ރަޝިޔާއިން ޔޫކްރެއިން އަށް ދޭ ހަމަލާތައް އިތުރުކޮށް ވަރުގަދަކުރާނަމަ އެމެރިކާއިން ރަޝިޔާ އާއި ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް އިތުރުކުރާނެ ކަމަށް އެމެރިކާގެ ސްޓޭޓް ޑިޕާޓްމަންޓްގެ ސްޕޯކްސްޕާސަން ނެޑް ޕްރައިސް ވިދާޅުވެއްޖެއެވެ.
ހަނގުރާމަ ފެށުނުތާ ހަވަނަ ދުވަސް ކުރިޔަށްދާއިރު އަދިވެސް ރަޝިޔާއިން ހަމަލާތައް ދިނުން މަޑުޖައްސާލިތަނެއް ނުފެނެއެވެ. ނޫސްވެރިންނާއި ބައްދަލުކުރައްވާ ވާހަކަދައްކަވަމުން ޕްރައިސް ވިދާޅުވީ އެމެރިކާއިން އަޅާ ދަތިކުރުމުގެ ފިޔަވަޅުތަކުގައި އެމެރިކާ އާއެކު އެމެރިކާގެ ބައިވެރިންވެސް ބައިވެރިވާނެކަމަށެވެ.
ޕްރައިސް ވިދާޅުވީ ރަޝިޔާއިން ހަމަލާދޭ ވަރަކުން ފިޔަވަޅުތައްވެސް އިތުރުކުރަމުންދާނެކަމަށެވެ.
މީގެއިތުރުން ޕްރައިސް ވަނީ ބެލަރޫސް އަށް ފާޑުވިދާޅުވެފައެވެ. އެގޮތުން ރަޝިޔާގެ ރައީސް ވްލަޑްމިއަރ ޕުޓިން އަށް ޔޫކްރެއިންއަށް ހަމަލާދިނުމުގައި ބެލަރޫސްގެ ފަސްގަނޑުން ޖާގަދީފައިވާކަމަށް ވިދާޅުވިއެވެ.
އެމެރިކާއިން ރަޝިޔާގެ ފައިނޭންޝަލް ތަންތަނަށާއި ޕުޓިން އާއި ޕުޓިންގެ ބައިވެރިންނާއި ދެކޮޅަށް އެޅި ދަތިކުރުމުގެ ފިޔަވަޅުތަކާއެކު ބެލަރޫސްގެ 24 މީހަކަށްވެސް ވަނީ ދަތިކުރުމުގެ ފިޔަވަޅުތައް އަޅާފައެވެ.
ރަޝިޔާ އާއި ދެކޮޅަށް އެމެރިކާ އާއި އެމެރިކާގެ ބައިވެރިން ދަތިކުރުމުގެ ފިޔަވަޅުތައް އަޅަމުންދާއިރު ޔޫކްރެއިންއަށް އަސްކަރީ ގޮތުން ދޭ އެހީތެރިކަންވެސް އަންނަނީ އިތުރުކުރަމުންނެވެ.
