ބެލަރޫސް އިން ރާއްޖެއަށް އަންނަން ބޭނުންވާ ދިވެހިންނަށް މާލީ އެހީތެރިކަން ފޯރުކޮށްދެނީ
ބެލަރޫސްގެ ޔުނިވާސިޓީތަކުގައި އާދައިގެ މަތިން ކިޔެވުން ކުރިއަށްދޭ
ބެލަރޫސްގައި ތިބި ދިވެހިންތަކެއް
ބެލަރޫސް އިން ރާއްޖެއަށް އަންނަން ބޭނުންވާ ދިވެހިންނަށް މާލީ އެހީތެރިކަން ފޯރުކޮށްދޭން ސަރުކާރުން ނިންމައިފިއެވެ.
ފޮރިން މިނިސްޓްރީގެ ކޮމިއުނިކޭޝަންސް ޑިރެކްޓަރު މިއުވާން މުހައްމަދު ވިދާޅުވީ ބެލަރޫސްގެ ޔުނިވާސިޓީތަކުގައި އާދައިގެ މަތިން ކިޔެވުން ކުރިއަށް ދާކަމަށެވެ. އަދި އެ ގައުމު އޮތީ އާންމު ހާލަތެއްގައި ކަމަށާއި، ހަމަލާއެއް އަތުވެދާނެ ކަމަށް ޔުނިވާސިޓީތަކުން ނުދެކޭ ކަމަށެވެ. އަދި އެގައުމުގައި ތިބި ދިވެހިންނާއި މުއާމަލާތްކުރަމުންދާކަމަށް މިއުވާން ވިދާޅުވިއެވެ.
ރަޝިޔާއާއި ގާތް ގުޅުމެއް އޮންނަ ބެލަރޫސްގެ ސަރުކާރުން ވަނީ ހަނގުރާމަ ފެށެން ގާތްވެފައި ވަނިކޮށް އެ ގައުމާއެކު އަސްކަރީ ތަމްރީނުތަކެއް ކުރިއަށް ގެންގޮސްފައެވެ. އަދި ރަޝިޔާ އާއި ޔޫކްރެއިން އާއި ދެމެދު ސުލްހައިގެ ވާހަކަތައްވެސް ކުރިޔަށްދަނީ ބެލަރޫސްގައެވެ.
މީގެއިތުރުން މިއުވާން ވިދާޅުވީ ޔޫކްރޭނުގައި ތަކެތީގެ އަގު މަތިވަމުން ދާތީ، އެ ގައުމުގައި ތިބި ދިވެހީންނަށް ވެސް ސަރުކާރުން މާލީ އެހީތެރިކަން ފޯރުކޮށްދޭނެ ކަމަށެވެ.
ރަޝިޔާއިން ޔޫކްރޭނުގެ ވެރިރަށަށް އެރުމަށް ތައްޔާރުވަމުން އަންނަ އިރު، އެ ރަށާއި، ކައިރި ސަރަހައްދެއްގައި ދިވެހި އާއިލާއެއް ވެސް ތިބެއެވެ. މިނިސްޓްރީން ބުނީ މިހާރު އެ އާއިލާ ދަނީ އެ ގައުމުގެ ހުޅަނގު ބޯޑަރާ ދިމާލަށް ދަތުރުކުރަމުން ކަމަށެވެ. އަދި ޔޫކްރެއިންގެ އިރުމަތީގައި ތިބި ދިވެހިންނާވެސް މުއާމަލާތްކުރަމުންދާކަމަށް މިއުވާން ވިދާޅުވިއެވެ.
