ނައިފަރުގައި އިމާރާތްކުރި ހައުސިންގ ޔުނިޓްތައް ކައުންސިލާ ހަވާލުކޮށްފި

ސަރުކަރުން ޅ. ނައިފަރުގައި އިމާރާތްކުރި ހައުސިންގ ޔުނިޓްތައް އެރަށު ކައުންސިލާ ހަވާލުކޮށްފިއެވެ.

ނައިފަރުގެ ރައްޔިތުންނަށް ދިމާވެފައިވާ ބޯހިޔާވަހިކަމުގެ މައްސަލައަށް ހައްލެއް ހޯދައިދިނުމަށްޓަކައި ސަރުކާރުން އެރަށުގައި އިމާރާތްކުރި 100 ހައުސިންގ ޔުނިޓްގެ ތަޅުދަނޑި އެރަށު ކައުންސިލާ ހަވާލުކޮށްދެއްވީ ހައުސިންގ މިނިސްޓަރ މުހައްމަދު އަސްލަމެވެ. ތަޅުދަނޑި ހަވާލުކުރެއްވީ އެ ރަށުގައި ބޭއްވި ރަސްމިއްޔާތެއްގައެވެ.

ނައިފަރުގައި 100 ހައުސިން ޔުނިޓުގެ އިމާރާތް އެޅުމުގެ މަސައްކަތް އާރްސީސީއާ ހަވާލު ކޮށްފައި ވަނީ މިދިޔަ އަހަރުގެ ޖެނުއަރީ މަހުގެ 26 ވަނަ ދުވަހު އެވެ. އެ މަސައްކަތް އާރްސީސީއާ ހަވާލުކުރީ 72.3 މިލިއަން ރުފިޔާ އަށެވެ. އެއީ 330 ދުވަހުގެ ތެރޭ މަސައްކަތް ނިންމާ ގޮތަށެވެ.

މިއީ 1000 އަކަފޫޓުގެ 3 ކޮޓަރީގެ އެޕާރޓްމެންޓްތަކެކެވެ. މިއީ ސަރުކާރުގެ ޕީއެސްއައިޕީ ބަޖެޓުން ޚަރަދުކުރި މަޝްރޫއެކެވެ.

ނައިފަރު ކައުންސިލުން އާއްމު ކޮށްފައިވާ ލިސްޓްގައި, ހައުސިންގ ޔުނިޓަށް އެދުނު ފަރާތްތަކުގެ ތެރެއިން 741 މީހުންގެ ޝަރުތު ހަމަވާކަމަށް ބަޔާން ކޮށްފައި ވެއެވެ. އަދި 17 މީހުންނަށް ޔުނިޓް ލިބިފައި ނުވާއިރު 8 ފަރާތެއްގެ ފޯމް ވަނީ ބާތިލްކޮށްފައެވެ. ފޯމް ލާފައިވާ ފަރާތްތަކުގެ ތެރެއިން އެންމެ މަތިން ޕޮއިންޓް ލިބިފައިވަނީ 91 ޕަސެންޓަށެވެ. މި ލިސްޓް އާންމު ކުރީ މި މަހުގެ ކުރީކޮޅުގައެވެ.

އެގޮތުން އެ ލިސްޓްގައި އެ ހުރިހާ މީހުންގެ ނަމާއި އެޑްރެހާއި އައިޑީކާޑްގެ މައުލޫމާތާއި އެފަރާތަކަށް ލިބިފައިވާ ޖުމްލަ ޕޮއިންޓްގެ އިތުރުން އެފަރާތްތަކާ ގުޅޭ އެހެނިހެން މައުލޫމާތުތައް ވެސް ވަނީ ހިމަނާފައެވެ.