މިއަހަރު ނިމޭއިރު އެމްޓީސީސީގެ ފައިދާ 300 މިލިއަނުން މަތިން ހާސިލްކުރުމަށް އަމާޒު ހިފައިފިއެވެ.

މިދިޔަ 2021 ވަނަ އަހަރު އެމްޓީސީސީއަށް ވަނީ އެ ކުންފުނީގެ 41 އަހަރުގެ ތާރީޚުގައިވެސް ނުލިބޭ ވަރުގެ ބޮޑު ފައިދާއެއް ލިބިފައެވެ. ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަދައްކަވަމުން އެމްޓީސީސީގެ ސީއީއޯ އާދަމް އާޒިމް ވިދާޅުވީ ކުންފުނީގެ ހިންގުމާ ހަވާލުވެވަޑައިގެން އަމާޒު ހިއްޕެވީ ކޮންމެ އަހަރަކުވެސް 50 މިލިއަން ރުފިޔާގެ ފައިދާ އިތުރަށް ހޯދެއްވުމަށް ކަމަށެވެ.

2019 ވަނަ އަހަރު ކުންފުނީފެ ހިންގުމާ ހަވާލުވެވަޑައިގެންނެވިއިރު ލިބެމުން އައީ ވަރަށް ކުޑަ ފައިދާއެއް ކަމަށާއި އެހެންނަމަވެސް ގިނަ މަސައްކަތަށް ފަހު އެއަހަރު 50 މިލިއަން ރުފިޔާގެ ފައިދާއެއް ހޯއްދަވާފައިވާކަމަށް އާޒިމް ވިދާޅުވިއެވެ.

2020 ވަނަ އަހަރު އަމާޒު ހިފީ 200 މިލިއަން ރުފިޔާގެ ފައިދާއެއް ހޯދުއްވުމަށް ކަމަށާއި، އެ އަހަރު 224 މިލިއަންގެ ފައިދާއެއް ހާސިލްކުރެވުނު ކަމަށް އާޒިމް ވިދާޅުވިއެވެ. އަދި 2021 ވަނަ އަހަރު 270 މިލިއަން ރުފިޔާގެ ފައިދާ ވެފައިވާކަމަށާއި މިއަހަރު ނިމޭއިރު، 300 މިލިއަން ރުފިޔާގެ ފައިދާއެއް ހޯދުމަށް އަމާޒު ހިފާފައި ވާނެ ކަމަށް އާޒިމް ވިދާޅުވިއެވެ.

މިދިޔަ އަހަރުގެ ހަތަރުވަނަ ކުއާޓަރުގައި ސާފު ފައިދާގެ ގޮތުގައި އެމްޓީސީސީއަށް ލިބިފައިވަނީ 224.6 މިލިއަން ރުފިޔާއެވެ. 2020 ވަނަ އަހަރާ އަޅާ ބަލާއިރު، 2021 ވަނަ އަހަރުގެ ސާފު ފައިދާ ވަނީ 15 އިންސައްތައިން އިތުރުވެފައެވެ. އެމްޓީސީސީގެ މާލީ ރިޕޯޓުގައިވާ ގޮތުން 2021 ވަނަ އަހަރުގެ ހަތަރުވަނަ ކުއާޓަރުގެ ނިޔަލަށް އެކުންފުނިން ވަނީ ޖުމްލަ 1.96 ބިލިއަން ރުފިޔާގެ ވިޔަފާރި ކޮށްފައެވެ.