ދުބާއީގެ މިއުޒިއަމް އޮފް ފިއުޗަރއިން ދުނިޔޭގެ ކުރިމަގަށް ދަތުރެއް

ދުބާއީގެ މިއުޒިއަމް އޮފް ފިއުޗަރއިން ދުނިޔޭގެ ކުރިމަގު ދައްކާލައިފިއެވެ.

މި މިއުޒިއަމް ފަރުމާކޮށްފައިވަނީ އެތަނަށް ދާ މީހުންނަށް ކުރިމަގަށް ދަތުރުކޮށްލުމުގެ އިހުސާސް ކުރެވޭ ފަދަ ގޮތަކަށެވެ. މިގޮތުން 2071 ވަނަ އަހަރާ ހަމައަށް ދަތުރުކޮށްލުމުގެ އިހުސާސް އެ މިއުޒިއަމްއަމްއަށް ދާ މީހުންނަށް ކޮށްލެވޭނެއެވެ. ކުރިމަގަށް ދަތުރުކޮށްލުމަށް އެމީހުން އަރަންޖެހެނީ އުޅަނދަކަށެވެ. އެ އުޅަނދަށް އަރައިގެން ދެވެނީ ލައިބްރަރީއަކަށެވެ. އެ ލައިބްރަރީން ކުރިމަގުގައި ވެދާނެ ކަންކަން ފެންނަން ހުންނާނެއެވެ. އަދި އެތަނުގައި އެތައް ހާސް ޑީއެންއޭ ސާމްޕަލްވެސް ރައްކާކުރެވިފައިވެއެވެ.

ހަތް ފަންގިފިލާގެ މި އިމާރަތް ރަސްމީކޮށް ހުޅުިވައިދެއްވީ ދުބާއީގެ ވެރިޔާ ޝައިޚް މުހައްމަދު ބިން ރާޝިދު އަލް މަޚްތޫމެވެ. މިއީ 77 މީޓަރުގެ ދިގު އިމާރާތެކެވެ. މި އިމާރާތުގެ ބޭރު ފަރުމާކޮށްފައިވަނީ ދަބަރު ނުޖަހާ ދަގަނޑު ބޭނުންކޮށްގެންނެވެ. އަދި އެތަނުގައި ބޭރުގައި، އަރަބިން އެކި ލިއުން ތައް ލިޔެފައިވެއެވެ.

މި މިއުޒިއަމުން ދައްކައިދޭނީ ބައި ގަރުނު ފަހުން ދުނިޔޭގައި މީހުން ދިރިއުޅެމުންދާނެ ގޮތެވެ. އަދި ބައި ގަރުނުފަހުން ޓެކްނޮލޮޖީގެ ގޮތުން ކުރިއަރައިގެންދާނެ މިންވަރުވެސް މި މިއުޒިއަމުން ފެނިގެންދާނެއެވެ. މިއުޒިއަމްގެ ހޯލް ތެރޭގައި "ހީލް އިންސްޓިޓިއުޓް"އެއް ގާއިމްކޮށްފައިވެއެވެ. އެއީ ދުނިޔޭގެ މާހައުލު ސަލާމަތްކުރުމާ ގުޅޭގޮތުން އެކި ދިރާސާތައް ހެދުމަށް ގާއިމްކޮށްފައިވާ ތަނެކެވެ. އަދި ހަނދުން ހަކަތަ ބޭނުންކޮށްގެން މުޅި ދުނިޔެއަށް ހަކަތަ ފޯރުކޮށްދިނުމުގެ ވިސްނުމުގައި ގާއިމްކޮށްފައިޗާ 'ސޯލް" ޕްރޮޖެކްޓް ވެސް އެ ހޯލުތެރެއިން ފެންނާން ހުރެއެވެ.

ޔޫއޭއީގެ މިނިސްޓަރ އޮފް ސްޓޭޓް ފޮރ އެޑްވާންސްޑް ޓެކްނޮލޮޖީ އަދި އެގައުމުގެ ސްޕޭސް އެޖެންސީގެ ޗެއަރ ސަރާހް އަލް-އަމީރީ ވިދާޅުވީ މި މިއުޒިއަމްގެ ސަބަބުން ވަރަށް ބޮޑު ބަދަލެއް ގެނުވާނެ ކަމަށެވެ. މިއުޒިއަމުން ފެންނަން ހުންނަ ކަންކަމުން އެތަނަށް ދާ މީހުންނަށް އެކި ކަންކަން ކުރުމަށް ހިތްވަރު ލިބިގެންދާނެ ކަމަށް އޭނާ ވިދާޅުވިއެވެ.

މީގެ އިތުރުން ނަފްސާނީ ދުޅަހެޔޮކަމަށް ޚާއްސަ ފަންގިފިލާއެއްވެސް މި މިއުޒިއަމުގައި ވެއެވެ. "އަލް ވަހާ"ގެ ނަމުން ނަން ދީފައިވާ މި ފަންގިފިލާގައި ޓެކްނޮޮޖީއާއި ދުނިޔަވީ އެހެނިގެން ކަންކަމުން ދުރަށް ޖެހިލައި "މެޑިޓޭޓް" ކުރުން ފަދަ ކަންކަން ކުރެވެއެވެ.