ބަންޑުން ޖަހާލި ޑިންގީ ފެނިއްޖެ، ގެއްލުނު ފުލުސް މީހާ އަދިވެސް ނުފެނޭ: ޕޮލިހުން

އައްޑޫގައި ފަރު މަސްވެރިކަމަށް ނުކުމުގެ އުޅެނިކޮށް ޑިންގީއެއް ބަންޑުން ޖަހާލައި އެއިން ދަތުރުކުރި އެކަކު ގެއްލިފައިވާއިރު، ބަންޑުން ޖަހާލި ޑިންގީ ފެނިއްޖެކަމަށް ފުލުހުން ބުނެފިއެވެ.

ޑިންގީން ގެއްލިގެން ހޯދަމުން ދަނީ ފުލުހެއް ކަމަށް ވަނީ ކަށަވަރު ކުރެވިފައެވެ.

ފުލުހުން ބުނީ ޑިންގީ ފެނުނު ނަނަމަވެސް ގެއްލުނު ފުލުސް މީހާ އަދިވެސް ނުފެންނަކަމަށެވެ.

މިހާދިސާގައި ގެއްލިފައިވަނީ އައްޑޫ ސިޓީ ހިތަދޫ އުމުރުން 27 އަހަރުގެ ޕޮލިސް ކޯޕްރަލް މުހައްމަދު ސުމައިދުއެވެ. ފުލުހުން ބުނީ އޭނާ ހޯދުމަށް ކޯސްޓްގާޑްގެ ސިފައިންނާއި ފުލުހުންވެސް ހަރަކާތްތެރިވަމުންދާކަމަށެވެ. އޭނާ ގެއްލުނުއިރު ލައިގެން ހުރީ ކަޅުކުލައިގެ އަތްދިގު ޖަރޒީއަކާއި ކަޅުކުލައިގެ ޓްރެކްޝޫޓެއް ކަމަށް މަޢުލޫމާތު ލިބިފައިވެއެވެ. ޑިންގީގައި ތިބި އަނެއް ދެމީހުން ވަނީ ފަތާފައި ގޮސް ޝަންގްރިއްލާ ރިސޯޓަށް އަރާ ސަލާމްތްވެފައެވެ. އެ ދެމީހުންނަކީ ފޭދޫއަށް ނިސްބަތްވާ ދެމީހުންނެވެ.

ތިންމީހުންނާއިއެކު މި ޑިންގީ ބަންޑުން ޖަހާލާފައި ވަނީ ހިތަދޫ ކަނޑުއޮޅި ތެރެއަށެވެ. މި ހާދިސާ ރިޕޯޓްކޮށްފައި ވަނީ އާދިއްތަ ދުވަހުގެ ރޭ 8:30 ހާއިރު ކަމަށް ވެސް އެމްއެންޑީއެފުން ބުނެ އެވެ.

ގެއްލުނު މީހާއާ ބެހޭ އެއްވެސް ޚަބަރެއް ވޭތޯ އެސަރަހައްދުން ދަތުރުކުރާ އުޅަނދުފަހަރުންނާއި ރަށްތަކުން ބަލައިދިނމަށް އެމްއެންޑީއެފުން އެދެއެވެ. އަދި އޭނާއާއި ބެހޭ އެއްވެސް މަޢުލޫމާތެއް ލިބިއްޖެނަމަ ލަސްނުކޮށް އެމްއެންޑީއެފް ކޯސްޓްގާޑްގެ ހިލޭ ގުޅޭނަމްބަރު 191 ނުވަތަ 3395981 އަދި 3398898 ފޯނަށް ގުޅުއްވައި ދެއްވުން ވެސް އެމްއެންއެންޑީއެފުން ވަނީ އެދިފައެވެ.