު އޮޕަރޭޓް ކުރަން ފަށާނެ ކަމަށް މިނިސްޓަރު ވިދާޅުވިއެވެ. މިނިސްޓަރު ވިދާޅުވީ، އައްޑޫގައި 50 ޓަނުގެ ވޭސްޓް އެނަރޖީ ޕްލާންޓެއް މިހާރު ހުންނާނެ ކަމަށެެވެ.
ރީޖަނަލް ވޭސްޓް މެނޭޖްމަންޓް ސެންޓަރުތައް ފުރިހަމައަށް މަަސައްކަތް ކުރުުގެ ގޮތުން ވޭސްޓް ކަލެކްޝަން ސެންޓަރުތަކެއްވެސް ގާއިމް ކުރެވިގެންދާނެކަންވެސް މިނިސްޓަރު ފާހަގަކުރެއްވިއެވެ.
މިއާއެކު ކުނީގެ މައްސަލައަށް ހައްލު ލިބގެންދާނެ ކަމަށް މިނިސްޓަރު ވިދާޅުވިއެވެ.
ހއ، ހދ އަދި ށ ގެ ކުނީގެ މައްސަލަ ހައްލު ކުރުމަށް އޮފިޑާއެކު މަސައްކަތް ކުރަމުންދާ ކަމަށާއި، އަމާޒަކީ ވޭސްޓް ޓްރާންސްފަރ ސެންޓަރުތައް ޖޫން މަހު އޮޕަރޭޝަނަށް ގެނައުން ކަމުގައި މިނިސްޓަރު ވިދާޅުވިއެވެ.
އެތައް އަހަރެއް ވަންދެން ތިލަފުށިން އަރަމުންދިޔަ ދުން ހުއްޓުމަކަށް ގެނެވިފައިވުން އެއީ ބޮޑު ކާމިޔާބީއެއް ކަމަށްވެސް ވިދާޅުވިއެވެ. ރިސޯޓްތަކުންވެސް ގެނެވޭ ކުނިވެސް މެނޭޖް ކުރެވޭނެ އިންތިޒާމްތައް މިހާރު ތިލަފުށީގައި ހުންނާނެ ކަމަށް އެންވަޔަރަމަންޓް މިނިސްޓަރު ވިދާޅުވިއެވެ.
