ޓްރާންސްޝިޕްމަންޓް ބަނދަރުގެ މަސައްކަތް މިއަހަރުގެ ތެރޭގައި ފެށޭނެ: މިނިސްޓަރު ފައްޔާޒު
މި ޕްރޮޖެކްޓް ކުރިއަށް ގެންދާނީ ސަރުކާރުގެ ބޮޑެތި ކުންފުނިތަކުގެ ޖޮންއިންޓް ވެންޗަރއެއް ތެރެއިން
އިކޮނޮމިކް މިނިސްޓަރު ފައްޔާޒު އިސްމާއިލް އިޤްތިސާދީ ކޮމިޓީގައި ވާހަކަފުޅު ދައްކަވަނީ
އިހަވަންދިއްޕޮޅުގެ ޓްރާންސްޝިޕްމަންޓް ބަނދަރުގެ މަސައްކަތް މިއަހަރުގެ ތެރޭގައި ފެށޭނެ ކަމަށް އިކޮނޮމިކް މިނިސްޓަރު ފައްޔާޒު އިސްމާއިލް ވިދާޅުވެއްޖެއެވެ.
އިހަވަންދިއްޕޮޅުގެ ޓްރާންސްޝިޕްމަންޓް ބަނދަރެއްގެ ޚިދުމަތް ދެވޭނެ މަގު ފަހިކޮށްދިނުމަށް އެދި ރައްޔިތުންގެ މަޖިލީހުގެ ހޯރަފުށީ ދާއިރާގެ މެމްބަރު އަހްމަދު ސަލީމް ހުށަހެޅުއްވި ޤަރާރަށް ހޯމަ ދުވަހު އިޤްތިސާދީ ކޮމިޓީގައި ވާހަކަފުޅު ދައްކަވަމުން ފައްޔާޒް ވިދާޅުވީ އެންމެ ފުރަތަމަ މި މިސައްކަތް ޓެންޑަރ ކޮށްގެން ހަ ޕާޓީއަކުން ކުރިމަތިލިއިރު އެއީ އެކަން ކުރާ އަދި ފައިނޭންޝަލް ކެޕޭސިޓީ ހުރި ކުންފުނިތަކެއް ނޫން ކަމަށެވެ.
ފައްޔާޒު ވިދާޅުވީ ވިޔަފާރީގެ ގޮތުން ބަލާއިރު މި ޕްރޮޖެކްޓަށް އިންވެސްޓް ކުރުމަކީ އެފަރާތަކަށް ފައިދާ ނެތްކަމަކަށް ވިޔަސް، މިއީ ޤައުމެއްގެ ހަސިއްޔަތުން ބަލާނަމަ ވަރަށް މުހިންމު ކަމެއް ކަމަށެވެ. ފައްޔާޒު ވިދާޅުވީ އިންވެސްޓަރަށް ވެސް އިންވެސްޓް ކުރާ މިންވަރުގެ ފައިދާ ލިބުމަށް 15 ވަރަކަށް އަހަރު ނަގާނެ ކަމަށާއި އިންޓާނަލް ރިޓާން އަކީ 7 ޕަސަންޓް ކަމަށެވެ. އެހެންކަމުން މި މަޝްރޫއުއަށް އިންވެސްޓަރުންގެ ޝައުޤުވެރިކަން ނެތް ކަމަށެވެ.
އެހެންކަމުން މިހާރު ސަރުކާރުން ވިސްނާފައިވަނީ ދިގު މުއްދަތަކަށް މި ޕްރޮޖެކްޓް ކުރިއަށް ގެންގޮސް މަޑުމަޑުން ތަރައްޤީކޮށްގެން ވިޔަސް މި މަސައްކަތް ފެށުމަށް ކަމަށް ފައްޔާޒު ވިދާޅުވިއެވެ. ޓްރާންސްޝިޕްމަންޓް ޕޯޓަކީ ފޭސްތަކަކަށް ބެހިގެންދާ ޕްރޮޖެކްޓެއް ކަމަށާއި އެ ތަނަށް ގެންނަން އުޅޭ ޑިވަލޮޕްމަންޓަކީ ލޯކަލް ޕްރޮޖެކްޓެއް ކަމަށް މިނިސްޓަރު ވިދާޅުވިއެވެ. އޭގެ ތެރޭގައި ވަކި ކޮމްޕޮނަންޓްތައް ހުންނާނެ ކަމަށް ވެސް ފާހަގަކުރެވިއެވެ.
