އިނގިރޭސި ޕްރިމިއަރ ލީގުގައި ލިވަޕޫލް އާއި ވެސްޓްހޭމް ޔުނައިޓެޑް ބައްދަލުކުރި މެޗުން މޮޅުވެ ތާވަލުގެ އެއްވަނައާއި ގާތަށް ލިވަޕޫލް ޖެހިލިއިރު، ބޮޑު ތަފާތަކުން ޗެލްސީ ބާންލީ ބަލިކޮށްފިއެވެ.

ލިވަޕޫލްގެ ދަނޑުގައި ވެސްޓެހޭމް އާއި ބައްދަލުކުރި މެޗުން ލިވަޕޫލް ކުރިހޯދީ 1-0 ގެ ނަތީޖާއަކުންނެވެ. ފުރަތަމަ ހާފުގެ 27 ވަނަ މިނެޓުގައި ޓްރެންޓް އަލެކްސަންޑަ އާނޯލްޑް ނެގި ހުރަހަކުން ލިވަޕޫލްއަށް ލަނޑު ޖަހައިދިނީ ސަޑިއޯ މާނޭއެވެ.

މީގެ އިތުރުންވެސް ލަނޑު ޖެހުމަށް ދެ ޓީމަށްވެސް ރަނގަޅު ފުރުސަތުތަކެއް ލިބުނެވެ. އެގޮތުން ލިވަޕޫލްގެ މުހައްމަދު ސަލާހް ޖެހި ބޯޅަ ވެސްޓްހޭމްގެ ކީޕަރު ލޫކަސް ފަބިއަންސްކީ މަތަކުރިއިރު، ވެސްޓް ހޭމްގެ ފޯވާޑް މިކޭލް އެންޓޯނިއޯ ފޮނުވާލި ދެ ހަމަލާވެސް ދިފާއު ކުރީ ލިވަޕޫލްގެ ކީޕަރު އެލިސަން ބެކާއެވެ.

މި ނަތީޖާ އާއެކު ލިވަޕޫލް ތާވަލުގެ ދެވަނައިގައި އޮތީ 27 މެޗު ކުޅެގެން ލިބުނު 63 ޕޮއިންޓާއެކުއެވެ. ތާވަލުގެ އެއްވަނައިގައި މެންޗެސްޓަރ ސިޓީ އޮތީ 27 މެޗު ކުޅެ 66 ޕޮއިންޓު ހޯދާއިގެންނެވެ.

ޕްރިމިއަރ ލީގުގައި ޗެލްސީއާއި ބާންލީ ބައްދަލުކުރި މެޗުން ޗެލްސީ މޮޅުވީ 4-0 ގެ ނަތީޖާއަކުންނެވެ. މި މެޗުގައި ޗެލްސީއަށް ލަނޑު ޖަހައިދިނީ ރީސް ޖޭމްސް، ކައި ހަވާޓްޒް އަދި ކްރިސްޓިއަން ޕުލިސިޗްއެވެ. މި މެޗުގައި ހަވާޓްޒް ދެ ލަނޑު ޖެހިއެވެ.

މި ނަތީޖާއާއެކު ޗެލްސީ އޮތީ 53 ޕޮއިންޓާއެކު ތާވަލުގެ ތިންވަނައިގައެވެ. ވެސްޓްހޭމް ފަސްވަނައިގައި އޮތީ 45 ޕޮއިންޓު ލިބިގެންނެވެ.

ޕްރިމިއަރ ލީގުގައި ހޮނިހިރު ދުވަހުގެ ރޭ ކުޅުނު އެހެން މެޗުތަކަށް ބަލާއިރު، ލެސްޓަރ ސިޓީ ވަނީ 1-0 ގެ ނަތީޖާއަކުން ލީޑްސް ޔުނައިޓެޑް ބަލިކޮށްފައެވެ. ސައުތެމްޓަން އަތުން 4-0 ގެ ނަތީޖާ އަކުން އެސްޓަން ވިލާ ކުރިހޯދިއިރު، ބްރެންޓްފޯޑް ނޯވިޗް ސިޓީ ބަލިކުރީ 3-1 އިންނެވެ. އަދި ނިއުކާސަލް އަތުން 3-1 ން ބްރައިޓަން ބަލިވިއިރު، ކްރިސްޓަލް ޕެލެސް ވަނީ 2-0 ގެ ނަތީޖާއަކުން ވުލްވްސް ބަލިކޮށްފައެވެ.