ކަނޑު އަޑީގައި 50 ގަޑިއިރު މީހަކު ހޭދަކުރާ ވާހަކަ ބުނުމަކީ އެއްބަޔަކަށް ގަބޫލުކުރަން ދަތިކަމަކަށް ވެދާނެއެވެ. ނަމަވެސް މިއަދު ރާއްޖޭގައިވެސް އެކަން މިވަނީ ހަގީގަތަކަށް ހަދާފައެވެ. ރާއްޖޭގެ ފަތުރުވެރިކަމަށް އަދި ޑައިވިންގ އިންޑަސްޓްރީއަށް 50 އަހަރު ފުރުމުގެ މުނާސަބަތާ ގުޅުވައިގެން, ރާއްޖޭގެ ކުޅަދާނަ ޑައިވަރު ޝަފްރާޒް ނައީމް ވަނީ 50 ގަޑިއިރު މޫދުގެ އަޑީގައި ހޭދަކޮށްފައެވެ. ޔުނިއެކްސް ސްޕޯޓިންގއިން އިންތިޒާމުކޮށްގެން ކުރިއަށް ގެންދިޔަ މި ހަރަކާތަކީ, ފަރުތަކާއި މޫދާއި، އެތަންތަނުގެ ދިރުންތައް ރައްކާތެރިކަމާއެކު ކުރިއަށް އޮތް ޖީލާ ހަމައަށް ގެންދިއުމަށްޓަކައި ވަރުގަދަ މެސެޖެއް ފޯރުކޮށްދިނުމަށް ކުރިއަށްގެންދިޔަ ހަރަކާތެކެވެ.
މި ހަރަކާތް ކުރިއަށް ގެންދިއުމަށްޓަކައި ޝަފްރާޒް މޫދަށް ފައިބާފައިވަނީ މިދިޔަ ހުކުރު ދުވަހުއެވެ. ކުޑަގިރި ފަޅުތެރެއަށް ފައިބައިގެން ހުކުރު ދުވަހުގެ މެންދުރުފަހު 3:30 ހާއިރު ފެށި މި ހަރަކާތަށް ރާއްޖޭގެ ބޮޑެތި ކުންފުނިތައް ހިމެނޭހެން ގިނަ ބަޔަކު އަންނަނީ ހިތްވަރު ދެމުންނެވެ.
މީގެ ކުރިން މިލިޓަރީ ޑައިވް އިންސްޓްރަކްޓަރެއްގެ ގޮތުގައި އަދި ރިކްރިއޭޝަނަލް އިންސްޓްރަކްޓަރ ޓްރެއިނަރެއްގެ ގޮތުގައި މަސައްކަތްކޮށްފައިވާ ޝަފްރާޒަކީ ޑައިވިންގ އިންޑަސްޓްރީގައި 25 އަހަރަށްވުރެ ގިނަ ދުވަހު މަސައްކަތް ކޮށްފައިވާ ފަރާތެކެވެ. ދުނިޔޭގެ އެކި ކަނޑުތައް ދަންނަ ޝަފްރާޒަކީ ރާއްޖޭގެ މޫދު އަޑީގެ ގިނަ ހިސާބުތައް ދަންނަ ކުޅަދާނަ ޑައިވަރެކެވެ. ފާއިތުވި އަހަރުތަކުގައި އޭނާ ވަނީ އެތައް ސަތޭކަ މީހުންނެއް ޑައިވިންގގެ ދާއިރާގައި ތަމްރީނުކޮށްފައެވެ. އޭގެތެރޭގައި ސްކޫބާ ޑައިވްއާއި, އޯޕެން ޑައިވްއާއި، މޯލްޑިވްސް ކޯސްޓްގާޑް، ސްޕެޝަލް ފޯރސް އަދި މެރިންގެ މެމްބަރުންވެސް ހިމެނެއެވެ.
މި ދާއިރާގައި މީހުން ތަމްރީނު ކުރުމުގެ އިތުރުން، ޝަފްރާޒް ވަނީ ރާއްޖޭގެ ކަނޑުއަޑީގެ އެތަކެއް ރީތި ތަންތަން ދިރާސާކޮށް، ހޯދާފައެވެ. މީގެ ތެރޭގައި އެކި ފަރުފަރާއި އަޑިގުޑަންތައް ހިމެނެއެވެ. މީގެ އިތުރުން ރާއްޖޭގެ މެރިން އެކޯސިސްޓަމާގުޅޭ ގިނަ މައުލޫމާތުތަކެއް އޭނާ ވަނީ އުނގެނިފައެވެ.
ކޮންމެ އަހަރަކު ސިންގަޕޫރުގައި ކުރިއަށް ގެންދާ އޭޝިއާ ޑައިވް އެކްސްޕޯގައި ބައިވެރިވުމަށް ޝަފްރާޒަށް ވަނީ ޖެހިޖެހިގެން 6 އަހަރު ދައުވަތު ލިބިފައެވެ. އޭނާ މި އެކްސްޕޯގެ ޓެކް ކޮންފަރެންސްގައި ވަނީ އޭނާގެ ތަޖުރިބާތައް ބައިވެރިންނާ ހިއްސާ ކޮށްފައެވެ.
ޑައިވްކުރުމާއި ދާއިރާގައި މީހުން ތަމްރީނު ކުރުމުގެ އިތުރުން ޝަފްރާޒަކީ އަންޑަރވޯޓަރ ފޮޓޯގްރާފަރެއްވެސްމެއެވެ. އޭނާ ވަނީ އަންޑަރވޯޓަރ ފޮޓޯ ނެގުމުގައި 15 އަހަރަށްވުރެ ގިނަ ދުވަހު މަސައްކަތް ކޮށްފައެވެ. ޝަފްރާޒްގެ ފޮޓޯތައް ވަނީ ގައުމީ, އަދި ބައިނަލްއަގްވާމީ އެކި ޕަބްލިކޭޝަންސްތަކުގައި ހިމަނާފައެވެ. އަދި "ބެސްޓް އޮފް ޝޯވ ބައި ދަ މޯލްޑިވްސް ޓޫރިޒަމް ޕްރޮމޯޝަން ބޯޑް 2007" އާއި "އަންޑަރވޯޓަރ ފޮޓޯގްރަފީ" ކެޓަގަރީންވެސް އޭނާއަށް ވަނީ އެކި ވަނަތައް ލިބިފައެވެ.
މިއަހަރަކީ ރާއްޖޭގެ ފަތުރުވެރިކަމަށް 50 އަހަރު ފުރޭ އަހަރުކަމަށް ވާއިރު، ރާއްޖޭގެ ފަތުރުވެރިކަން ޕްރޮމޯޓުކުރުމަށް އަމިއްލަ ފަރާތްތަކާއި ގުޅިގެން ސަރުކާރުން އަންނަނީ ގިނަ ހަރަކާތްތަކެއް ހިންގަމުންނެވެ. އެގޮތުން މި ހަރަކާތަކީ ގިނަ ބައެއްގެ ސަމާލުކަން ހުއްޓުނު ހަރަކާތަކަށް ވުމުގެ އިތުރުން، ރާއްޖެ އަންނަ ގިނަ ފަތުރުވެރިންނަކީ ރާއްޖޭގެ މޫދާއި ގޮނޑުދޮށްތައް ބަލާލުމަށް އަންނަ ފަރާތްތަކަށް ވާތީ, މި ހަރަކާތުގެ ސަބަބުން ރާއްޖޭގެ ފަތުރުވެރިކަމަށް އިތުރު ކުރިއެރުމެއް ލިބިގެންދާނެއެވެ.
