މަސްތުވާ ތަކެއްޗާއެކު ކުޅުދުއްފުށިން ޒުވާނަކު ހައްޔަރުކޮށްފި
28 ފެބުރުއަރީ 2022 | ހޯމަ 11:47ހައްޔަރުކޮށްފައިވަނީ 21 އަހަރުގެ ދިވެހި ފިރިހެނެއް
ކުޅުދުއްފުށީ ސިޓީ ޕޮލިސް ސްޓޭޝަން
ކުޅުދުއްފުށި ސިޓީގައި ފުލުހުން ހިންގި އޮޕަރޭޝަން އެއްގައި މަސްތުވާ ތަކެއްޗާއެކު ޒުވާނަކު ހައްޔަރުކޮށްފިއެވެ.
އެ ސިޓީގައި ހިންގި އޮޕަރޭޝަން އަކީ މާލެއިން ފުރައިގެން ކުޅުދުއްފުއްޓަށް ދަތުރުކުރަމުންދާ ބޯޓަކުން މަސްތުވާތަކެތި ގެންދާކަމަށް ފުލުހުންގެ އިންޓެލިޖެންސަށް ލިބުނު މައުލޫމާތަކާ ގުޅިގެން ހިންގި އޮޕަރޭޝަން އެކެވެ. ކުޅުދުއްފުށީ ސިޓީ ފުލުހުންނާއި، އިންޓެލިޖެންސް ގުޅިގެން ހިންގި އެ އޮޕަރޭޝަންގައި ހައްޔަރުކޮށްފައިވަނީ 21 އަހަރުގެ ދިވެހި ފިރިހެނެކެވެ.
ފެބްރުއަރީ 27 ވަނަ ދުވަހު ހިންގި އެ އޮޕަރޭޝަންގައި ކުޅުދުއްފުށީ ސިޓީ ބަނދަރު ސަރަހައްދުން އޭނާ ހުއްޓުވައި ބަލައި ފާސްކުރިއިރު އޭނާ ގެންގުޅުނު ކޮތަޅެއްގެ ތެރެއިން މަސްތުވާތަކެތި ކަމަށް ޝައްކުކުރެވޭ އެއްޗެއްހުރި ޖޫސްޕެޓީ ކޮތަޅެއް ފެނިފައިވެއެވެ.
އެ މައްސަލާގައި ހައްޔަރުކުރީ މީހާގެ އިތުރު މަޢުލޫމާތު ފުލުހުން ހާމަކޮށްފައެއް ނުވެއެވެ.
މި މައްސަލަވެސް ފުލުހުން ދަނީ ތަޙްޤީޤް ކުރަމުންނެވެ.
