މިހާރު ވެސް 20 ރަށެއްގެ ފެނާއި ނަރުދަމާގެ ޕްރޮޖެކްޓްގެ މަސައްކަތް ކުރިއަށް އެބަދޭ: ޝާހު

މޯލްޑިވްސް ވޯޓަރ އެންޑް ސެވެރޭޖް ކޮމްޕެނީ (އެމްޑަބްލިއުއެސްސީ) އިން 20 ރަށެއްގެ ފެނާއި ނަރުދަމާގެ ޕްރޮޖެކްޓްގެ މަސައްކަތް ކުރިއަށްގެންދާ ކަމަށް އެކުންފުނީގެ މެނޭޖިންގ ޑިރެކްޓަރ ހަސަން ޝާހު ވިދާޅުވެއްޖެއެވެ.

އެމްޑަބްލިއުއެސްސީން ކުރަމުންދާ މަސައްކަތްތަކާއި ގުޅޭގޮތުން ރާއްޖެޓީވީގައި ވާހަކަދައްކަވަމުން ޝާހު ވިދާޅުވީ އެމްޑަބްލިއުއެސްސީގެ ފަރާތުން އެންމެ ފުރަތަމަ ފެނާއި ނަރުދަމާގެ ޚިދުމަތް ފޯރުކޮށް ދޭން ފެށީ ގްރޭޓަރ މާލެ ސަރަހައްދަށް ކަމަށެވެ. އެއީ މާލެ، ވިލިމާލެ، ގުޅީފަޅު އަދި ތިލަފުއްޓައްކަން ޝާހު ފާހަގަކުރެއްވިއެވެ. މިހާރު ޚިދުމަތް ފުޅާކުރަމުންދާކަން ފާހަގަކުރައްވައި ޝާހު ވިދާޅުވީ ރ.ދުވާފަރު، ކުޅުދުއްފުށި ސިޓީ، އަދި ކ.މާފުށުއްޓަށް ފެނާއި ނަރުދަމާގެ ޚިދުމަތް ފޯރުކޮށްދެމުންދާ ކަމަށެވެ.

އެމްޑަބްލިއުއެސްސީގެ ބިޒްނަސް ޕްލޭނަށް އިޝާރާތް ކުރައްވައި ޝާހު ވިދާޅުވީ އެ ޕްލޭނާއި އެއްގޮތަށް މަސައްކަތް ކުރުމަށް ބާރު އަޅާ ކަމަށާއި، މަސައްކަތް ކުރަމުންދަނީ ޕްރޮޖެކްޓްތައް ކުރިއަށް ގެންދިޔުމަށް ކަމަށެވެ. އެގޮތުން މިހާރު ސަރުކާރުގެ އެއްބާރުލުމާއެކު 20 ރަށެއްގެ ފެނާއި ނަރުދަމާ ނިޒާމު ގާއިމްކުރުމުގެ މަސައްކަތް ކޮންޓްރެކްޓް ފައިނޭންސްގެ އުސޫލުން ކުރިއަށްދާ ކަމަށް ޝާހު ވިދާޅުވިއެވެ. އަދި ވިދާޅުވީ ކުރީގެ ސަރުކާރުތަކުން ފަށާފައިވާ ބައެއް ޕްރޮޖެކްޓްތަކުގެ މަސައްކަތް ވެސް އެމްޑަބްލިއުއެސްސީން ކުރަމުންދާ ކަމަށެވެ.

މިހާރު ވެސް 20 ރަށެއްގެ ފެނާއި ނަރުދަމާގެ ޕްރޮޖެކްޓް ކުރިއަށްދާކަން ޝާހު ފާހަގަކުރައްވާފައިވާއިރު، ފެނާއި ނަރުދަމާގެ އަސާސީ ޚިދުމަތް މީހުން ދިރިއުޅޭ ހުރިހާ ރަށަކަށް ފޯރުކޮށްދިނުމަކީ މިސަރުކާރުގެ ވައުދެކެވެ. އެގޮތުން އެ އަމާޒަށް ވާސިލް ކުރުމަށް ސަރުކާރުން ދަނީ ގިނަ މަސައްކަތްތައް ކުރަމުންނެވެ.

އެމްޑަބްލިއުއެސްސީން މައުލޫމާތު ދޭ ގޮތުގައި ފާއިތުވި 3 އަހަރު ތެރޭގައި އެކުންފުނިން ރާއްޖޭގައި ހިންގާފައިވާ އެކި ޕްރޮޖެކްޓްތަކަށް 1.8 ބިލިއަން ރުފިޔާ އަރައެވެ. މިސަރުކާރުގައި ގިނަ ޕްރޮޖެކްޓްތަކެއް ހިންގުމަށް ސަރުކާރުގެ އެއްބާރުލުން ލިބޭއިރު، އެމްޑަބްލިއުއެސްސީގެ އަމާޒަކީ ރައްޔިތުންނަށް ސާފު ބޯފެނާއި ރައްކާތެރި ނަރުދަމާ ނިޒާމެއް ލިބި ވެށީގެ ރައްކާތެރިކަން ހޯދައިދިނުމެވެ.