ޗެމްޕިއަންސް ލީގުގެ ދެވަނަ ބުރުގައި ޔުވެންޓަސް އާއި ވިޔަރެއާލް ބައްދަލުކުރި މެޗު އެއްވަރުވިއިރު، ލިލް ބަލިކޮށް ޗެލްސީން ކުއާޓާ ފައިނަލާ ގާތަށް ޖެހިލައިފިއެވެ.

ރަށުން ބޭރުގައި ވިޔަރެއާލް އާއި ދެކޮޅަށް ޔުވެންޓަސްއިން ކުޅުނު މެޗު އެއްވަރުވީ 1-1 ގެ ނަތީޖާއަކުންނެވެ.

މި މެޗު ފަށައިގެން 32 ވަނަ ސިކުންތުގައި ޔުވެންޓަސްއިން ވަނީ ލަނޑު ޖަހާ ލިޑު ނަގާފައެވެ. މި ލަނޑު އެޓީމަށް ކާމިޔާބު ކޮށްދިނީ ފިނި މޫސުމުގެ ޓްރާންސްފާ މާކެޓުގައި އެ ޓީމާއި ގުޅުނު ޑޫސާން ވްލަހޯވިޗްއެވެ. މިއީ ވްލަހޯވިޗް ޗެމްޕިއަންސް ލީގުގައި ކުޅުނު ފުރަތަމަ މެޗެވެ. މި ލަނޑު ވްލަހޯވިޗް ކާމިޔާބުކުރީ ޑަނީލޯގެ އެހީތެރިކަމާއެކުގައެވެ.

އޭގެ ފަހުން ވިޔަރެއާލުން ކުޅުން ރަނގަޅުކޮށް ޔުވެންޓަސްގެ ހާފަށް ބާރުބޮޑުކުރިއެވެ. އެގޮތުން މެޗުގެ 12 ވަނަ މިނެޓުގައި ވިޔަރެއާލްގެ ޖިއޮވާނީ ލޮ ސެލްސޯއަށް ހުސްކޮށް ލިބުނު ފުރުސަތުގެ ބޭނުން ނުހިފުނެވެ. އޭގެ ތިން މިނެޓު ފަހުން ވިޔަރެއާލްގެ އާނޯޓް ޑަންޖޫމާ ފޮނުވާލި ބޯޅަ ޔުވެންޓަސްގެ ކީޕަރު ވޮޒްޝިއޭ ޝެޒްނީ ވަނީ މަތަކޮށްފައެވެ.

ދެވަނަ ހާފު ފަށައިގެން ޔުވެންޓަސްއަށް ލީޑު ފުޅާކުރަން އަލްވާރޯ މޮރާޓާ ފޮނުވާލި ހަމަލާ ދިޔައީ އަރިމަތިން ބޭރަށެވެ. އޭގެ ފަހުން މެޗުގެ 65 ވަނަ މިނެޓުގައި ވިޔަރެއާލުން ވަނީ ލަނޑު ޖަހާ ނަތީޖާ ހަމަހަމަ ކޮށްފައެވެ. މި ލަނޑު އެޓީމަށް ކާމިޔާބު ކޮށްދިނީ ޑަނީ ޕަރޭހޯއެވެ.

މީގެ އިތުރުން އަމިއްލަ ދަނޑުގައި ޗެލްސީން ލިލް އާއި ދެކޮޅަށް ކުޅުނު މެޗު އެ ޓީމުން ކާމިޔާބުކުރީ 2-0 ގެ ނަތީޖާއަކުންނެވެ.

މެޗުގެ ވަރަށް ކުރީކޮޅު ޗެލްސީން ވަނީ ލަނޑު ޖަހާ ލީޑު ނަގާފައެވެ. މެޗުގެ އަށްވަނަ މިނެޓުގައި ޗެލްސީއަށް މި ލަނޑު ކާމިޔާބުކޮށްދިނީ، ކައި ހަވާޓްޒް އެވެ. މިއީ ހަކިމް ޒިޔެޗް ނެގި ކޯނަރެއްގެ ބޭނުން ހިފައި ހަވާޓްޒް ޖެހި ލަނޑެކެވެ. މި ލަނޑުގެ ކުރިން ވެސް ހަވާޓްޒްއަށް ވަނީ ލަނޑު ޖަހާނެ ރަނގަޅު ދެ ފުރުސަތެއް ލިބި ބޭކާރުވެފައެވެ.

ފުރަތަމަ ހާފުގައި ޗެލްސީއަށް ލީޑު ފުޅާކުރަން ވެސް ފުރުސަތު ލިބުނެވެ. އެގޮތުން ޗެލްސީގެ މާކޯސް އަލޮންސޯ ފޮނުވާލި ބާރު ހަމަލާގެ ހުރަހަކަށްވީ ލިލްގެ ކީޕަރު ލެއޯ ޖާޑިމްއެވެ.

މެޗުގެ 63 ވަނަ މިނެޓުގައި ޗެލްސީން ވަނީ އިތުރު ލަނޑެއް ޖަހާ ލީޑު ފުޅާކޮށްފައެވެ. މި ލަނޑު އެޓީމަށް ކާމިޔާބު ކޮށްދިނީ ކްރިސްޓިއަން ޕްލިސިޗްއެވެ. މިއީ އެންގޯލޯ ކާންޓޭގެ އެހީތެރިކަމާއެކު ޕްލިސިޗް ކާމިޔާބުކޮށްދިން ލަނޑެކެވެ.

ޗެލްސީން ލިލް ދަނޑުގައި ކުޅޭ ދެ ވަނަ ލެގުގެ މެޗާއި ޔުވެންޓަސް އިން އަމިއްލަ ދަނޑުގައި ވިޔަރެއާލާ ކުޅޭ މެޗު އޮންނާނީ އަންނަ މަހުގެ 16 ވަނަ ދުވަހުއެވެ.