އެގޮތުން މި ޕްރޮޖެކްޓް ކުރިއަށް ގެންދާނީ ސަރުކާރުގެ ބޮޑެތި ކުންފުނިތަކުގެ ޖޮންއިންޓް ވެންޗަރއެއްގެ ތެރެއިން ޑިވަލޮޕަރެއްގެ ހަސިއްޔަތުން ކަމަށް ވިދާޅުވިއެވެ. އެގޮތުން އެމްޓީސީސީ އާއި އެސްޓީއޯ ފަދަ ކުންފުނިތައް މި ޖޮންއިންޓް ވެންޗަރގައި ބައިވެރިވާނެއެވެ.
މިނިސްޓަރު އިތުރަށް ވިދާޅުވީ ހިސާބުތައް ހަދަމުންދާ ކަމަށާއި އިކޮނޮމިކް ކައުންސިލަށް ހުށަހެޅުމަށް ތައްޔާރުވަމުންދާ ކަމަށެވެ. ފައްޔާޒު ވިދާޅުވީ ރާއްޖޭގައި މިފަދަ ބަނދަރެއް ހެދުން މާބޮޑަށްވެސް ލަސްވެގެން ހިނގައްޖެ ކަމަށާއި އެހެން ޤައުމުތަކުގައި އެކަން ފަށައިގެން ކުރިއަށްދާތީ ދަތިތައް އެބަހުރި ކަމަށެވެ. ޝިޕިންގ ލައިނާއެކު ޕާޓްނަރޝިޕް ހެދުމުން ފައިދާވާނެ ކަމަށާއި އެގޮތަށް ކުރިއަށް ގެންދަވަން ވިސްނަވާކަމަށް ވެސް ފައްޔާޒު ވިދާޅުވިއެވެ.
ސެކިއުޓީ ކްލިއަރެންސް އަދި ބަންކަރިންގެ ޚިދުމަތް ދިނުމަށް ޤަވާއިދުތަކަށް ގެންނަން ޖެހޭ ބަދަލުތައް ގެނައުމަށް ޓްރާންސްޕޯޓް މިނިސްޓްރީ އާއި އެމްއެންޑީއެފާއި ވާހަކަ ދައްކަމުންދާ ކަމަށްވެސް ފައްޔާޒު ވިދާޅުވިއެވެ.
ވީއެލްސީސީގެ ބަންކަރިންގ ސަރވިސް ދޭން އެސްޓީއޯ އިން މިއަހަރު ފަށާނެކަމަށް ވެސް ވިދާޅުވިއެވެ.
މެމްބަރު އަހްމަދު ސަލީމް ހުށަހެޅުއްވި ޤަރާރުގައި ކްރޫ ޗޭންޖަށް މިހާރުން މިހާރަށް ފުރުސަތު ދިނުމަށް އެބައޮތްކަމަށާއި އެއީ ވަރަށް ރަނގަޅު ނިންމުމެއް ކަމަށް މިނިސްޓަރު ވިދާޅުވިއެވެ. އަދި މިހާރު ޓްރާންސްޕޯޓް މިނިސްޓްރީ އާއި ވާހަކަ ދައްކައިގެން، ކްރޫ ޗޭންޖުގެ ޚިދުމަތް ދިނުމަށް މަސައްކަތް ކުރާ ކަމަށާއި ޤަވާއިދަށް ބަދަލު ގެންނަން ޖެހޭ ކަމަށް އެ މިނިސްޓްރީން ބުނެފައިވާ ކަމަށް ފައްޔާޒު ވިދާޅުވިއެވެ. މިހާރު އޮތް ގޮތުން މީހުން ފޮނުވައިގެން މި ޚިދުމަތްދޭނަމަ ޚަރަދު ބޮޑުވެގެންދާ ކަމަށް ވެސް ފާހަގަކުރެއްވިއެވެ.
ފައްޔާޒު ވިދާޅުވީ ސެކިއުރިޓީ ސަރވިސްގެ ޚިދުމަތް ދިނުމަށް ވެސް ޤަރާރުގައި އެބައޮތް ކަމަށާއި އާމަރީއެއް ބެލެހެއްޓޭނެ ގޮތްތަކެއް ހުރިތޯ ބަލަން ޑިފެންސް މިނިސްޓްރީއާ ވާހަކަ ދައްކަމުންދާ ކަމަށެވެ. އަދި އެކަން ކުރެވޭނެ މަގެއް ފަހިވެއްޖެނަމަ ކުރައްވާނެ ކަމަށް ފައްޔާޒު ވިދާޅުވިއެވެ.
އިޤްތިސާދީ ހަބުގެ މައިގަނޑު މަސައްކަތް ކުރިއަށްދާނީ ޓްރާންސްޝިޕްމަންޓް ބަނދަރުގެ ތެރެއިން ކަމަށް މިނިސްޓަރު އިތުރަށް ވިދާޅުވިއެވެ.
