ހުޅުމާލެ ފޭސް 2 އިން ސީދާ މާލެއަށް ބަސް ދަތުރުތައް ފަށައިފި
2 މާރިޗު 2022 | ބުދަ 10:54ކޮންމެ ދުވަހެއްގެ ހެނދުނު 6:00 އިން ރޭގަނޑު 11:00އާ ހަމައަށް ގަޑިއަކު އެއްފަހަރު ބަސް ދަތުރު އޮންނާނެ
އެމްޓީސީސީގެ ބަހުގެ ޚިދުމަތް
މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ހުޅުމާލެ ފޭސް 2 އިން ސީދާ މާލެ އަށް ބަސް ދަތުރުތައް ފަށައިފިއެވެ.
ބުދަ ދުވަހުން ފެށިގެން ކޮންމެ ދުވަހެއްގެ ހެނދުނު 6:00 އިން ރޭގަނޑު 11:00އާ ހަމައަށް ގަޑިއަކު އެއްފަހަރު ބަސް ދަތުރު އޮންނާނެ ކަމަށް އެމްޓީސީސީން ބުނެއެވެ. ބަސް ދަތުރުގެ ޓިކެޓުގެ އަގަކީ 15 ރުފިޔާއެވެ.
ހުޅުމާލޭ ފޭސް 2 ގައި މީހުން އާބާދުވަމުން އަންނައިރު، ރަނގަޅު ދަތުރުފަތުރުގެ ނިޒާމެއް ނެތުމަކީ އެސަރަހައްދުގައި ދިރިއުޅޭ ގިނަ ބައެއްގެ ކަންބޮޑުވުމެކެވެ. ފޭސް 2 އިން މާލެއަށް ވަޒީފާ ނުވަތަ ސްކޫލަށް އަންނަންވީ ކަމުގައި ވިޔަސް އެއްގަޑިއިރު ކުރިން ނުކުންނަން ޖެހޭ ކަމަށް 2 ވަނަ ފޭސްގައި ދިރިއުޅޭ މީހުން ބުނެއެވެ. އެމްޓީސީސީން ބަހުގެ ދަތުރުތައް ފެށުމާއެކު މިހާރު ދިމާވަމުން އަންނަ ގިނަ ދަތިތަކަށް ހައްލު ލިބިގެންދާނެ ކަމަށް ބެލެވެއެވެ.
ފޭސް 2 އިން މާލެއަށް ބަސް ދަތުރުތައް ފަށާފައިވާއިރު، އެމްޓީސީސީގެ ސީއީއޯ އާދަމް އާޒިމް ވިދާޅުވީ ޓްރެފިކް ބާރު ބޮޑު ނޫންކަމަށްވާނަމަ ކޮންމެ ގަޑިއިރަކުން ދަތުރުތައް ކުރާނެ ކަމަށެވެ. އަދި ޖުލައި މަސް ނިމުމުގެ ކުރިން ކޮންމެ 15 މިނެޓަކުން ބަސް ދަތުރު ހަމަޖައްސާނެ ކަމަށް އާޒިމް ވިދާޅުވިއެވެ.
ބަސް ދަތުރުތަކާއި ގުޅިގެން މީގެ ކުރިން އާޒިމް ވިދާޅުވެފައިވަނީ އެމްޓީސީސީއަށް ބަހުގެ ޚިދުމަތް ދިނުމަށް ލާޒިމްކޮށްފައިވަނީ މާލެ ސިޓީގެ އިތުރުން އައްޑޫ ސިޓީ އާއި ފުވައްމުލަކު ސިޓީ އަދި ލ އަތޮޅަށްކަމަށެވެ. އެހެންކަމުން، މިތަންތަނުގައި ރަނގަޅަށް އިންތިޒާމުކުރެވިފައިވާ ބަހުގެ ޚިދުމަތެއް ދިނުމަށް އެމްޓީސީސީން މަސައްކަތްކުރާ ކަމަށް އާޒިމް ވިދާޅުވިއެވެ.
މީގެއިތުރުން އެމްޓީސީސީން ބަހުގެ ޚިދުމަތް ދެމުންގެންދާ އައްޑޫ ސިޓީ އާއި ފުވައްމުލަކު ސިޓީއަށްވެސް މުޅިން އައު ބަސް ފޯރުކޮށްދެއްވާނެކަމަށް އާޒިމް ވިދާޅުވިއެވެ. އަދި އައްޑޫއަށް ގެންދާނީ މިނީ ބަސްކަމަށާއި ލ އަތޮޅުގައިވެސް އެމްޓީސީސީއިން ބަހުގެ ޚިދުމަތް ރަނގަޅަށް ދެމުންގެންދާނެކަމަށް އާޒިމް ވިދާޅުވިއެވެ.
