ދަރިވަރަކު ޔޫކްރެއިންގައި ރަހީނުކޮށްފައިވާ ކަމުގެ ރިޕޯޓް ލިބިފައެއްނުވޭ: އިންޑިޔާ

ޔޫކްރެއިންގައި އިންޑިޔާ ދަރިވަރަކު ރަހީނުކޮށްފައިވާކަމުގެ އެއްވެސް ރިޕޯޓެއް ލިބިފައިނުވާކަމަށް އިންޑިޔާއިން ބުނެފިއެވެ.

އިންޑިޔާއިން މިހެން ބުނީ ޚާރްކީވްގައި ޔޫކްރެއިންގެ ކަމާބެހޭ އިދާރާތަކުން ގަދަކަމުން ގިނަ އަދަދެއްގެ ބަޔަކު ހިފަހައްޓާފައިވާކަމަށް ރަޝިޔާއިން ތުހުމަތުކުރުމާއި ގުޅިގެންނެވެ. ރަޝިޔާއިން ތުހުމަތުކުރާ ގޮތުގައި ޔޫކްރެއިން އިން އަންނަނީ އިންސާނުން ހަނގުރާމައިގެ ނިވާފަތްގަނޑެއްގެ ގޮތުގައި ބޭނުންކުރަމުންނެވެ.

އިންޑިޔާގައި ހުންނަ ރަޝިޔާ އެމްބަސީން ކޮށްފައިވާ ޓްވީޓެއްގައި ބުނެފައިވަނީ ޔޫކްރެއިންގެ ސަލާމަތީ ފައުޖުތަކުން އިންޑިޔާގެ ކިޔަވާކުދިން ރަހީނުންގެ ގޮތުގައި ބޭނުންކުރަމުން އަންނަކަމަށާއި ނިވާފަތްގަނޑެއްގެ ގޮތުގައި އެކުދިން ބޭނުންކުރަމުން އަންނަކަމަށެވެ.

ޔޫކްރެއިންގެ އިރުމަތީ ސަރަހައްދަކީ އެންމެ ބޮޑަށް ރަޝިޔާއިން ދެމުންދާ ހަމަލާތަކުގެ ގެއްލުންވަމުންދާ ސަރަހައްދެވެ. 1.5 މިލިއަން މީހުން ދިރިއުޅެމުން އަންނަ އެސަރަހައްދުގައި އިންޑިޔާގެ ގިނަ އަދަދެއްގެ ކިޔަވާކުދިން ވަނީ ނިކުމެވޭނެ ގޮތެއް ނެތި ތާށިވެފައެވެ. އަދި މެޑިސިން ކިޔަވަމުންދިޔަ އިންޑިޔާ ދަރިވަރަކު އަންގާރަ ދުވަހު ވަނީ ޚާރްކީވްއަށް ރަޝިޔާއިން ދިން ހަމަލާތަކެއްގައި މަރުވެފައެވެ.

އިންޑިޔާގެ ފޮރިން މިނިސްޓްރީގެ ސްޕޯކްސްޕާސަން އަރިންދަމް ބަގްޗީ ނެރުއްވި ބަޔާނެއްގައި ވިދާޅުވީ ޚާރްކީވްގައި ތިބި ގިނަ އަދަދެއްގެ ކިޔަވާކުދިންނަށް އެސަރަހައްދުން ބޭރަށް ނިކުތުމުގައި ޔޫކްރެއިންގެ ކަމާބެހޭ އިދާރާތަކުން ވަނީ އެހީތެރިކަން ފޯރުކޮށްދީފައިވަކަމަށެވެ. ނަމަވެސް އެއްވެސް ދަރިވަރަކު ރަހީނުކުރި ކަމުގެ އެއްވެސް މައުލޫމާތެއް ލިބިފައިނުވާކަމަށްވެސް ބަޔާނުގައި ބުނެފައިވެއެވެ.

ބުދަ ދުވަހު އިންޑިޔާގެ ބޮޑުވަޒީރު ނަރެންދްރަ މޯދީ ވަނީ ރަޝިޔާގެ ރައީސް ވްލަޑްމިއަރ ޕުޓިން އާއި ޔޫކްރެއިންގައި ތިބި އިންޑިޔާ ކިޔަވާކުދިން އަމާން ރައްކާތެރި ގޮތަކަށް ޔޫކްރެއިން އިން ނިކުމެވޭނެ ގޮތަކާއި ގުޅޭގޮތުން މަޝްވަރާކުރައްވާފައެވެ.

އިންޑިޔާގައި ހުންނަ ރަޝިޔާ އެމްބަސީން ބުނެފައިވަނީ ޚާރްކީވްގައި ތިބި އިންޑިޔާ ކުދިން އެތަނުން ރައްކާތެރިކަމާއެކު ނެރެވޭނެ ގޮތެއް އިންތިޒާމުކުރަމުންދާކަމަށެވެ.

ޔޫކްރެއިން ސަރުކާރާގެ ތަފާސްހިސާބުތައް ދައްކާގޮތަށް ޔޫކްރެއިންގައި އެކި ގައުމުތަކުގެ ކިޔަވާކުދިންގެ ގޮތުގައި 76،000 ކުދިން އުޅެއެވެ. އޭގެތެރެއިން ތިންބައިކުޅަ އެއްބައި ކުދިންނަކީ އިންޑިޔާ ދަރިވަރުންނެވެ.

އިންޑިޔާއިން ވަނީ ރަޝިޔާއިން ޔޫކްރެއިން އަށް ދެމުންދާ ހަމަލާތައް ކުށްވެރިކުރުމަށް ދެކޮޅުހަދާފައެވެ. ނަމަވެސް ހަމަލާ ބަދަލުކުރުން ހުއްޓާލާ ސުލްހައިގެ މަގު ޚިޔާރުކުރުމަށް އަންނަނީ ގޮވާލަމުންނެވެ.