އިންތިޚާބަކަށް ނުފޫޒު ފޯރުވަން ސަރުކާރުގެ ވަސީލަތްތައް ބޭނުން ކުރުމަކީ ކުރާނެ ކަމެއް ނޫން: ރައީސް އޮފީސް
1 މާރިޗު 2022 | އަންގާރަ 05:33އެ މައްސަލައިގައި ޝާމިލުވާ މުވައްޒަފާމެދު ސަރުކާރުން ފިޔަވަޅު އަޅާފައިވަނީ ބަލަންޖެހޭ ކަންކަން ބަލާފައި
ރައީސުލްޖުމްހޫރިއްޔާގެ އޮފީސް- އެ މީހަކު ބޭނުންވާ ފަރާތަކަށް ތާޢީދުކުރުމާއި ވޯޓުލުމަކީ ކޮންމެ ފަރުދަކަށް، އަދި ސަރުކާރުގައި ވަޒީފާ އަދާކުރާ ހުރިހާ މުވައްޒަފުންނަށް ވެސް، އޮތް ޙައްޤެއް
އިންތިޚާބަކަށް ނުފޫޒު ފޯރުވަން ސަރުކާރުގެ ވަސީލަތްތައް ބޭނުން ކުރުމަކީ މި ސަރުކާރުން ކުރާނެ ކަމެއް ނޫންކަމަށް ރައީސުލްޖުމްހޫރިއްޔާގެ އޮފީހުން ބުނެފިއެވެ.
އެކަން ބަޔާންކޮށްފައިވަނީ މޯލްޑިވިއަން ޑިމޮކްރެޓިކް ޕާޓީ (އެމް.ޑީ.ޕީ) ގެ އެތެރޭގެ އިންތިޚާބަކާއި ގުޅުވައިގެން ސިޔާސީ މަޤާމެއްގައި ވަޒީފާ އަދާކުރަމުންދިޔަ މީހަކު، ވަޒީފާއިން ވަކިކޮށްފައިވާ ކަމަށް ދެކެވޭ ވާހަކަތަކާއި ގުޅޭ ގޮތުން އަންގާރަ ދުވަހު ރައީސް އޮފީހުން އާންމުކުރި މެސެޖެއްގައެވެ.
މިކަމާއި ގުޅޭގޮތުން ރައީސް އޮފީހުން ބުނެފައިވަނީ، އެ މައްސަލައިގައި ޝާމިލުވާ މުވައްޒަފާމެދު ސަރުކާރުން ފިޔަވަޅު އަޅާފައިވަނީ، އެ ފަރާތުގެ ވަޒީފާގެ މަސްއޫލިއްޔަތުތަކާއި ޚިލާފަށް އަމަލުކުރަމުންދާ ކަމުގައި ގިނަ އަދަދެއްގެ ރައްޔިތުން ސޮއިކޮށްފައިވާ ޕެޓިޝަނެއްގެ ސިފައިގައާއި، އަމިއްލަ ފަރާތްތަކުން ފޮނުވާފައިވާ ސިޓީތަކުގެ ޒަރީއާއިން ރައީސުލްޖުމްހޫރިއްޔާގެ އޮފީހަށް ލިބިފައިވުމާއި ގުޅިގެންކަމަށެވެ.
އެގޮތުން ފިޔަވަޅު އެޅީ އެކަމާއި ގުޅިގެން ބަލަން ޖެހޭ ކަންކަން ބެލުމަށް ފަހުގައި، އެފަދަ ހާލަތްތަކުގައި އަމަލުކުރުމަށް ކަނޑައަޅާފައި އޮންނަ ޤަވާއިދުތަކާއި އުސޫލުތަކުގެ ތެރެއިންކަމުގައިވެސް ރައީސް އޮފީހުން ބުނެއެވެ.
އިންތިޚާބަކަށް ނުފޫޒު ފޯރުވުމުގެ ގޮތުން ސަރުކާރުގެ ވަސީލަތްތައް ބޭނުން ކުރުމަކީ، މި ސަރުކާރުން އެއްވެސް ހާލެއްގައި ޤަބޫލުކުރާ، އަދި އަމަލުކޮށްފައިވާ ގޮތެއް ނޫންކަމަށްވެސް ރައީސް އޮފީހުން ބުނެފައިވެއެވެ. އަދި އެ ފަދަ އަމަލުތަކަކީ މި ސަރުކާރުން އަބަދު ކުށްވެރިކުރާ، މި ސަރުކާރުގެ ސިޔާސަތުތަކާއި ދެކޮޅު ކަންކަން ކަމަށްވެސް ރައީސް އޮފީހުން ވަނީ ފާހަގަކޮށްފައެވެ.
މީގެއިތުރުން، އެ މީހަކު ބޭނުންވާ ފަރާތަކަށް ތާޢީދުކުރުމާއި ވޯޓުލުމަކީ ކޮންމެ ފަރުދަކަށް، އަދި ސަރުކާރުގައި ވަޒީފާ އަދާކުރާ ހުރިހާ މުވައްޒަފުންނަށް ވެސް، އޮތް ޙައްޤެއްކަމަށް ރައީސް އޮފީހުން ބުނެއެވެ. އެ ޙައްޤަށް އެއްވެސް އުނިކަމެއް އަންނާނެ ފަދަ އެއްވެސް އަމަލެއް ދިމާވެފައިވާނަމަ ކަމާއި ބެހޭ އިދާރާތަކަށް ހުށަހެޅުމަށްވެސް ވަނީ ރައީސް އޮފީހުން އިލްތިމާސް ކޮށްފައެވެ.
ރައީސް އޮފީހުން އެހެން ބުނެފައިވާއިރު، އެމްޑީޕީގެ އެތެރޭގެ އިންތިޚާބާއި ދިމާކޮށް ސިޔާސީ މަގާމުތަކުގައި ތިބި އެ ޕާޓީގެ އެކި މެމްބަރުން ވަޒީފާއިން ވަކިކުރާ ކަމަށް ބުނެ، ރައްޔިތުންގެ މަޖިލީހަށް ކުއްލި މައްސަލައެއްވެސް ވަނީ ހުށައަޅާފައެވެ. އުނގޫފާރު ދާއިރާގެ އެމްޑީޕީ މެންބަރު މުހައްމަދު ވަޙީދު ހުށައެޅުއްވި މި މައްސަލަ މަޖިލީހަށް ބަލައިގަތީ 23 މެންބަރުންގެ ވޯޓާއެކުގައެވެ.
