މެރިޓައިމް ސެކިއުރިޓީ ހަރުދަނާކުރުމަށް އިންޑިއާ އާއި ލަންކާ އާއި ދެމެދު އެއްބަސްވުންތަކެއް އެކުލަވާލަނީ
މި މަހުގެ 25ން 26 ވަނަ ދުވަހަށް ލަންކާގެ ފިނޭންސް މިނިސްޓަރު ބާސިލް ރާޖަޕަކްސާ އިންޑިއާއަށް ވަޑައިގަތުމަށް ވަނީ ނިންމާފައި
ސްރީލަންކާގެ ފިނޭންސް މިނިސްޓަރު ބާސިލް ރާޖަޕަކްސާ އިންޑިއާއަށް ކުރެއްވި ދަތުރުފުޅެއްގެ ތެރެއިން
ލަންކާގެ މެރިޓައިމް ސެކިއުރިޓީ ހަރުދަނާކުރުމަށް އިންޑިއާ އާއެކު އެއްބަސްވުންތަކެއް އެކުލަވާލުމުގެ މަސައްކަތް ފަށައިފިއެވެ.
މި ދެގައުމުން ދިފާއީ ނިޒާމާއި ގުޅުން ހުރި ތިން އެއްބަސްވުމެއް އެކުލަވާލަން ގާތްވެފައިވާއިރު، މި މަހުގެ 25 އިން 26 ވަނަ ދުވަހަށް ލަންކާގެ ފިނޭންސް މިނިސްޓަރު ބާސިލް ރާޖަޕަކްސާ އިންޑިއާއަށް ވަޑައިގަތުމަށް ވަނީ ނިންމާފައެވެ. މި ތިން އެއްބަސްވުމަކީ މެރިޓައިމް ސެކިއުރިޓީ އިތުރަށް ހަރުދަނާކުރުމަށްވާ އެއްބަސްވުންތަކެއްކަމަށް ރިޕޯޓުތައް ބުނެއެވެ.
ލަންކާގެ ރައީސް ގޮޓަބަޔާ ރާޖަޕަކްސާ އާއި ޕްރައިމް މިނިސްޓަރު މަހިންދަ ރާޖަޕަކްސާގެ ކޮއްކޯފުޅު ބާސިލް ރާޖަޕަކްސާ އަންނަނީ ލަންކާއަށް ދިމާވެފައިވާ އިގްތިސާދީ ހީނަރުކަމުން އަރައިގަތުމަށް އިންޑިއާއާއެކު މަޝްވަރާތައް ކުރައްވަމުންނެވެ. ބާސިލް އިންޑިއާއަށް ކުރައްވަން ހަމަޖެހިފައިވާ ދަތުރަކީ މިދިޔަ އަހަރުގެ ޑިސެމްބަރަށްފަހު އެމަނިކުފާނު ނިއުދިއްލީއަށް ކުރައްވާ ދެވަނަ ދަތުރުފުޅެވެ.
އިންޑިއާއިން ލަންކާއަށް ދޭން ހަމަޖެހިފައިވާ އެހީތަކުގެ ތެރޭގައި ކާބޯތަކެއްޗާއި، ބޭސް އަދި ޒަރޫރީ ބޭނުންތައް ފުއްދުމަށް ބޭނުންވާ އެހެނިހެން ތަކެތި ރައްޔިތުންނަށް ފޯރުކޮށްދިނުމަށް އެއް ބިލިއަން ޔޫއެސް ޑޮލަރުގެ އެހީ ހިމެނެއެވެ.
