މާލޭ ރޯމަސް މާރުކޭޓުގައި މަސްވިއްކަން އެދޭ މީހުންނަށް ފުރުސަތު ހުޅުވާލައިފި

މާލޭ ރޯމަސް މާރުކޭޓުގައި މަސްވިއްކަން އެދޭ ފަރާތްތަކަށް ފުރުސަތު ހުޅުވާލައިފިއެވެ.

މާލެ ސިޓީ ކައުންސިލުން ބުނީ މާލެ ރޯމަސްމާރުކޭޓްގައި މަސްވިއްކަން އެދޭފަރާތްތަކުން އެކަމަށް އެދި ރަޖިސްޓަރީ ވުމަށް ހުކުރު ދުވަހުން ފެށިގެން ފުރުސަތު ހުޅުވާލާފައިވާ ކަމަށެވެ.

މިކަމަށް އެދޭފަރާތްތަކުން ހުށަހަޅާ ސިޓީއާއެކު އެފަރާތުން މަސްވެރިކަމަށް ބޭނުންކުރާ އުޅަނދުގެ ރަޖިސްޓަރީގެ ކޮޕީ އާއި، މަސްވިއްކަން އެދޭފަރާތްތަކުގެ ދިވެހި ރައްޔިތެއްކަން އަންގައިދޭ ކާޑުގެ ކޮޕީ ހުށަހެޅުއްވުމަށް ކައުންސިލުން އެދެއެވެ.

ކައުންސިލުން ބުނީ ސިޓީ ބަލައިގަންނާނީ ހުކުރު ދުވަސް ފިޔަވައި ކޮންމެ ދުވަހެއްގެ ހެނދުނު 9:00ން މެންދުރު 1:00ށް މާލޭ ސިޓީކައުންސިލްގެ އާންމު ޚިދުމަތްތަކާބެހޭބަޔާއި، ދަތުރުވެރިންގެ މާރުކޭޓް އޮފީހުން ކަމަށެވެ. އަދި މެއިލް ކުރަން ބޭނުންވާ ފަރާތްތަކަށް އެފުރުސަތު ވެސް ވަނީ ހުޅުވާލާފައެވެ. އަދި މިމަހުގެ 10ވާ މެންދުރު 1:00ގެ ކުރިން ސިޓީ ހުށަހެޅަން ޖެހޭ ކަމަށް ކައުންސިލުން ބުނެއެވެ.

މާލޭ ރޯމަސް މާރުކޭޓުގައި މަސްވިއްކަން އެދޭ ފަރާތްތަކަށް ފުރުސަތު ހުޅުވާލާފައިވާއިރު، މާލެގެ މާރުކޭޓުތަކަށް ދިމާވެފައިވާ މައްސަލަތައް ހައްލު ކުރުމުގެ މަސައްކަތްތައް ސިޓީ ކައުންސިލުން ވަނީ ފަށާފައެވެ. އެގޮތުން ބިދޭސީން ސޭޓުންގެ ގޮތުގައި ބައިތިއްބާ ގޮޅިތަކުގެ އެގްރީމެންޓް ބާތިލުކުރުމާއި ގޮޅި ކުއްޔަށް ނެގި ފަރާތުން އެހެން ފަރާތަކަށް ކުއްޔަށްދީފައި ހުންނަ ގޮޅިތައް ފާހަގަކޮށް، 2 މަސް ދުވަހުގެ މުހުލަތެއް ދީ، އެގްރީމެންޓާއި ޚިލާފުވެފައިވާ ފަރާތްތަކުގެ އެގްރީމެންޓް ބާތިލުކޮށް އެ ގޮޅިތައް އަލުން އިއުލާންކުރާނެ ކަމަށް ކައުންސިލުން ބުނެއެވެ.