ރޯދައަށް ޚާއްސަ ކޮށްގެން މާލޭގެ ދެ ސަރަހައްދެއްގައި ވަގުތީ 2 މާރުކޭޓު އަޅަނީ

ރަމަޟާން މަހަށް ޚާއްސަކޮށްގެން މާލޭގެ ދެ ސަރަހައްދެއްގައި ވަގުތީ ދެ މާރުކޭޓު އެޅުމަށް މާލެ ސިޓީ ކައުންސިލުން ނިންމައިފިއެވެ.

މި ނިންމުން ނިންމާފައިވަނީ މާލެ ސިޓީ ކައުންސިލްގެ 4 ވަނަ ދައުރުގެ 42 ވަނަ ޖަލްސާގައެވެ.

މި ޖަލްސާގައި މާރުކޭޓުތައް އިތުރަށް ތަރައްގީކުރެވޭނެ ގޮތްތަކާއި, ލޯކަލް މާރުކޭޓާއި ދަތުރުވެރިންގެ މާރުކޭޓު ތޮއްޖެހިފައިވާތީ އެކަން ހައްލުކުރެވޭނެ ގޮތްތަކާ ގުޅޭގޮތުން މަޝްވަރާކުރިއެވެ. އެހެންކަމުން ކުރިއަށް އޮތް ރޯދަ މަހަށް ޚާއްސަކޮށް އިތުރު ދެ ވަގުތީ މާރުކޭޓާއެކު ކޮންމެވެސް ވަރެއްގެ ހައްލެއް ލިބިގެންދާނެކަމަށް ބެލެވޭކަމަށް ކައުންސިލުން ބުނެއެވެ.

ރަމަޟާން މަހާ ގުޅިގެން އަޅާ މި މާރުކޭޓު ހިންގަންވާނީ ސިޓީ ކައުންސިލުން ކަނޑައަޅާ އުސޫލާ އެއްގޮތަށެވެ.

ރަމަޟާން މަހާ ގުޅިގެން މާލޭގައި ދިރިއުޅޭ ފަރާތްތަކަށް ބޭނުންވާ ތަރުކާރީއާއި، މޭވާގެ ބާވަތްތައް ފަސޭހަކަމާއެކު ގަންނަން ލިބޭނެ އިންތިޒާމުތައް ހަމަޖެއްސުމުގެ ގޮތުން, މާލެ ސިޓީ ކައުންސިލުން މާލޭ ދެ ސަރަހައްދެއްގައި އަޅާ މި މާރުކޭޓުތަކުން ގޮޅިދޫކުރުމަށް ވަނީ ހަމަޖެހިފައެވެ. އަދި މިގޮޅިތައް ދޫކުރަން ހަމަޖެހިފައިވަނީ 2 މަސް ދުވަހުގެ މުއްދަތަށެވެ. ގޮޅި ކުއްޔަށް ހިފަން ބޭނުންވާ ފަރާތްތަކަށް މިހާރު ވަނީ އެ ފުރުސަތު ހުޅުވާލާފައެވެ. ގޮޅިއަށް އެދޭ ފޯމް ތައިސޭކޮށީގައި ހުންނަ ސިޓީ ކައުންސިލްގެ އާންމު ޚިދުމަތްތަކާބެހޭ ބައިން ލިބެން ހުންނާނެއެވެ.

ގޮޅިއަށް އެދޭ ފޯމް ފުރުމަށްފަހު ހުށަހަޅަން ޖެހޭނީ 10 މާރޗް 2022 ވަނަ ދުވަހުގެ 12:00ގެ ކުރިން މާލެ ސިޓީ ކައުންސިލްގެ އާންމު ޚިދުމަތްތަކާ ބެހޭބަޔަށެވެ. މި މާރުކޭޓާގުޅޭ އިއުލާން ގެޒެޓު ކުރެވިފައިވާއިރު، އިއުލާނާއެކު ވަގުތީ މާރުކޭޓުތަކުން ގޮޅި ދޫކުރުމުގެ އުސޫލުވެސް ވަނީ ގެޒެޓްކޮށްފައެވެ.